ސަރުކާރުން ހުށަހަޅާފައިވާ 2.4 ބިލިޔަން ރުފިޔާގެ ޓްރެޝަރީ ބޮންޑުގައި އިންވެސްޓްކުރުމަށް ނިންމާފައިވަނީ ޕެންޝަން ފަންޑަށް އެއްވެސް ގެއްލުމެއް ނުވާނެ ގޮތަށް ކަމަށް ޕެންޝަން އޮފީހުން ބުނެފި އެވެ. 

ޕެންޝަން އޮފީހުން ނެރުނު ނޫސްބަޔާނެއްގައި ބުނީ މި އިންވެސްޓްމަންޓްގެ ސަބަބުން ބާޒާރުން ބޭރު ފައިސާ ގަންނަން ނުޖެހި، ޕެންޝަން ފަންޑުގައި ބޭރު ފައިސާގެ ރިޒާވެއް އުފެދިގެންދާނެ ކަމަށެވެ. މި ބޮންޑަކީ ދިވެހި ރުފިޔާގެ އިތުރުން ބޭރު ފައިސާއިންވެސް ރިޓާން ލިބޭ ގޮތަށް ފަރުމާކުރެވިފައިވާ އިންވެސްޓްމަންޓެކެވެ.

ޕެންޝަން އޮފީހުން ބުނީ ފިނޭންސް މިނިސްޓްރީގެ ފަރާތުން ހުށަހެޅި މި އިންވެސްޓްމަންޓަކީ ފަންޑުގެ ވިލުންތެރިކަން އިތުރުކުރުމަށް އެޅޭ މުހިންމު ފިޔަވަޅެއް ކަމަށެވެ.

މި އިންވެސްޓްމަންޓަށް ބޭނުންވާ 2.4 ބިލިޔަން ރުފިޔާ ހޯދުމަށް ހަމަޖެހިފައިވަނީ، މޯލްޑިވްސް ރިޓަޔަމަންޓް ޕެންޝަން ސްކީމުން މިހާތަނަށް އިންވެސްޓްކޮށްފައިވާ ބޮންޑުތަކުގެ ތެރެއިން އެ އަދަދުގެ ބޮންޑު ސެކަންޑަރީ މާކެޓުގައި ވިއްކާލައިގެންނެވެ. ޕެންޝަން އޮފީހުން ބުނީ މިގޮތަށް ބޮންޑު ވިއްކާލުމުގައި ފަންޑަށް އެއްވެސް ގެއްލުމެއް ނުވާނެކަން ކަށަވަރުކޮށްފައިވާނެ ކަމަށެވެ.

މި ނިންމުމަކީ ޕެންޝަން ފަންޑުގެ ދުރު ރާސްތާގެ އިންވެސްޓްމަންޓް ސްޓްރެޓެޖީއާ އެއްގޮތަށް، ކޮންސަލްޓަންޓުންގެ ލަފާގެ މަތިން ނިންމާފައިވާ ނިންމުމެކެވެ. މީގެ މައިގަނޑު މަގުސަދަކީ އިންވެސްޓްމަންޓްތައް ސިންދަފާތުކުރުމާއި، ފައިދާ ޑޮލަރުން ލިބޭނެ މަގު ފަހިކުރުމެވެ. މީގެ އިތުރުން، އިންވެސްޓްކޮށްފައިވާ އެސެޓުތަކުގެ އެވްރެޖް ޑިއުރޭޝަން ދިގުކޮށް، ޕޯޓްފޯލިއޯ ރިޓާން އިތުރުކުރުމަކީ ވެސް މީގެ ބޭނުމެކެވެ.

ޕެންޝަން އޮފީހުން އިތުރަށް ބުނީ މި މުއާމަލާތުގެ ސަބަބުން މިހާރު ހުރި ބައެއް ކުރު މުއްދަތުގެ ޓްރެޝަރީ ބިލްތައް ދިގު މުއްދަތުގެ ބޮންޑުތަކަށް ބަދަލުކުރުމުގެ ފުރުސަތު ލިބިގެންދާނެ ކަމަށެވެ. މިއީ ފަންޑުގެ ޖުމްލަ ފައިދާ އިތުރުކުރުމަށް މަގުފަހިވާނެ ކަމެކެވެ.

އެ އޮފީހުގެ ހުރިހާ ނިންމުންތަކެއްވެސް ނިންމަނީ ޕެންޝަން ފަންޑުގެ ބައިވެރިންގެ މަސްލަހަތު އިސްކޮށް، މެންބަރުންނަށް އެންމެ ފައިދާހުރި ގޮތަށް ކަމަށް ބަޔާނުގައިވެ އެވެ. އަދި މި މުއާމަލާތް ކުރިއަށް ގެންގޮސްފައިވަނީ ޕެންޝަނާ ބެހޭ ގާނޫނާއި ގަވާއިދުތަކުގެ ތެރެއިން ކަމުގެ ޔަގީންކަން ޕެންޝަން އޮފީހުން ވަނީ ދީފައެވެ.