މި އަހަރުގެ ފިތުރު ޒަކާތް ހަތް އެޕްލިކޭޝަނެއް މެދުވެރިކޮށް ދެއްކުމުގެ އެންމެހައި އިންތިޒާމުތަކެއް ހަމަޖެހިފައިވާ ކަމަށް އިސްލާމިކް މިނިސްޓްރީން ބުނެފި އެވެ.
އިސްލާމިކް މިނިސްޓްރީން ނެރެފައިވާ އިއުލާނެއްގައި ބުނީ، 1447 ވަނަ އަހަރުގެ ފިތުރު ޒަކާތް، ރަމަޟާން މަހުގެ ފުރުތަމަ ދުވަހުން ފެށިގެން 27 ވަނަ ދުވަހުގެ ހެނދުނު 06:00އާއި ހަމައަށް، ހަތް މުއައްސަސާއެއްގެ މޮބައިލް އެޕްލިކޭޝަން މެދުވެރިކޮށް އޮންލައިންކޮށް ބަލައިގަތުމަށް ހަމަޖެހިފައިވާ ކަމަށެވެ.
އެ އެޕްލިކޭޝަންތަކުގެ ތެރޭގައި ހިމެނެނީ:
- ދިރާގު އެޕް / ދިރާގު ޕޭ
- އުރީދޫގެ އެމް ފައިސާ
- އިސްލާމިކް ބޭންކުގެ ފައިސާ މޮބައިލް އެކްސް
- ބީއެމްއެލް މޮބައިލް އެޕް
- ފަހިޕޭ
- އަވަސް އެޕް
- ފިނޭންސް މިނިސްޓްރީގެ ބަނޑޭރި އެޕް
އިސްލާމިކް މިނިސްޓްރީން ބުނީ، ބަނޑޭރިޕޭ އަދި ފަހިޕޭ މެދުވެރިކޮށް ރަމަޟާން މަހުގެ އެންމެ ފަހު ދުވަހާ ހަމައަށް ފިތުރު ޒަކާތް ދެއްކުމުގެ އެންމެހައި އިންތިޒާމުތަކެއް ހަމަޖެހިފައިވާ ކަމަށެވެ. މިނިސްޓްރީން ވަނީ އުމުރުން ދުވަސްވެފައިވާ ފަރާތްތަކާއ،ި އޮންލައިންކޮށް ޒަކާތް ދެއްކުމަށް އަހުލުވެރި ނޫން ފަރާތްތަކަށް ހާއްސަކޮށް އިސްލާމީ މަރުކަޒުގެ ޖަލްސާކުރާ މާލަމުގައި ޒަކާތް ބަލައިގަތުމުގެ އިންތިޒާމުތައް ވެސް ހަމަޖައްސައިފަ އެވެ.
މީގެ އިތުރުން ރަމަޟާން މަހުގެ ފަހުދިހައިގެ ދުވަސްތަކަކީ ސަރުކާރު ބަންދު ދުވަސްތަކެއް ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަނޑައަޅުއްވާފައިވާތީ، އެ ދުވަސްތަކުގައި ކައުންޓަރުތަކުން ޒަކާތް ބަލައިގަތުމަށް ހަމަޖެހިފައިވާ ދުވަސްތައް ވެސް އިސްލާމިކް މިނިސްޓްރީން ވަނީ ހަމަޖައްސައިފަ އެވެ.
އެ ދުވަސްތަކަކީ:
- 22 ފެބުރުއަރީ – 9 މާޗު: ރަސްމީ ބަންދު ނޫން ކޮންމެ ދުވަހަކު 10:00އިން ފެށިގެން 13:00އާއި ހަމައަށް
- 10މާރިޗު – 19 މާޗު: ހުކުރު ދުވަހާއި ހޮނިހިރު ދުވަސް ފިޔަވައި ކޮންމެ ދުވަހަކު 11:00އިން ފެށިގެން 14:00އާއި ހަމައަށް
މާލެ ސިޓީ ފިޔަވައި އަތޮޅުތެރޭގެ ރަށްރަށާއި ސިޓީތަކުގައި ނަގުދު ފައިސާއިން ފިތުރު ޒަކާތް ބަލައިގަތުމުގެ އިންތިޒާމު ހަމަޖައްސާނީ، އެ ރަށެއް ނުވަތަ ސިޓީއެއްގެ ކައުންސިލުންނެވެ.
