ކޮވިޑު 19 އިގެ ދުވަސްވަރު ރާއްޖޭގައި ފުޅާ ދާއިރާއެއްގައި ޕީސީއާރް ޓެސްޓިންގެ ހިދުމަތް ދެމުންދިޔަ ދެ ކުންފުނި ކަމުގައިވާ ޕައިނިއާ މޯލްޑިވްސް ޕްރައިވެޓް ލިމިޓެޑާއި އައިލެންޑް ހެލްތް ސޮލިއުޝަންސް ޕްރައިވެޓް ލިމިޓެޑުން ޓެކުހަށް މަކަރު ހަދާފައިވާކަމަށް ތުހުމަތުކޮށް އެ މައްސަލަ ތަހުގީގުކޮށް، ދައުވާކޮށްދިނުމަށް އެދި މޯލްޑިވްސް އިންލެންޑް ރެވެނިއު އޮތޯރިޓީ އިން ޕްރޮސިކިއުޓާ ޖެނެރަލްގެ އޮފީހަށް ހުށަހަޅައިފި އެވެ.
މީރާއިން ދައުވާ ކުރަން ޕްރޮސިކިއުޓާ ޖެނަރަލްގެ އޮފީހަށް ފޮނުވި ނަންތަކުގެ ތެރޭގައި ދެ ކުންފުނީގެ ވެސް ޑިރެކްޓަރެެއް ކަމަށްވާ ޑރ. އިކްލީލް ޝަރީފް އާއި އައިލެންޑް ހެލްތް ސޮލިއުޝަންސްގެ ޑިރެކްޓަރެއް ކަމަށްވާ ޑރ. އަލީ އަބްދުالله ލަތީފް ހިމެނެއެވެ.
ޑރ. އިކްލީލް އާއި ޑރ. އަލީ ލަތީފް އަކީ ރާއްޖޭގައި އެންމެ ފުރަތަމަ ޕީސީއާރު ހިދުމަތް ދޭން ފެށި އެއް ކްލިނިކުގެ ދެ ހިއްސާ ދާރުންނެވެ. ހުޅުމާލޭގައި ހިންގި އާރްއެމްއެލް ލެބް ސާވިސަސް އަކީ ޕައިނިއާ މޯލްޑިވްސް ޕްރައިވެޓް ލިމިޓެޑްގެ ދަށުން ރަޖިސްޓްރީކޮށްގެން ހިންގި ކްލިނިކެވެ.
އޭރު ޕައިނިއާ މޯލްޑިވްސްގެ ހިއްސާދާރުންގެ ތެރޭގައި ފެނަކައިގެ ކުރީގެ މެނޭޖިން ޑިރެކްޓަރު، އަހުމަދު ސައީދު އާއި އޭނާގެ ކޮއްކޮ އިބްރާހިމް ސައީދު އާއި ޑރ. އަލީ ލަތީފްގެ ނަން ހިމެނުނު ނަމަވެސް އެކަން މީޑިއާގެ ސަމާލުކަމަށް އައުމުން ފެނަކަ ސައީދު އާއި ޑރ. އަލީ ލަތީފުގެ ނަން ފަހުން ވަނީ ކުންފުނީގެ ހިއްސާދާރުންގެ ތެރެއިން އުނިކޮށްފަ އެވެ.
ޑރ. އަލީ ލަތީފް އަކީ ކޮވިޑުން އަރައިގަތުމަށް ސަރުކާރުން އޭރު ހެދި ޓެގް ޓީމުގެ ޗެއާޕާސަން އެވެ. އަދި އަހުމަދު ސައީދަކީ އޭރު ފެނަކައިގެ އެމްޑީ އެވެ. ޑރ. އަލީ ލަތީފު ޓެކުހަށް މަކަރު ހަދައި މަނީ ލޯންޑާ ކުރި ކަމަށް ތުހުމަތުކުރެވޭ މައްސަލައެއް މީރާއިން މީގެ ކުރިންވެސް އޭސީސީއަށް ފޮނުވި އެވެ.
މީރާއިން މިއަދު ނެރުނު ބަޔާނެއްގައި ބުނީ ޕައިނިއާ މޯލްޑިވްސް ޕްރައިވެޓް ލިމިޓެޑްއަކީ ޕީސީއާރް ޓެސްޓިންގެ ހިދުމަތް އެންމެ އަވަހަށް ފެށި އެއް ފަރާތްކަމާއި 2020 އަދި 2021ވަނަ އަހަރު އާންމު ފަރާތްތަކުގެ އިތުރުން ޓޫރިސްޓް ފެސިލިޓީތަކަށް އެ ހިދުމަތް ފުޅާ ދާއިރާއެއްގައި ފޯރުކޮށްދީފައިވީނަމަވެސް، އެ ހިދުމަތުން ލިބިފައިވާ އެންމެހައި އާމްދަނީ މީރާއަށް ހުށަހަޅައިފައިވާ މާލީ ހިސާބުތައް އަދި އިންކަމް ޓެކްސް ބަޔާންތަކުގައި ހިމަނައިފައިނުވާކަން މީރާގެ ތަހުގީގަށް ހޯދިފައިވާކަމަށެވެ.
