ކާޓޭލްގެ ލީޑަރު ނެމެސިއޯ “އެލް މެންޗޯ” އޮސެގުއެރާ ސެރްވާންޓޭސް މަރައިލުމާއި ގުޅިގެން މުޅި މެކްސިކޯގައި ހިނގި ހަމަނުޖެހުންތަކާއި މީހުން މެރުން ހުއްޓި، ގާތްގަނޑަކަށް %80 މަގުތައް އަމާން ވެއްޖެ ކަމަށް ކަމާބެހޭ ފަރާތްތަކުން ބުނެފިއެވެ.

މެކްސިކޯގައި ހަމަނުޖެހުންތައް އުފެދުނީ ސަލާމަތީ ބާރުތަކުން ހެލިކޮޕްޓަރުތަކުގައި ފަރުބަދަމަތީ އަވަށަށް ވަދެ އެ ޤައުމުގެ “ދެވަނަ އެލް ޗަޕޯ” ނުވަތަ ޖަލިސްކޯ ނިއު ޖެނެރޭޝަން ކާޓޭލް (ސީޖޭއެންޖީ)ގެ ބާރުގަދަ ވެރިޔާ އެލް މެންޗޯ މަރާލުމުންނެވެ.

ބަދަލު ހިފުމުގެ ގޮތުން ކާޓެލް ތަކުގައި އުޅޭ ކްރިމިނަލުން (ކުށްވެރިން) ވަނީ އެތައް ސްޓޭޓްތަކެއްގައި ބަޑި ޖަހައި އިންފްރާސްޓްރަކްޗަރަށް ވެސް ގެއްލުން ދީފައެވެ. 200 އަށް ވުރެ ގިނަ އުޅަނދުގައި ރޯކޮށްފައިވާއިރު، ދިހަވަރަކަށް ޢިމާރާތުގައި ވެސް ރޯކޮށްލާފައި ވާކަމަށް ޚަބަރުތައް ބުނެއެވެ.

މި ހަމަނުޖެހުންތަކިގައި 70 އަށް ވުރެ ގިނަ މީހުން މަރުވެފައިވާ ކަމަށް ރިޕޯޓްކޮށްފައިވާއިރު، އޭގެ ތެރޭގައި ސަލާމަތީ ބާރުތަކުގެ މުވައްޒަފުންނާއި ކުށްކުރާ ނުވަތަ ގޭންގު މެންބަރުން ހިމެނެއެވެ. މި ހަމަނުޖެހުންތަކާއި ގުޅިގެން 90 އެއްހާ މީހުން ވަނީ ބަންދުކޮށްފައެވެ.

މެކްސިކޯ އިން މިއަދު ބުނާ ގޮތުގައި ހަމަނުޖެހުންތަކާއި ގުޅިގެން ބަންދު ކޮށްފައިވާ ގިނަ ގިނަ މަގުތަކާއި ތަންތަން ސާފުކޮށް، ބޮޑެތި އާބަން ސަރަހައްދުތައް ވަނީ ނިސްބަތުން އާންމު ހާލަތަށް އައިސްފަ އެވެ.