ދުނިޔެ އެންމެ ގަދަޔަށް ހޫނުވި ތިންވަނަ އަހަރަކީ 2025 ވަނަ އަހަރު ކަމުގައި ޔޫރަޕްގެ މޫސުމާބެހޭ މާހިރުން ބުނެފި އެވެ. 

ތަފާސް ހިސާބުތަކުން ދައްކާ ގޮތުގައި 2023 އިން 2025 އަށް ދުނިޔޭގެ އެވްރެޖް ފިނިހޫނުމިން ވަނީ ޕެރިސް އެއްބަސްވުމުގައި ކަނޑައަޅާފައިވާ 1.5 ޑިގްރީ ސެލްސިއަސް މިންގަނޑަށްވުރެ މަތިވެފަ އެވެ.

ޔޫރަޕްގެ މޫސުމާބެހޭ އިދާރާއިން ބުނާގޮތުގައި 2025 ވަނަ އަހަރު ދުނިޔޭގެ އެވްރެޖް ފިނިހޫނުމިން ކުރިއަށް ވުރެ 1.47 ޑިގްރީ ސެލްސިއަސް ވަނީ އިތުރުވެފަ އެވެ. އެގޮތުން ފާއިތުވި 11 އަހަރަކީ ތާރީހުގައިވެސް އެންމެ ހޫނު ގަދަވި އަހަރުތަކެވެ.

ދިރާސާތަކަށް ބަލާއިރު 2025 ވަނަ އަހަރު، 2024 ވަނަ އަހަރަށް ވުރެ 0.13 ޑިގްރީ ސެލްސިއަސް ހޫނުވެފައި ވާއިރު 2023 ވަނަ އަހަރަށް ވުރެ 0.01 ޑިގްރީ ސެލްސިއަސް ހޫނުވެފައިވެ އެވެ.

އިނގިރޭސިވިލާތުގެ މެޓް އޮފީހުން ވެސް ވަނީ 2025 ވަނަ އަހަރަކީ ތިން ވަނައަށް އެންމެ ހޫނުގަދަވި އަހަރު ކަމަށް ކަނޑައަޅާފަ އެވެ.

ތަޖުރިބާކާރުން ބުނާ ގޮތުގައި ދުނިޔޭގެ ފިނިހޫނުމިން ނުރައްކާތެރި ދަރަޖައަކަށް އިތުރުވަމުން ދަނީ އިންސާނުންގެ އަމަލުތަކުގެ ސަބަބުން ޖައްވުގައި ގްރީންހައުސް ގޭސްތައް އިތުރުވުމުންނެވެ.

ފާހަގަކޮށްލަންޖެހޭ ކަމަކީ 2015 ވަނަ އަހަރު ޕެރިސް އެއްބަސްވުމުގެ ދަށުން ގާތްގަނޑަކަށް 200 ގައުމަކުން ފިނިހޫނުމިން އިތުރުވުން 1.5 ޑިގްރީއަށްވުރެ މަތިނުވާނޭ ގޮތަކަށް ހެދުމަށް ވައުދުވި ނަމަވެސް، އެއަށް އަމަލު ނުކުރެވުމުގެ ސަބަބުން އެ އަމާޒަށް ދަތުރު ނުކުރެވި ދުނިޔެ ދަނީ ނުރައްކަލުގެ ތެރެއަށް ވެއްޓެމުންނެވެ.

އެމެރިކާއިން ވަނީ ޕެރިސް އެއްބަސްވުމުން ވަކިވެފަ އެވެ. އެއީ އެ އެއްބަސްވުމަށް އަމަލުކުރަން ފަށައިފިނަމަ، ދުނިޔެއަށް ހެޔޮ ބަދަލެއް އަޔަސް، އެމެރިކާގެ މަސްލަހަތަށް އެކަމުން ގެއްލުން ވެދާނެތީ އެވެ.