އެމެރިކާ އާއި ބުޅަނގުގެ އެދުމަށް، ޓެރަރިސްޓުންގެ މުދަލާއި ފައިސާތައް ހިފެހެއްޓުމަށްޓަކައި ޣިރާޤު ސަރުކާރުން ކުރި މަސައްކަތުގެ ތެރޭގައި، އެ ޤައުމުގައި ހުރި ލުބުނާނުގެ ޙިޒްބުالله އާއި ޔަމަނުގެ އަންޞާރުالله (ހޫޘީ) ޖަމާޢަތުގެ ފައިސާ އާއި މުދާތައް ފްރީޒް ކުރުމަށްޓަކައި ލިސްޓު ކޮށްފިއެވެ.

2024 ވަނަ އަހަރުން ފެށިގެން އެމެރިކާ އާއި ހުޅަނގުން ގެންދަނީ މި ދެޖަމާޢަތަށް ދަތިކުރުމަށް މަސައްކަތް ކުރަމުންނެވެ. ޞައްދާމް ޙުސައިން ދަންޖައްސައި އަވަހާރަ ކޮށްލުމަށް ފަހު ޣިރާޤުގެ ސަރުކާރު ހިންގަނީ އެމެރިކާ އާއި ހުޅަނގުގެ ވަރަށް ބޮޑު ރުހުމަކާއި އެކުގައެވެ.

ހޫޘީންނާއި ޙިޒްބުاللهގެ މުދަލާއި ފައިސާތައް ފްރީޒް ކުރުމަށްޓަކައި ޣިރާޤުގެ ކޮމިޓީ ފޯ ފްރީޒިން ޓެރަރިސްޓް ފަންޑްސް އިން ވަނީ އެ މީހުން އެކުލަވައިލި ލިސްޓަކަށް މި ދެޖަމާއަތުގެ ނަން ހިމަނާފައެވެ. އަދި އެއީ އަލްޤައިދާ އާއި ގުޅުން ހުރި ޖަމާޢަތްތައް ކަމަށް ބުނެ ގެޒެޓް ވެސް ކުރިއެވެ.

މިއާއި އެކު ޣިރާޤުގެ އެތެރޭގައި މަސްލަހަތު ގޯސްވެ، ލުބުނާނާއި ޔަމަނާއި އީރާނަސް ވަފާތެރި ޖަމާޢަތްތަކުން ޣިރާޤު ސަރުކާރަށް ޕްރެޝަރު ކުރުމުން ހުކުރު ދުވަހު ޣިރާޤުގެ ކެބިނެޓާއި މަރުކަޒީ ބޭންކުން ބުނީ ލިސްޓަށް ޙިޒްބުالله އާއި ހޫޘީން ލެވުނީ އޮޅުމަކުން ކަމަށެވެ.

ގެޒެޓް ކޮށްފައިވާ 24 ޖަމާޢަތުގެ ލިސްޓުން މިހާރު ވަނީ ޙިޒްބުالله އާއި ހޫޘީން އުނި ކޮށްފައެވެ.

ޣިރާޤުގައި ހޫޘީންނާއި ޙިޒްބުالله އާއި ގުޅުން ހުރި މިލިޝިއާތައް ޙަރަކާތްތެރިވާއިރު، ސައްދާމަށް ފަހު ޣިރާޤުގެ އެތެރޭގެ ކަންކަން ބެލެހެއްޓުމަށް އެންމެ ބޮޑު އެހީތެރިކަމެއް ފޯރުކޮށްދެނީ އެމެރިކާ އިންނެވެ. އައިއެސް އާއި ދެކޮޅަށް ޙަމަލާ ދީ ޖާސޫސީ މަޢުލޫމާތު ޣިރާޤަށް ފޯރުކޮށްދިނުމަށް ވެސް އެންމެ ބޮޑު ރޯލެއް އަދާ ކުރަނީ އެމެރިކާއިންނެވެ.