އަންނަ މާޗު މަހުން ފެށިގެން ކޮންމެ ހޯމަ ދުވަހަކު ރާއްޖޭގެ ހުރިހާ މީޑިއާތަކާ ބައްދަލުކުރެއްވުމަށް ނިންމަވާފައިވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައްޔިތުންގެ މަޖިލީހުގެ 2026 ވަނަ އަހަރުގެ ފުރުތަމަ ދައުރުގެ ފުރުތަމަ ޖަލްސާގައި ރިޔާސީ ބަޔާން އިއްވަވަމުން ރައީސް ވިދާޅުވީ، ރަސްމީ ދަތުރުފުޅެއް ނުވަތަ ބަންދު ދުވަހަކާ ދިމާނުވާނަމަ، ހަފްތާގެ ކޮންމެ ހޯމަ ދުވަހެއްގެ ހެނދުނު 10:00 އިން ފެށިގެން 11:00 އާއިހަމައަށް މީޑިއާތަކާ ބައްދަލުކުރައްވާނެ ކަމަށެވެ.
އަދި ހަމައެހެންމެ، ކެބިނެޓް މިނިސްޓަރުން ވެސް ހަފުތާއަކު އެއް ގަޑިއިރު ނޫސްވެރިންނާ ބައްދަލުކުރެއްވުމަށް ހަމަޖެހިފައިވާ ކަމަށާއި، މި ބައްދަލުވުންތައް ކުރިއަށްދާނެ ރަސްމީ ތާވަލު ރައީސް އޮފީހުން އާންމުކުރާނެ ކަމަށް އެ މަނިކުފާނު ވިދާޅުވި އެވެ. މިއީ ޒިންމާދާރު މީޑިއާއެއް ބިނާކުރުމަށް ސަރުކާރުން ކުރަމުންގެންދާ މަސައްކަތުގެ ތެރެއިން ނިންމެވި ނިންމެވުމެއްކަމަށް ރައީސްގެ ވާހަކަފުޅުގައި ފާހަގަކުރެއްވި އެވެ.
ރައީސް މި މޭރުމުން ވިދާޅުވެފައިވާއިރު ރާއްޖޭގެ މީޑިއާތަކަށް ފުރުތަމަ ފަހަރަށް ދައުލަތުގެ ބަޖެޓުން މި ސަރުކާރުން ވަނީ ފައިސާ ދޫކޮށްފަ އެވެ. އެގޮތުން މިހާތަނަށް 40 މީޑިއާއަކަށް 27 މިލިއަނަށްވުރެ ގިނަ ރުފިޔާ ސަރުކާރުން ވަނީ ދޫކޮށްފަ އެވެ.
ނިމިދިޔަ 2025 ވަނަ އަހަރު ސަރުކާރުން މައުލޫމާތު ހާމަކުރުމަށް ކުރި މަސައްކަތްތަކާ ގުޅޭގޮތުން ރައީސް ވިދާޅުވީ، ކެބިނެޓް މިނިސްޓަރުން 427 އިންޓަވިއު ނުވަތަ މައުލޫމާތު ސެޝަންތައް ބާއްވާފައިވާ ކަމަށާއި، ސަރުކާރުގެ އިސްވެރިން 493 ފަހަރު މައުލޫމާތު ހިއްސާކޮށްފައިވާ ކަމަށެވެ. އަދި މައުލޫމާތު ހޯދައި ލިބިގަތުމުގެ ހައްގުގެ ދަށުން ރައީސް އޮފީހާއި މިނިސްޓްރީތަކަށް ހުށަހެޅި 1,341 އާރްޓީއައިގެ ތެރެއިން 1,251 އާރުޓީއައިއަށް ޖަވާބު ދީފައިވާކަމަށް އެ މަނިކުފާނު ވިދާޅުވި އެވެ.
ޑިޖިޓަލް ޕްލެޓްފޯމްތައް މެދުވެރިކޮށް ރައްޔިތުންނަށް މައުލޫމާތު ފޯރުކޮށްދިނުމުގެ ގޮތުން މިދިޔަ 2025 ވަނަ އަހަރުގެ ތެރޭގައި ސޯޝަލް މީޑިއާގައި 40,875 ޕޯސްޓްކުރެވިފައިވާ ކަމަށް ވެސް އެ މަނިކުފާނު ވިދާޅުވި އެވެ. ރައީސް އިތުރަށް ވިދާޅުވީ، މީީޑިއާތަކުންނާއި ފަރުދީ ގޮތުން ވެސް ސަރުކާރު ތެރެއިން މައުލޫމާތު ހޯދުމުގައި އެއްވެސް ވަރެއްގެ ހުރަހެއް ނޯންނާނެ ކަމަށެވެ.
