“ޓްރަމްޕް ކްލާސް” ގެ ނަމުން ނަންދީގެން އެމެރިކާގެ ކަނޑުގެ އަސްކަރިއްޔާ އަށް ހަނގުރާމަ މަތީގައި ބޭނުންކުރާ މަނަވަރުތަކުގެ އާ ފުލީޓެއް ނެރުމަށް ރާވާފައިވާކަން އެ ޤައުމުގެ ރައީސް ޑޮނަލްޑް ޓްރަމްޕް އިއްޔެ ވިދާޅުވެއްޖެއެވެ. ސަރުކާރު ހިންގާ އަރިސް ބޭފުޅުންނާއި މަޝްވަރާ ކުރައްވަމުން ޓްރަމްޕް ވިދާޅުވީ މި ކަނޑުގެ އަސްކަރީ މަނަވަރު ތަކަކީ “ގޯލްޑަން ފްލީޓް”ގެ ބައެއް ކަމަށެވެ.
އެމެރިކާގެ ނޭވީގައި މިހާރު ހިމެނޭ “ބާރކް ކްލާސް ޑިސްޓްރޯޔަރސް” އަކީ ގާތްގަނޑަކަށް ދިހަވަރަކަށްހާސް ޓަނެވެ. އެންމެ ފަހުން މި އަހަރު ބަނދެ ނިންމި މަނަވަރަކީ ވެސް ގާތްގަނޑަކަށް 3000 ޓަނެވެ.
އެމެރިކާގެ އަސްކަރިއްޔާ އާއި ގުޅުން ހުރި ރިޕޯޓްތަކަށް ބަލާއިރު، ޓްރަމްޕް ކްލާސް އުޅަނދުތައް ގާތްގަނޑަކަށް 30,000–40,000 ޓަނަށް އަރާނެއެވެ.
މީގެ އިތުރުން ޓްރަމްޕް ކުލާސް މަނަވަރު ޑިޒައިން ކުރާނީ ހައިޕަރސޮނިކް މިސައިލާއި، ލޭޒާ ހަތިޔާރާއި ޑްރޯން އާއި ނިއުކްލިއާ ހަތިޔާރު އެކުލެވޭ ކަނޑުން ފޮނުވާލާ ކްރޫޒް މިސައިލް ފަދަ އެންމެ ޒަމާނީ ހަތިޔާރު ސިސްޓަމްތައް ގެންގުޅެވޭނެ ގޮތަށެވެ.
ދުނިޔޭގެ ކަނޑުގެ އަސްކަރީ މަނަވަރުތަކުގެ ތެރެއިން މިވަގުތު ހައިޕަރސޮނިކް ކްރޫޒް މިސައިލް ޤަވާޢިދުން އޮޕަރޭޓް ކުރަނީ ރަޝިއާ އިން އެކަންޏެވެ. ޗައިނާ އިން ވެސް ކޮންމެވެސް ވަރަކަށް ގެންގުޅޭ ކަމަށް ރިޕޯޓުތައް ބުނެއެވެ. ނަ،ަވެސް ކަށަވަރު ނުވާއިރު، އެމެރިކާ އަދިވެސް އޮތީ މި ފަދަ މިސައިލްތައް ޓެސްޓު ކުރުމުގެ މަރުޙަލާގައެވެ. އިންޑިއާ، ފްރާންސް، އަދި އިނގިރޭސިވިލާތުން ދަނީ ހައިޕަރސޮނިކް ޓެކްނޮލޮޖީތައް ދިރާސާ ކުރަމުންނެވެ.
އެމެރިކާގެ ކަނޑުގެ އަސްކަރިއްޔާގައި މިހާރު އޮތީ 11 މަތިންދާބޯޓު އުފުލާ ބޯޓެވެ. ޓްރަމްޕް ކުލާސް ބޯޓުތައް ޑިޒައިން ކުރާއިރު މަތިންދާބޯޓު އުފުލުމަށް ޚާއްޞަ ޒޯނެއް ހިމަނާނެ ކަމެއް އަދި ޔަޤީން ނުވާއިރު، ކޮންގްރެސްގެ ރުހުން ލިބި މިކަން އެންމެ އަވަހަށް ވެސް ފެށޭނީ 2028-2030 ކަމަށް ބައެއް ރިޕޯޓުތައް ބުނެއެވެ.
