މީހެއްގެ ސޯޝަލް މީޑީޔާ އެކައުންޓުތައް ކޮމްޕްރޮމައިޒް ކޮށް އޭނާގެ ހިއްސާ އޮންނަ ކުންފުންޏެއްގެ އެކައުންޓުން ގިނަ އަދަދެއްގެ ފައިސާ ނެގި މައްސަލައިގައި 10 މީހަކު ހައްޔަރުކޮށްފި އެވެ.
ފުލުހުން ބުނީ މި މައްސަލައިގައި މި މީހުން ހައްޔަރުކޮށްފައިވަނީ މީހެއްގެ ސޯޝަލް މީޑިއާ އެކައުންޓުތައް ކޮމްޕްރޮމައިޒްކޮށް، އޭނާގެ ހިއްސާ އޮންނަ ކުންފުނީގެ ބެންކު އެކައުންޓުން 279,600 އަށްވުރެ ގިނަ ފައިސާ ނަގާފައިވާކަމަށް ހުށަހަޅާފައިވާ މައްސަލައާ ގުޅިގެން ހިންގި އޮޕަރޭޝަނެއްގައި ކަމަށެވެ. އަދި މި އޮޕަރޭޝަނުގައި ގޭންގު ކްރައިމްއާއި ހިންމަފުށި ޕޮލިސް އަދި އައްޑޫ ސިޓީ ހިތަދޫ ފުލުހުންވެސް ބައިވެރިވި ކަމަށް ބުނެފައިވެ އެވެ.
މި މައްސަލައިގައި ހައްޔަރުކުރި 10 މީހުންނަކީ:
މުހައްމަދު ހަސަން، ގުޑްލައިފް / ލ. އިސްދޫ (59އ)
އަލީ އިރުފާނު އަހުމަދުދީދީ، އުދަ / ސ. ހިތަދޫ (26އ)
އަލީ ޝިރާޒު، ނަންރީތިގެ / ސ. ހިތަދޫ (38އ)
އަބްދުﷲ ނާފިޒް، ޕެރިމްރޯޒް / ހދ. ވައިކަރަދޫ (39އ)
މުހައްމަދު އަލީ، ފޫހިވާގެ / ގއ. ކަނޑުހުޅުދޫ (42އ)
މުހައްމަދު ނުހާދު އަލީ، މ. މާލޭގެއާގެ / މާލެ (30އ)
މުހައްމަދު ސިމާދު، ޕެނަމާ / ހއ. ކެލާ (38އ)
އަލީ އިމްރާން، ހީނާމާގެ / ގދ. ފިޔޯރީ (38އ)
އަބްދުﷲ އިސްރާގް، ގުލްބަކާގެ / ގދ. ތިނަދޫ (19އ)
މުޙައްމަދު އިބްރާހީމް، މެޑޯޒް / ކ. ހިންމަފުށި (49އ)
ފުލުހުން މައުލޫމާތު ދިން ގޮތުގައި މި މީހުންގެ ތެރެއިން ހަ މީހުންނަކީ ސްކޭމްކޮށްގެން ހޯދާފައިވާ ފައިސާ އެ މީހުންގެ އެކައުންޓަށް ޖަމާކޮށް ފައިސާ ނަގާފައިވާ މީހުން ކަމަށެވެ. އަދި އެތަނުން އެކަކު، ސްކޭމްކޮށްގެން ހޯދާފައިވާ ފައިސާ އެކި ވިޔަފާރިތަކަށް ޖަމާކޮށް އެ ފައިސާއަށް މުދާ ގަނެފައިވާއިރު އަނެއް ތިން މީހުންނަކީ އެކި މީހުން އޭޓީއެމްއަށް ގެންގޮސްގެން އެ މީހުން މެދުވެރިކޮށް އޭޓީއެމްއިން ފައިސާ ނެގުމަށްފަހު އެ ފައިސާތަކާ ހަވާލުވެފައިވާ މީހުން ކަމަށް ވެސް ފުލުހުން ބުނެފައިވެ އެވެ.
ފުލުހުން ބުނީ މި ދިހަ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން މުހައްމަދު އިބްރާހީމް ފަސް ދުވަހަށް، މުހައްމަދު އަލީ އާއި މުހައްމަދު ހަސަން ހަތް ދުވަހަށް، އަލީ އިރުފާން އަހުމަދުދީދީ 10 ދުވަހަށް އަދި އަނެއް ހަ މީހުން 15 ދުވަހަށް ބަންދުކުރުމަށް އަމުރުކޮށްފައިވާ ކަމަށެވެ.
އަދި މި މައްސަލަ ދިވެހި ފުލުހުންގެ ހިދުމަތުގެ އެންޓި ސްކޭމް ސެންޓަރުން ތަހުގީގުކުރަމުންދާ ކަމަށްވެސް ބުންޏެވެ.
