ރާއްޖޭގެ ބޮޑެތި ބިން ހިއްކުން އަވަސްކުރުމުގެ ގޮތުން ނިމިދިޔަ ހަފްތާގައި ރާއްޖެ ބަނދަރުކުރި ޑްރެޖަރާއެކު ހުޅުމާލޭގެ ފޭސް-3 ހިއްކުމުގެ މަޝްރޫއުގެ ދުވެލި ހަލުވި ކޮށްފި އެވެ.
ޑްރެޖަރު "ޕްރިންސް ދަ ނެދަލެންޑު" ރާއްޖެ އައިސްފައިވަނީ ނިމިދިޔަ ހަފްތާ އަންގާރަ ދުވަހުގަ އެވެ. ޑްރެޖަރު އައުމާއެކު އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ، އެ ޑްރެޖަރު އައުމުގެ ކުރިން ބިން ހިއްކަން ފަށާފައިވާ ޑްރެޖަރާއި މިހާރު މި ގެނެވުނު ޑްރެޖަރާއެކު ބިން ހިއްކައި ޑިސެމްބަރު މަހު އެ މަޝްރޫއު އެއްކޮށް ނިންމާލެވޭނެ ކަމަށެވެ.
ފޭސް-3 މިހާތަނަށް ހިއްކިފައިވާ ސަރަހައްދު---ފޮޓޯ: އެޗްޑީސީ
ރައީސް ވަނީ ފޭސް-3 ހިއްކުމުގެ މަސައްކަތް ކުރިއަށްދާއިރު އެތަނުގެ ފޮޓޯ އެކްސްގައި ޕޯސްކޮށްފަ އެވެ.
ފޭސް-3 ހިއްކުމުގެ މަޝްރޫއު ކުރިއަށްދާއިރު ގިރާވަރު ފަޅުގެ އީއައިއޭ އާއި ފުރިހަމަ ކުރަންޖެހޭ އެހެން ކަންތައްތައް ފުރިހަމަވުމުން ބަންޑު ވޯލއ ޖެހުމުގެ މަސައްކަތް ކުރިއަށްދާނެ ކަމަށެވެ. އަދި ފޭސް-3 ހިއްކައި ނިމުމުން އެ ދެ ޑްރެޖަރު ގިރާވަރުފަޅު ހިއްކަން ފަށައި އަންނަ އަހަރު މާޗު މަސްތެރޭ އެއްކޮށް ނިންމާނެ ކަމަށް ވެސް ރައީސް ވިދާޅުވި އެވެ.
ރަސްމާލެ ހިއްކުމުގެ ދުވެލި ވެސް އަވަސްކޮށްފައިވާއިރު އެ ފަޅު ހިއްކުމަށްޓަކައި އިތުރު ޑްރެޖަރެއް ގެނެސް ހިއްކުމުގެ ދުވެލި ތިން ގުނަ އަވަސްކުރައްވާނެ ކަމަށް ރައީސް ވަނީ ވިދާޅުވެފަ އެވެ. އެގޮތުން މި ފެށޭ މަހުގެ ކުރީކޮޅު ބޮޑު ޑްރެޖަރެއް ގެނެސް އަންނަ އަހަރު އޭޕްރީލް މަހު ރަސްމާލެ އެއްކޮށް ހިއްކައި ނިންމާނެ ކަމަށް ރައީސް ވިދާޅުވި އެވެ.
އަދި މީގެ އިތުރުން އުތުރުތިލަފަން 150 ހެކްޓަރުގެ ބިން ހިއްކައި ގޯއްޗާއި ފުލެޓް ދޭން ވެސް ރައީސް ވަނީ ނިންމަވާފަ އެވެ.
މި ހަތަރު ތަން ވެސް ހިއްކުމުގެ ބޭނުމަކީ ނިމިދިޔަ ސަރުކާރުން ބިން ނުހިއްކައި ދީފައި ތިބި ގޯތި ދިނުމަށާއި މި ސަރުކާރުން ރައްޔިތުންނަށް ވެފައިވާ ބޯހިޔާވަހިކަމުގެ ވައުދު ފުއްދުމުގެ ބޭނުމުގައި މާލެ ސަރަހައްދުގައި ހިއްކާ ބިންތަކެކެވެ. އެގޮތުން އަންނަ އޭޕްރީލް މަހުގައި ރަސްމާލެ އިން 15،000 ގޯތި ދިނުމަށް ނިންމާފައިވާއިރު 3،000 ހައުސިން ޔުނިޓު އެޅުމަށް ބޭނުންވާ ބިން ވަނީ ބީއެމްއެލްއާ ހަވާލުކޮށްފަ އެވެ. މުޅި ޖުމްލަ 7،500 ހައުސިން ޔުނިޓް މާލެ ސިޓީގައި އެޅުމަކީ ރައީސްގެ ވައުދެކެވެ.
