އިތުރު އަތޮޅެއްގައި އާރްޓީއެލް ފެރީގެ ހިދުމަތް، އަންނަ ފެބްރުއަރީ މަހު ފެށުމަށް ތައްޔާރުވަމުން އަންނަ ކަމަށް ޓްރާންސްޕޯޓް މިނިސްޓްރީން ހާމަކޮށްފި އެވެ.

ޓްރާންސްޕޯޓް މިނިސްޓްރީން ބުނީ، އަންނަ މަހު އިތުރު އަތޮޅެއްގައި ފެރީގެ ހިދުމަތް ފެށުމަށް ތައްޔާރުވަމުން އަންނަ ކަމަށާއި، ދެން އެންމެ އަވަހަށް މި ހިދުމަތް ފަށާނެ އަތޮޅުތައް ކަނޑައެޅުމުގެ މަސައްކަތް މިހާރު ކުރަމުން އަންނަ ކަމަށެވެ.

އާރްޓީއެލް ފެރީގެ ހިދުމަތް ރާއްޖޭގައި ދެނީ ޖުމްލަ ހަ ޒޯނަކަށް ބަހާލައިގެންނެވެ. މި ހިދުމަތް މިހާތަނަށް ހަތަރު ޒޯނެއްގައި ފަށާފައިވާއިރު، ހިދުމަތް ނުފަށާ މިހާރު އޮތީ، ޒޯން ހަތަރެއް އަދި ޒޯން ތިނެއްގަ އެވެ. ޒޯން ހަތަރެއްގައި ހިމެނޭ އަތޮޅުތަކަކީ، މ، ފ، ދ އަދި ލ. އަތޮޅެވެ. ޒޯން ތިނެއްގައި ހިމެނޭ އަތޮޅުތަކަކީ، ކ، އއ، އދ އަދި ވ. އަތޮޅެވެ.

އެންމެ ފަހުން އާރްޓީއެލް ފެރީގެ ހިދުމަތް ފެށީ، ތ. އަތޮޅުގަ އެވެ. އެއާއެކު މިހާތަނަށް ޖުމްލަ 12 އަތޮޅެއްގައި މި ހިދުމަތް ވަނީ ފެށިގެން ގޮސްފަ އެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިދިޔަ އަހަރުގެ އޮކްޓޯބަރު މަހު ވިދާޅުވީ، މި އަހަރުގެ މާޗު މަހުގެ ނިޔަލަށް ހުރިހާ އަތޮޅެއްގައި މި ހިދުމަތް ފެއްޓެވުމަށް ސަރުކާރުން މަސައްކަތް ކުރައްވަމުން ގެންދަވާ ކަމަށެވެ.

އާރުޓީއެލް ފެރީގެ ހިދުމަތަކީ، ހައި ސްޕީޑް ފެރީ ނިޒާމުން މުޅި ރާއްޖެ ގުޅާލުމަށް ސަރުކާރުން ފަށާފައިވާ މަސައްކަތެކެވެ. މި ހިދުމަތުގެ ސަބަބުން އާންމު ރައްޔިތުންނަށް ބޮޑެތި ލުއި ފަސޭހަތަކެއް ލިބިގެންދާނެ އެވެ.

އާރްޓީއެލް ފެރީގެ ހިދުމަތް ދެނީ، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ ލިމިޓެޑް (އެމްޓީސީސީ) އާ ހަވާލުކޮށްގެންނެވެ.