ދެއަހަރުވަންދެން ޣައްޒާގައި ޒައެނިސްޓުން ހިންގި ޤަތުލުޢާންމު ހުއްޓާލުމަށްފަހު، އެ ސަރަޙައްދުގައި ޞުލްޙަ ޤާއިމް ކުރުމަށް އެމެރިކާގެ ރައީސް ޑޮނަލްޑް ޓްރަމްޕް ހުށަހެޅުއްވި ޕްލޭނުގައިވާ ބައިނަލްއަޤްވާމީ ފައުޖުގައި ތުރްކީވިލާތުގެ ސިފައިން ނުހިމެނުމަށް އިސްރާއީލުން އެމެރިކާއަށް އަންގައިފިއެވެ.
ހުސްވިހަފްތާގައި ތުރްކިޔޭއިން ވަނީ ޙަމާސް އާއި ޔަހޫދީންނާ ދެމެދު ހެދި އެއްބަސްވުން ތަންފީޛުކުރާކަން ކަށަވަރުކުރުމުގެ ގޮތުން އެ ސަހަރަށް ފޮނުވާ ބައިނަލްއަޤްވާމީ ފައުޖުގައި އެ ޤައުމުން ބައިވެރިވާން ބޭނުންވާ ކަމަށް ބުނެފައެވެ. އަދި އެމެރިކާ އިން ވެސް ވަނީ ޣައްޒާ އާއި އިސްރާއީލާއި ދެމެދު ކަންކަން ހިނގާ ގޮތް މޮނިޓަރ ކުރުމަށް ޙަރަކާތްތެރިވާ ބައިނަލްއަޤްވާމީ ފައުޖުގައި ތުރްކިޔޭ ހިމެނޭނެ ކަމަށް އިސްރާއީލަށް އަންގާފައެވެ. އެހެންނަމަވެސް އިސްރާއީލުން އެކަމަށް ދެކޮޅުހެދުމުން ޓަރްމްޕް ވަނީ، “ބައިނަލްއަޤްވާމީ ޓީމުގައި އިސްރާއީލް ނުރުހޭ ބަޔަކު ނުތިބޭނެ” ކަމަށް ވިދާޅުވެފައެވެ.
އެހެންކަމުން އިސްރާއީލާއި ޙަމާސް އާއި ދެމެދު ކަންކަން ހިނގަނީ އެއްބަސްވެވިފައިވާ ގޮތަށް ތޯ މޮނިޓަރ ކުރުމަށް ތުރްކިޔޭގެ ސަރުކާރަށް ފުރުޞަތު ނުލިބިދާނެ ކަމަށް ބެލެވެއެވެ.
ތުރްކީވިލާތުން އިސްރާއީލަށް ގިނަ ޢަދަދަކަށް ދަގަނޑާއި ވެހިކަލްތައް ގެންދެއެވެ. ނަމަވެސް ޣައްޒާ ހަނގުރާމަ އާއި ގުޅިގެން ތުރްކިޔޭއިން ވަނީ އިސްރާއީލާއި ހުރިހާ ގޮތަކުން ވެސް ގުޅުން ކަނޑާލާފައެވެ. ތުރްކިޔޭއިން ބުނީ ޔަހޫދީންނަކަށް ތުރްކިޔޭ ސަރުކާރުގެ ކުރިމަތީގައި ވައްވަކެއް ނުޖެހޭނެ ކަމަށެވެ. އެއާއި އެކު ދެން ފެނިގެން ދިޔައީ އިސްރާއީލުގެ ކުންފުނިތަކާއި އެކު ހަދާފައިވާ ހުރިހާ އެއްބަސްވުންތައް އިތުރު ފުރުޞަތެއް ވެސް ނުދީ ތުރްކިޔޭއިން ވަގުތުން ބާޠިލްކޮށް، އިސްރާއީލުގެ ބޯޓުފަހަރަށް ވެސް ތުރްކިޔޭ އަށް ވަނުން މަނާނުރިތަނެވެ. އަދި ތުރްކިޔޭގެ މުދާތައް އިސްރާއީލަށް ވިއްކުން ވެސް މަނާކުރިއެވެ. ނަތީޖާ އަކީ އިސްރާއީލުގެ ބައެއް ކުންފުނިތައް ބޭންކްރަޕްޓް ވުމެވެ.
