ހުޅުމާލޭގައި އިމާރާތް ކުރާ ދާރުއްސަލާމް ވަގްފް އިމާރާތުގެ ބިންގާ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އަޅުއްވައިދެއްވައިފިއެވެ.

ހުޅުމާލޭ ޕްލޮޓް ނަންބަރު 11646 ގައި އިމާރާތްކުރާ މި ވްގްފް އިމާރާތް އަޅާ ތަނަކީ 20،000 އަކަފޫޓުގެ ބޮޑު ސަރަހައްދެކެވެ. 12 ފަންގިފިލާއަށް ތަރައްގީ ކުރާ މި އިމާރާތަކީ ޖުމްލަ 244.5 މިލިއަން ރުފިޔާގެ މަޝްރޫއެކެވެ. މި މަސައްކަތް ހަވާލުކޮށްފައިވަނީ އާރްސީސީއާ އެވެ.

ދެ އަހަރު ދުވަހުގެ މުއްދަތަކަށް ނިންމުމަށް ހަވާލުކުރި މި މަޝްރޫއަކީ ރާއްޖޭގައި ގާއިމްކުރަން ފަށާފައިވާ ދެ ވަނަ ވަގުފް އިމާރާތެވެ. މާލޭގައި އިމާރާތްކުރާ ދާރުލް އަރްގަމްގެ ބިންގާ އަޅުއްވާފައިވަނީ މި މަހުގެ 20 ވަނަ ދުވަހުގަ އެވެ.

ރާއްޖޭގެ އެކި ހިސާބުތަކުގައި މިފަދަ ވަގުފް އިމާރާތްތައް އެޅުމަކީ ސަރުކާރުގެ ވައުދެކެވެ. އެގޮތުން އާބާދީ ބޮޑެތި ސަރަހައްދުތައް ކަމަށްވާ އައްޑޫ ސިޓީ، ފުއްވައްމުލައް ސިޓީ، ހުވަދު އަތޮޅު އަދި ތިލަދުންމަތީގައި ވެސް ވްގުފު އިމާރާތްތައް އެޅުމަށް ވަނީ ހަމަޖެހިފަ އެވެ.

ވަގުފް އިމާރާތްތަކުން ލިބޭ އާމްދަނީ ހަރަދުކުރުމަށް ހަމަޖެހިފައިވަނީ އިސްލާމީ ވަހްދަތު އިތުރުކުރުމަށް ރާއްޖޭގެ އެކި ކަންކޮޅުތަކުގައި ކުރިއަށް ގެންދާ އަދި ކުރިއަށް ގެންދަން ހަމަޖެހިފައިވާ ތަފާތު މަސައްކަތްތަކަށެވެ.

ހުޅުމާލޭގައި އިމާރާތްކުރާ ވަގްފު އިމާރާތުގެ ބިންގާ އެޅުމުގެ ރަސްމިއްޔާތުގައި އިސްލާމިކް މިނިސްޓަރު ޝަހީމާއި ދައުލަތުގެ އިސްވެރިން ވަނީ ބައިވެރިވެވަޑައިގެންފަ އެވެ.