ރެއާލް މެޑްރިޑްގެ ތަރި ކީލިއަން އެމްބާޕޭ، ކްރިސްޓިއާނޯ ރޮނާލްޑޯގެ މުހިންމު ރެކޯޑެއް މުގުރާލައި ޗެމްޕިއަންސް ލީގުގެ ތާރީހުން އާ ޖާގައެއް ހޯދައިފި އެވެ.
މި ރެކޯޑު އޭނާ މުގުރާލީ ޖެނުއަރީ 28 ވީ ބުދަ ދުވަހުގެ ރޭ އެސްޓާޑިއޯ ޑާ ލޫޒްގައި ބެންފީކާއާ ދެކޮޅަށް ކުޅުނު ފޯރިގަދަ މެޗުގައެވެ. ނަމަވެސް، އެމްބާޕޭގެ މި އަމިއްލަ ކާމިޔާބީއާއެކު ވެސް ރެއާލް މެޑްރިޑަށް ޖެހުނީ ބެންފީކާ އަތުން ބަލިވާށެވެ.
މި މެޗުގައި އެމްބާޕޭ ވަނީ ދެ ލަނޑު ކާމިޔާބުކޮށްފަ އެވެ. ފުރަތަމަ ލަނޑު މެޗުގެ 29 ވަނަ މިނެޓުގައި ބޮލުން ޖަހައި ކާމިޔާބުކުރިއިރު، ދެވަނަ ލަނޑު ޖެހީ 58 ވަނަ މިނެޓުގައި އާރްދާ ގުލާ ތަނަވަސްކޮށްދިން ފުރުސަތެއްގަ އެވެ. މި ދެ ލަނޑާއެކު މި ސީޒަނުގެ ޗެމްޕިއަންސް ލީގުގައި އެމްބާޕޭގެ ޖުމްލަ ލަނޑުގެ އަދަދު 13 އަށް އަރައި، މީގެ ކުރިން ރޮނާލްޑޯ ގާއިމުކޮށްފައިވާ 11 ލަނޑުގެ ރެކޯޑު އޭނާ ވަނީ މުގުރާލާފަ އެވެ.
Advertisement
ރޮނާލްޑޯ މި ރެކޯޑު ގާއިމުކުރީ 2015/16 ސީޒަނުގައި ހަ މެޗު ކުޅެގެންނެވެ. ގާތްގަނޑަކަށް ދިހަ އަހަރު ވަންދެން ރޮނާލްޑޯގެ އަތުގައި އޮތް މި ރެކޯޑާ އެމްބާޕޭ އަށް އަރާ ހަމަކުރުމަށްވެސް ހަ މެޗު ބޭނުންވިއިރު، ރެކޯޑުން ކުރި ހޯދުމަށް އޭނާ އިތުރު އެއް މެޗު ކުޅެން ޖެހުނެވެ.
އެމްބާޕޭއަށް މިހާރު އޮތް ޗެލެންޖަކީ އެއް ސީޒަނެއްގައި އެންމެ ގިނަ ލަނޑު ޖެހުމުގެ ރެކޯޑެވެ. އެއީ 2013/14 ސީޒަނުގައި ރޮނާލްޑޯ ކާމިޔާބުކުރި 17 ލަނޑުގެ ރެކޯޑެވެ. ކުރިއަށް އަދި ދެ މެޗު އޮތުމާއެކު، 13 ލަނޑު ޖަހާފައިވާ އެމްބާޕޭއަށް މި ރެކޯޑު މުގުރާލުމުގެ ފުރުސަތު ބޮޑެވެ.
