އެމެރިކާއަށް އެއްބާރުލުން ނުދީފި ނަމަ ވެނެޒުއެލާ އަށް ހަމަލާ ދޭނެ ކަމަށް ބުނެ ރައީސް ޓްރަމްޕް އިންޒާރު ދެއްވުމާއި ގުޅިގެން ކުރިމަތިވަމުންދާ ޕްރެޝަރުތަކާއި އެކު، އެމެރިކާ އަށް ތެޔޮ ދިނުމަށް ވެނެޒުއެލާގެ ސަރުކާރުން މަޝްވަރާ ފަށައިފިއެވެ. 

ވެނެޒުއެލާގެ ވަގުތީ ސަރުކާރުން ބުނީ ތެޔޮ ވިއްކުމުން ފެށިގެން ފުޅާ ދާއިރާއެއްގައި އެމެރިކާ އަށް އެއްބާރުލުން ދިނުމާއި ގުޅޭގޮތުން އެމެރިކާ ސަރުކާރާއި ވެނެޒުއެލާގެ ދައުލަތުގެ ތެޔޮ ކުންފުންޏާއި ދެމެދު ރަސްމީ މަޝްވަރާތައް ފަށާފައިވާ ކަމަށާއި، މުއާމަލާތްތައް ކުރިޔަށް ދަނީ ދެފަރާތަށް ވެސް ފައިދާ ވާނެ ގޮތަކަށެވެ. އަދި އެމެރިކާ އާއި އެކު މަޝްވަރާތައް ކުރަމުންދަނީ ވެނެޒުއެލާގެ މިނިވަންކަމަށް އަސަރު ނުކުރާ ގޮތަށް ކަމަށެވެ.

އިއްޔެ ވެނެޒުއެލާއިން ބުނީ ޓްރަމްޕް ޑިމާންޑްކުރިޔަސް ވެނެޒުއެލާއިން އެމެރިކާ އަށް ތެލެއް ނުދޭނެ ކަމަށެވެ. ނަމަވެސް ވެނެޒުއެލާގެ ރާގު ފަހުން ވަނީ ބަދަލުވެފައެވެ. އެ ގައުމުން ބުނީ އެމެރިކާއަށް ތެޔޮ ދޭނީ ވެނެޒުއެލާގެ ރައްޔިތުންގެ ފައިދާއަށެވެ.

ވެނެޒުއެލާއިން 30-50 މިލިއަން ފީފާގެ ތެޔޮ އެމެރިކާ އަށް ފޮނުވާނެ ކަމަށް ޓްރަމްޕް ވެސް އިއްޔެ ވިދާޅުވެފައި ވާއިރު ބައެއް ރިޕޯޓުތައް ބުނާ ގޮތުގައި ވެނެޒުއެލާގައި ތާށިވެފައި ހުރި 50 މިލިއަނެއްހާ ފީފާގެ ތެޔޮ އެމެރިކާ މެދުވެރިކޮށް ވިއްކާއިރު އެ ފައިސާއިން އެމެރިކާ އަށް ވެސް ބައެއް ލިބޭނެއެވެ. އެމެރިކާ ބޭނުންވަނީ ޑިސްކައުންޓް ރޭޓެކެވެ. އަދި އެ ތެޔޮ އެމެރިކާ އިން ވިއްކާނީ މާކެޓު ރޭޓުގައެވެ.

މި އަހަރުގެ 3 ވަނަ ދުވަހު އެމެރިކާގެ އަސްކަރީ އޮޕަރޭޝަނެއްގައި ވެނެޒުއެލާގެ ރައީސް ނިކޮލަސް މަދޫރޯ އަތުލައިގަނެ އެމެރިކާގައި ދައުވާ ކުރަމުންދަނީ ވެސް ވެނެޒުއެލާގެ ގުދުރަތީ މުއްސަނދިކަމަށް އެމެރިކާއިން ބާރު ފޯރުވުމަށް ކަމަށް ދިރާސާކުރާ ފަރާތްތަކުން ބުނެއެވެ. ނަމަވެސް އެމެރިކާ އިން ބުނަނީ މަދޫރޯ ހައްޔަރުކުރީ ޓެރަރިޒަމާއި މަސްތުވާތަކެތީގެ ޓްރެފިކިންގ މައްސަލަތަކާއި ގުޅިގެންނެވެ.

އެމެރިކާގެ ރައީސް ޓްރަމްޕް ތަކުރާރުކޮށް ވިދާޅުވަނީ، ވެނެޒުއެލާގެ ތެލުގެ ސިނާޢަތު މެނޭޖް ކުރާނީ އެމެރިކާއިންނެވެ.

އެމެރިކާ އާއި އެކު މަޝްވަރާތައް ކުރަމުންދާ ކަމަށް ވެނެޒުއެލާގެ ވަގުތީ ރައީސް ޑެލްސީ ރޮޑްރިގޭޒް ގެ ފަރާތުން ވެސް ކަށަވަރު ކޮށްދީފައިވާއިރު، އޭނާ ވިދާޅުވީ ބޭރުގެ ނުފޫޒެއް ވެނެޒުއެލާއަކަށް ނޯންނާނެ ކަމަށެވެ.