ލ. އަތޮޅުގެ ހުރިހާ ރަށެއްގައި ބޭންކް އޮފް މޯލްޑިވްސް (ބީއެމްއެލް)ގެ އޭޓީއެމް ގާއިމުކޮށް ހިދުމަތްދޭން ފަށައިފި އެވެ.
ލ. އަތޮޅުގެ ހުރިހާ ރަށެއްގައި ބީއެމްއެލްގެ އޭޓީއެމްގެ ހިދުމަތް ދޭންފަށާފައި މިވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ލ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިންނެވެ. ލ އަތޮޅުގެ މީހުން ދިރިއުޅޭ ރަށްރަށުގައި އޭޓީއެމްގެ ހިދުމަތް ގާއިމުކުރެވިގެން ދިއުމާއެކު ރާއްޖޭގެ 19 އަތޮޅެއްގެ މީހުން ދިރިއުޅޭ ހުރިހާ ރަށެއްގައި އޓީއެމްގެ ހިދުމަތް މިވަނީ ގާއިމުކުރެވިގެން ގޮސްފަ އެވެ.
އެހެންކަމުން މިހާރު ބީއެމްއެލް އޭޓީއެމްގެ ހިދުމަތް ނުލިބެނީ އައްޑޫ ސިޓީގެ މީހުން ދިރިއުޅޭ ދެ ރަށުން އެކަންޏެވެ. ބީއެމްއެލްގެ އަމާޒަކީ މިމަހުގެތެރޭ އެ ދެ ރަށްރަށުގައިވެސް މި ހިދުމަތް ގާއިމްކޮށް މުޅި ރާއްޖެއަށް އޭޓީއެމްގެ ހިދުމަތް ފުޅާކުރުމެވެ.
ރާއްޖޭގެ މީހުން ދިރިއުޅޭ ހުރިހާ ރަށެއްގައި ބީއެމްއެލް އޭޓީއެމް މަޝްރޫއުގެ ދަށުން މި އަހަރު 103 ރަށެއްގައި ބީއެމްއެލްއިން މިހާރު މިވަނީ އޭޓީއެމް ހިދުމަތް ގާއިމްކޮށްފަ އެވެ.
ރާއްޖޭގެ މީހުން ދިރިއުޅޭ ހުރިހާ ރަށެއްގައި ބީއެމްއެލް އޭޓީއެމް ގާއިމުކުރެއްވުމަކީ ރައީސް ޑރ. މުއިއްޒުގެ ވައުދުފުޅެކެވެ.
