އިނގިރޭސީ ޕްރިމިއާ ލީގިގައި އާސެނަލް އަދި ޗެލްސީ މޮޅުވިއިރު މެންޗެސްޓާ ޔުނައިޓެޑު ޕޮއިންޓަކުން ފުއްދާލަން ޖެހިއްޖެ އެވެ.
ރަށުން ބޭރުގައި ނޮޓިންހަމް ފޮރެސްޓާ ބައްދަލުކޮށް ޔުނައިޓެޑް އެއްވަރުވި މެޗުގެ ފުރަތަމަ ގޯލު ޖަހާ ލީޑު ނެގީ ޔުނައިޓެޑުންނެވެ. މެޗުގެ 34 ވަނަ މިނެޓުގައު ބްރޫނޯ ފެނާންޑެސް ނަގައިދިން ކޯނަރެއް ބޮލުން ޖަހައި މި ގޯލު ވައްދާލީ ކަސެމީރޯ އެވެ.
ދެވަނަ ހާފުގައި 48 ވަނަ މިނެޓު ނޮޓިންހަމްގެ ފުރަތަމަ ގޯލު ޖަހައިދިނީ ގިބްސް ވައިޓް އެވެ. އޭނާ މި ގޯލު ޖެހީ ރަޔާން ޔަޓޭސް ނަގައިދިން ކްރޮހަކުން ބޮލުން ޖަހައިގެންނެވެ. އަދި އޭގެ ދެ މިނެޓު ފަހުން ނިކޯލޯ ސަވޯނާ ވަނީ ނޮޓިންހަމް އަށް ލީޑު ނަގައިދީފައެވެ. ނަމަވެސް މެޗުގެ 81 ވަނަ މިނެޓުގައި ޔުނައިޓެޑުގެ އަމަދު ޑިއާލޯ ވަނީ އޭރިއާ ބޭރުން ހަމަލާއެއް ފޮނުވާލާ ގޯލަށް ވައްދާލައިގެން ނަތީޖާ ހަމަހަކޮށްފަ އެވެ.
ލީގުގެ ފޭވަރިޓުންގެ ގޮތުގައި ބެލެވޭ އާސެނަލް މިރޭ މޮޅުވެފައިވަނީ ރަށުން ބޭރުގައި ބާންލީއާ ދެކޮޅަށް ކުޅެގެންނެވެ. މެޗުގެ ދެ ގޯލުވެސް އާސެނަލް އިން ޖަހާފައިވަނީ ފުރަތަމަ ހާފުގަ އެވެ. 14 ވަނަ މިނެޓުގައި މަގަޅެސްގެ އެހީތެރިކަމާއެކު ގިއޯކަރެސް ފުރަތަމަ ގޯލު ޖެހި އިރު، 35 ވަނަ މިނެޓުގައި ޑެކްލަން ރައިސް ގޯލު ޖަހައިފައިވަނީ ޓްރޮސާޑް ނަގައިދިން ކްރޮހެއް ބޮލުން ގޯލަށް ވައްދާލައިގެންނެވެ. މި މޮޅާއެކު އާސެނަލް އަށް މިވަނީ 25 ޕޮއިންޓް ލިބިފަ އެވެ. އެ ކުލަބު އެއްވަނައިގައި އޮތީ ދެވަނައިގައި އޮތް ބޯންމައުތް އަށް ވުރެ ހަތް ޕޮއިންޓް އިތުރަށް ހޯދައިގެންނެވެ. ނަމަވެސް މާދަަމާ ރޭ ކުޅޭ މެޗުތަކަށް ފަހު ޕޮއިންޓް ޓޭބަލަށް ބަދަލުތަކެއް އަންނާނެ އެވެ.
ޓޮޓެންހަމާ ވާދަކޮށް ރަށުން ބޭރުގައި ޗެލްސީ މޮޅުވި މެޗުގެ ހަމައެކަނި ގޯލު 34 ވަނަ މިނެޓުގައި ކާމިޔާބުކުރީ ޖާއޯ ޕެޑްރޯ އެވެ. އޭނާ މި ގޯލު ޖެހީ މޮއިސެސް ކައިސޭޑޯ ތަނަވަސްކޮށްދިން ފުރުސަތަކުންނެވެ. މޮ މޮޅާއެކު ޗެލްސީ މިވަނީ ވަގުތީ ގޮތުން ތާވަލުގެ ހަތަރު ވަނައަށް ޖެހިލާފައެވެ.
ޕްރިމިއަރ ލީގުގައި މިރޭ ކުޅުނު އެހެން މެޗުތަކުގެ ނަތީޖާތައް؛
- ބްރައިޓަން 3-0 ލީޑްސް ޔުނައިޓެޑް
- ކްރިސްޓަލް ޕެލެސް 2-0 ބްރެންޓްފޯޑް
- ފުލަމް 3-0 ވުލްވްސް
މިރޭ ދަންވަރު ލިވަޕޫލް އާއި އެސްޓަން ވިލާ ބައްދަލުކުރާ މެޗު ފަށާނީ 01:00 ޖަހާއިރު އެވެ. ލިވަޕޫލްގެ ފަރާތުން މި ފަހަކަށް އައިސް ދަށް ނަތީޖާތަކެއް ފެނިގެންދާއިރު މި ހަފްތާގައި ކްރިސްޓަލް ޕެލެސް އަތުން 0-3 އިން ބަލިވެ އެ ޓީމު ވަނީ އެފްއޭ ކަޕުން ކަޓައިފަ އެވެ.
ވެސްޓް ހޭމް ޔުނައިޓެޑާއި ނިއުކާސަލް ޔުނައިޓެޑް ބައްދަލުކުރާ މެޗު އޮންނާނީ މާދަމާ ރޭ 19:00 ގަ އެވެ. އަދި މެންޗެސްޓާ ސިޓީ އާއި ބޯންމައުތް ކުޅޭ މެޗު މާދަމާ ރޭ 21:30 ގައި ފަށާއިރު ސަންދަލެންޑާއި އެވަޓަން ބައްދަލުކުރާ މެޗު ފަށާނީ މާދަމާ ރޭ 01:00 ގަ އެވެ.
