ފަސޭހަކަމާއެކު އެލްޗޭ އަތުން ބާސެލޯނާ މޮޅުވެއްޖެ

އައިޝަތު އީމާން | 28 ދުވަސް ކުރިން - 2 ނޮވެންބަރު 2025 00:39
ލަމިން ޔަމާލް މިރޭގެ މެޗުގައި - ފޮޓޯ: ބާސެލޯނާ
ލަމިން ޔަމާލް މިރޭގެ މެޗުގައި - ފޮޓޯ: ބާސެލޯނާ
ޚުލާސާ

މި މޮޅާއެކު އެކުލަބުން މިވަނީ ދެވަނަ މަގާމު ދަމަހައްޓާފައި. ބާސާއަށް ގޯލުތައް ޖަހާފައިވަނީ ޔަމާލް، ފެރަން ޓޮރޭޒް އަދި ރަޝްފޯޑު. އެލްޗޭގެ ގޯލު ޖެހީ ރަފާ މިރް.

ސްޕެނިޝް ލަލީގާގައި އެލްޗޭ 1-3 ގެ ނަތީޖާއިން ބަލިކޮށް ބާސެލޯނާ ތާވަލުގެ ދެވަނަ މަގާމު ދަމަހައްޓައިފި އެވެ.

އަމިއްލަ ދަނޑުގައި ކުޅުނު މި މެޗުގެ ފުރަތަމަ ގޯލު މެޗުގެ ކުރީކޮޅު ނުވަ ވަނަ މިނެޓުގައި ޖަހައިދިނީ ޒުވާން ހުނަރުވެރި ކުޅުންތެރިޔާ ލަމިން ޔަމާލެވެ.މި ގޯލު އޭނާ ޖަހާފައިވަނީ ބަލްޑޭ ތަނަވަސްކޮށްދިން ފުރުސަތަކުންނެވެ. އޭގެ ދެ މިނެޓު ފަހުން ފެރަން ޓޮރޭޒް ވަނީ ބާސެލޯނާގެ ދެވަނަ ގޯލު ކާމިޔާބުކޮށްފަ އެވެ. މި ގޯލު އޭނާ ޖަހާފައިވަނީ ފާމިން ލޮޕޭޒް ތަނަވަސްކޮށްދިން ފުރުސަތަކުންނެވެ.

ބާސެލޯނާގެ ތިން ވަނަ ގޯލު 61 ވަނަ މިނެޓުގައި ޖަހާފައިވަނީ ރަޝްފޯޑެވެ. މި ގޯލުވެސް ޖަހަން އެހީވީ ފާމިން ލޮޕޭޒް އެވެ. އެލްޗޭގެ ހަމައެކަނި ގޯލު 42 ވަނަ މިނެޓުގައި ކާމިޔާބުކުރީ ރަފާ މިރް އެވެ. އަލްވާރޯ ނުނޭޒް ތަނަވަސްކޮށްދިން ފުރުސަތަކުން އޭނާ މި ގޯލު ޖަހާފައިވަނީ ކައުންޓާ އެޓޭކުގަ އެވެ.

މި މޮޅާއެކު ބާސެލޯނާ ދެވަނައިގައި އޮތީ ތާވަލުގެ އެއްވަނައިގައި އޮތް ރިއަލް މެޑްރިޑަށް ވުރެ ފަސް ޕޮއިންޓް މަދުން 25 ޕޮއިންޓް ހީދައިގެންނެވެ. ތިން ވަނައިގައި 23 ޕޮއިންޓާއެކު ވިލަރެޔާލް އޮތްއިރު ހަތަރު ވަނައިގައި 22 ޕޮއިންޓާއެކު އޮތީ އެތްލެޓިކޯ މެޑްރިޑެވެ

ޗެމްޕިއަންސް ލީގުގައި މި ހަފްތާގައި ބާސެލޯނާ ނިކުންނާނީ ބެލްޖިއަމް ގެ ބުރޫޖްއާ ދެކޮޅަށެވެ. އެ ލީގުގައި ބާސެލޯނާ ނުވަ އޮތީ ކުޅުނު ތިން މެޗުން ހަ ޕޮއިންޓް ހޯދައިގެންނެވެ.

TelegramTwitterYoutubeTiktokViberFacebookInstagram

0 ރިއެކްޝަންސް / 0 ކޮމެންޓް

0%
0%
0%
0%
0%