އަދި މި ހިދުމަތް ފޯރުކޮށްދީގެން ޓެކްސް އަހަރު 2021އަށް ލިބިފައިވާ އާދަޔާ ހިލާފު ބޮޑު އާމްދަނީއާ ގުޅިގެން މީރާއަށް ދައްކަންޖެހޭ ޓެކުހުގެ އަދަދު ދަށްކުރުމުގެ ނިޔަތުގައި އެ އަހަރުގެ މާލީ ހިސާބުތަކުގައި 'ކޮސްޓް އޮފް ސޭލްސް' އަދި އިދާރީ ހަރަދުގެ ގޮތުގައި ސައްހަ ނޫން އަދަދުތަކެއް އުނިކޮށްފައި ވާކަން ވެސް ފާހަގަކުރެވިފައިވާ ކަމަށް މީރާގެ ބަޔާނުގައި ވަނީ ބުނެފަ އެވެ.
މީރާއިން ބުނީ އައިލެންޑް ހެލްތް ސޮލިއުޝަންސް ޕްރައިވެޓް ލިމިޓެޑް އިން 2020، 2021 އަދި 2022 ގައި މީރާއަށް ހުށަހަޅައިފައިވާ އިންކަމް ޓެކްސް ބަޔާންތަކުގައި 31.9 މިލިއަން ރުފިޔާގެ ޓެކްސް ނެގޭ އާމްދަނީ ހިމަނާފައިނުވާ ކަަމަށެވެ.
އަދި ޕައިނިއާ މޯލްޑިވްސް ޕްރައިވެޓް ލިމިޓެޑްގެ ފަރާތުން 2020 އަދި 2021 އަށް ހުށަހަޅައިފައިވާ އިންކަމް ޓެކްސް ބަޔާންތަކުގައި 102.7 މިލިއަން ރުފިޔާގެ ޓެކްސް ނެގޭ އާމްދަނީ ހިމަނަފައިނުވާކަން ފާހަގަކުރެވިފައިވާ ކަމަށެވެ.
މީރާ އިން ބުނީ މި ތަހުގީގާ ގުޅިގެން މީރާއިން ކުރިއަށް ގެންދިޔަ އޮޑިޓުތަކުގައި އައިލެންޑް ހެލްތް ސޮލިއުޝަންސް ޕްރައިވެޓް ލިމިޓެޑްގެ މައްޗަށް ޖުމުލަ 4.3 މިލިއަން ރުފިޔާ އަދި ޕައިނިއާ މޯލްޑިވްސް ޕްރައިވެޓް ލިމިޓެޑްގެ މައްޗަށް 23.7 މިލިއަން ރުފިޔާ އިތުރަށް ދައްކަންޖެހޭ ޓެކުހުގެ ގޮތުގައި ކަނޑައަޅައި އެ ޓެކްސް މީރާއަށް ދައްކަން އަންގާފައިވާ ކަމަށެވެ.
މި މައްސަލައިގައި މި ދެ ކުންފުނީގެ އިތުރުން، މައްސަލައިގައި އިސްކޮށް އުޅެފައިވާކަމަށް ފާހަގަކުރެވިފައިވާ، ދެ ކުންފުނީގެ ޑިރެކްޓަރެއްގެ ގޮތުގައި ހިމެނޭ ޑރ. އިކްލީލް ޝަރީފް، އަދި އައިލެންޑް ހެލްތް ސޮލިއުޝަންސް ޕްރައިވެޓް ލިމިޓެޑްގެ ޑިރެކްޓަރެއްކަމުގައިވާ ޑރ. އަލީ އަބްދުﷲ ލަތީފުގެ މައްޗަށް ދައުވާކޮށްދިނުމަށް އެދިފައިވާނެ ކަމަށް މީރާއިން ބުންޏެވެ.
މީގެ އިތުރުން އެނގިހުރެ ސައްހަނޫން މައުލޫމާތު ހިމެނޭ މާލީ ހިސާބު އަދި ޓެކްސް ބަޔާން ތައްޔާރުކޮށްދީފައިވާކަމުގެ ތުހުމަތުގައި މި މުއްދަތުތަކަށް މި ދެ ކުންފުނީގެ މާލީހިސާބާއި ޓެކްސް ބަޔާން ތައްޔާރުކޮށްދީފައިވާ، އަލީ ފަޔާޒްގެ މައްޗަށް ދައުވާ ކޮށްދިނުމަށް ވެސް މީރާއިން ވަނީ އެދިފަ އެވެ.
ޓެކްސް ނެގުމާ ބެހޭ އިދާރީ ގާނޫނުގެ 64 ވަނަ މާއްދާގެ ދަށުން ދައްކަންޖެހޭ ޓެކްސް ދެއްކުމަށް، އެނގިހުރެ، ގަސްދުގައި އެއްކިބާވުމުގެ ނިޔަތުގައި އެއްވެސް ކަމެއް ކުރުމަކީ ކުށެކެވެ. އަދި އެ ފަދަ ކުށެއް ކުރުމަށް ޓެކްސް ދައްކަންޖެހޭ މީހަކަށް އެހީތެރިވެދިނުމުގެ ނިޔަތުގައި އެއްވެސް ކަމެއް ކުރުމަކީ ވެސް ކުށެކެވެ.
