ގޯލްޑަން ފުޓްސަލް ޗެލެންޖް 2026 ގެ ގދ. އަތޮޅު ބުރުގެ ތަށި ޖެހިޖެހިގެން ފަސްވަނަ ފަހަރަށް ވާދޫން ކާމިޔާބުކޮށްފި އެވެ.
ރާއްޖޭގެ އެންމެ މަގުބޫލު ފުޓްސަލް މުބާރާތުގައި ވާދޫން މިވަނީ 2022 ވަނަ އަހަރުން ފެށިގެން މިއަހަރާ ހަމައަށް އަތޮޅު ޗެމްޕިއަންކަން އެހެން ޓީމަކަށް ދޫނުކޮށް ހިފަހައްޓާފަ އެވެ.
މިއަހަރުގެ ފައިނަލްގައި ވާދޫއާ ދެކޮޅަށް ނުކުތީ އަލަށް ފައިނަލުން ޖާގަ ހޯދި ހޯޑެއްދޫ އެވެ. ފޯރިގަދަ ކުޅުމެއް ފެނިގެންދިޔަ މި މެޗު ވާދޫން ކާމިޔާބުކުރީ 6-4 ގެ ނަތީޖާއަކުންނެވެ. މެޗުގެ ކުރީކޮޅު ހޯޑެއްދޫން ދެ ލަނޑުގެ ލީޑެއް ނަގާފައިވަނިކޮށް، ވާދޫން ވަނީ ފަހަތުން އަރައި މެޗުގެ ކޮންޓްރޯލް ހޯދާފަ އެވެ.
ހޯޑެއްދޫގެ ލަނޑުތައް ކާމިޔާބުކޮށްދިނީ އިސްމާއީލް މަމްދޫހާއި މުހައްމަދު އިއުފާފް އަބްދުﷲ އެވެ. މީގެއިން ކޮންމެ ކުޅުންތެރިޔަކު ދެ ގޯލު ޖެހިއެވެ. ވާދޫ ޓީމަށް ލަނޑުތައް ޖަހައިދިނީ ދެ ގޯލު ކާމިޔާބުކުރި އަޔާޒް އަހުމަދު (އަޔާ) އާއި މުހައްމަދު ނާއިލްގެ އިތުރުން މުސައްނިފް މުހައްމަދު އަދި ޔަޒްދާން އިބްރާހީމެވެ.
ފައިނަލް މެޗުގެ އެންމެ މޮޅު ކުޅުންތެރިޔާގެ މަގާމު ވާދޫގެ އަޔާ ހޯދިއިރު، މުޅި އަތޮޅުގެ އެންމެ މޮޅު ކުޅުންތެރިޔާ އަދި އެންމެ ގިނަ ގޯލު ޖެހި ކުޅުންތެރިޔާގެ ޝަރަފު ލިބުނީ ވާދޫގެ މުސައްނިފަށެވެ.
