މާދަމާއަކީ މިއަހަރުގެ ރަމަޟާން މަހުގެ ފުރަތަމަ ދުވަސް ނުވަތަ މުލަ ރޯދަ ދުވަހަށް ވާނެ ކަމަށް ކުރީގެ ރައީސް މައުމޫން އަބްދުއްގައްޔޫމް ވިދާޅުވެއްޖެ އެވެ.
ރައީސް މައުމޫން އެކްސްގައި ކުރެއްވި ޕޯސްޓެއްގައި ވިދާޅުވީ، ފަލަކީ ހިސާބުތަކަށް ބަލާއިރު މިރޭ ހަނދު ފެންމަތީގައި ހުންނާނެ ކަމަށް ދައްކާތީ، މާދަމާއަކީ ރޯދަ މަހުގެ ފުރަތަމަ ދުވަސް ކަމަށެވެ. މި މުނާސަބަތުގައި އެމަނިކުފާނު ވަނީ ދުނިޔޭގެ އެކި ކަންކޮޅުތަކުގައި ތިބި މުސްލިމުންނަށް ރަމަޟާން މަހުގެ ހެޔޮ އެދުމާއި ތަހުނިޔާ އަރިސްކުރައްވާފަ އެވެ.
ރާއްޖޭގެ ކަލަންޑަރުގައި ވެސް މާދަމާއަކީ ރަމަޟާން މަހުގެ ފުރަތަމަ ދުވަސް ކަމަށް ދައްކާއިރު، ފަލަކީ ހިސާބުތަކުން އެނގޭ ގޮތުގައި މިއަދު އިރު އޮއްސޭއިރު ރާއްޖޭގެ އެންމެ ދެކުނުން އައްޑޫ ސިޓީއަށް މިނެޓަކަށް ވުރެ ކުޑަ ވަގުތުކޮޅަކަށް ހަނދު ފެންމަތީގައި ހުންނާނެ އެވެ. މީގެ އިތުރުން ސައޫދީ އަރަބިއްޔާއަށް ވެސް މިއަދު އިރު އޮއްސޭއިރު ހަނދު ފެންމަތީގައި ހުންނާނެ ކަމަށް ދައްކަ އެވެ.
Advertisement
ފަލަކީ މާހިރުން ފާހަގަކުރާ ގޮތުގައި، އިރާއި ހަނދު ހުރި މިސްރާބުގެ ގޮތުންނާއި އިރުގެ ދޯދިތައް ހުރި ގޮތުން ހަމަލޮލަށް ހަނދު ފެނުމަކީ ނާދިރު ކަމެކެވެ. ނަމަވެސް، ރާއްޖޭގައި އަމަލުކުރާ އުސޫލަކީ ހަމަލޮލަށް ހަނދު ނުފެނުނު ކަމުގައި ވިޔަސް، އިރު އޮއްސޭއިރު އާ މަހުގެ ހަނދު ފެންމަތީގައި ހުންނާނެ ކަމަށް ފަލަކީ ހިސާބުން ކަށަވަރުވާ ނަމަ މަސް ސާބިތު ކުރުމެވެ.
މިއަދު އިރާއި ހަނދު އޮލަނބުކޮށް ދަތުރުކުރަމުންދާއިރު، ދުނިޔޭގެ ބައެއް ހިސާބުތަކަށް މިއަދު އިރުކޭތައެއް ހިފާނެ ކަމަށް ވެސް ފަލަކީ ހިސާބުތަކުން ދައްކައެވެ. ބައެއް ގައުމުތަކުން ރަމަޟާން މަސް ފެށޭނީ މި މަހުގެ 19 ވާ އަންގާރަ ދުވަހު ކަމަށް މިހާރު ވަނީ އިއުލާންކޮށްފައެވެ.
