ސައުދީ އަރަބިއްޔާ އިން ވަރަށް އަވަހަށް އިސްރާއީލާއި ރަސްމީކޮށް ގުޅޭނެ ކަމަށާއި، އަބްރަހަމް އެކޯޑްސްގައި ސޮއި ވެސް ކުރާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ ކަމަށް ރިޕޯޓުތައް ބުނެފިއެވެ.
އަބްރަހަމް އެކޯޑްސް އަކީ އިސްރާއީލާއި ޢަރަބި ޤައުމުތަކާއި ދެމެދު ޞުލްޙަވެރިކަމާއި އެކު އެއްމޭޒެއްގައި އެކުވެރިކަމުގެ ގުޅުން ނުވަތަ ޑިޕްލޮމެޓިކް ގުޅުން ބޭއްވުމަށް އެކުލަވައިލި އެއްބަސްވުމެކެވެ. މި އެއްބަސްވުމުގެ ދަށުން އިސްރާއީލާއި އެކު ފުރަތަމަ ބައިޢަތު ހިފީ ޔުނައިޓެޑް ޢަރަބި އެމިރޭޓްސް އާއި ބަހްރެއިނެވެ. އެއީ 15 ސެޕްޓެމްބަރ 2020 ގައެވެ.
އޭގެފަހުން ދެން އިސްރާއީލާއި ގުޅުނީ މޮރޮކޯއެވެ. އެއީ 22 ޑިސެމްބަރު 2020ގައެވެ.
Advertisement
ސޫދާނުން ވެސް ވަނީ އިސްރާއީލާއި ގުޅުން ބޭއްވުމަށް އަބްރަހަމް ޑެކްލަރޭޝަންގައި ސޮއި ކޮށްފައެވެ. ނަމަވެސް ރަސްމީ ހުރިހާ އިޖުރާޢަތްތަކެއް ފުރިހަމަކޮށް އަބްރަހަމް އެކޯޑްސްގައި ސޫދާނުން އަދި ސޮއި ނުކުރިޔަސް، ސޫދާނުން ވެސް ވަނީ އިސްރާއީލަކީ އެކުވެރިއެއް ކަމަށް ބަލައިގެންފައެވެ. އެއީ 2021 ވަނަ އަހަރުގެ ޖެނުއަރީގައެވެ.
ސައޫދީން އިސްރާއީލާއި ރަސްމީ ގުޅުން ބޭއްވުމަށް އެއްބަސްވެއްޖެ ނަމަ، ޔަހޫދީ ދައުލަތާއި ރަސްމީ ގާތް އެކުވެރިކަން ބާއްވާ ޢަރަބި ޤައުމުތަކުގެ ޢަދަދު 6 އަށް އަރާނެއެވެ. ސޫދާނުން ރަސްމީކޮށް ގުޅިފައި ނުވާއިރު، އިސްރާއީލުގެ މިތުރުންގެ ގޮތުގައި މިހާރު އެ ލިސްޓުގައި ވަނީ މިޞްރު، ޖޯޑަން، ޔޫއޭއީ، ބަހްރައިން އަދި މޮރޮކޯއެވެ.
