ފުރާންސް ލީގުގައި އެންމެ ފަހުގެ ޔޫރަޕް ޗެމްޕިއަން ޕީއެސްޖީ އަތުން ރަށުން ބޭރުގައި 3-3 އިން އެއްވަރުކޮށް ސްޓްރަޒްބާގަށް ޕޮއިންޓެއް ލިބިއްޖެ އެވެ.
މި މެޗުގައި ފުރަތަމަ ގޯލު ޖަހާފައިވަނީ ޕީއެސްޖީ އިންނެވެ. މެޗުގެ ހަ ވަނަ މިނެޓުގައި ޖަހާފައިވަނީ ބަރކޯލާ އެވެ. އޭނާ މި ގޯލު ޖެހީ ޑުއޯރ އަށް ވަން-ޓޫ ހަދައިގެންނެވެ. މެޗުގެ 26 ވަނަ މިނެޓުގައި ސްޓްރަޒްބާގް ވަނީ ގޯލެއް ޖަހައި ނަތީޖާ ހަމަހަމަ ކޮށްފައެވެ. ގުއޭލާ ޑުއޭރ ނަގައިދިން ކްރޮހަކުން މި ގޯލު ޖަހާފައިވަނީ ފޯވާޑު، ޖޯކުއިން ޕަނިޗެއްލީ އެވެ. ފުރަތަމަ ހާފު ނިމެން ހަތަރު މިނެޓަށް ވެފައިވަނިކޮށް ސާލްޒްބާގް އިން ވަނީ މެޗުގެ ލީޑު ނަގާފަ އެވެ. ޕީއެސްޖީ ގެ ޑިފެންސް ލައިނުން ހެދި ގޯސްތަކެއްގެ ބޭނުން ހިފައި މި ގޯލު ޖަހާފައިވަނީ 41 ވަނަ މިނެޓުގައި ވެލެންޓިން ބާކޯގެ އެހީތެރިކަމާއެކު ޑިއޭގޯ މޮރެއިރާ އެވެ.
މި މެޗުގައި ދެ ޓީމުގެ ފަރާތުން ވެސް ގިނަ ހަމަލާތަކެއް ވަނީ ގޯލަށް ފޮނުވާލާފަ އެވެ. ދެ ވަނަ ހާފު ފަށައިގެން 49 ވަނަ މިނެޓުގައި ޕަނިޗެއްލީ ވަނީ އިތުރު ގޯލެއް ޖަހައި އެންމެ ފަހުގެ ޗެމްޕިއަން ހާސްކޮށްލާފަ އެވެ. މޮރެއިރާ ތަނަވަސްކޮށްދިން ފުރުސަތަކުން މި ގޯލު ޖަހައިދިނީ ސްޓްރަޒްބާގްގެ ފުރަތަމަ ގޯލު ވެސް ޖެހި ފަނިޗެއްލާ އެވެ.
މެޗުގެ 56 ވަނަ މިނެޓުގައި ސްޓްރަޒްބާގުގެ ކީޕަރު، ޑުއޭރ އަށް އޭރިއާ ތެރެއުން ކުލި ފައުލަކާ ގުޅިގެން ޕީއެސްޖީ އަށް ޕެނަލްޓީއެއް ލިބުނެވެ. މި ޕެނަލްޓީ ގޯލަށް ވައްދާލާފައިވަނީ ގޮންޒާލޯ ރާމޮސް އެވެ. އަދި ޕީއެސްޖީ އަށް ނަތީޖާ ހަމަހަމަކޮށްދިނީ 79 ވަނަ މިނެޓުގައި މަޔޫލޫ އެވެ. އޭނާ ގޯލަށް ޖެހި ފުރަތަމަ ޝޮޓު ކީޕަރު މަތަކޮށް ރީބައުންސަށް ނުކުތުމުން ގޯލަށް ވައްދާލާފައިވަނީ ބޮލުންނެވެ.
މި ދެ ޓީމު އެންމެ ފަހުން ވާދަކުރި މެޗު 1-2 އިން ކާމިޔާބުކޮށްފައިވަނީ ސްޓްރަޒްބާގް އިންނެވެ. އެއީ މިއަހަރު މެއި މަހު ލީގުގަ އެވެ.
ތާވަލުގެ އެއްވަނައިގައި ޕީއެސްޖީ 17 ޕޮއިންޓާއެކު އޮތްއިރު ސްޓްރާޒްބާގް ދެވަނައިގައި އޮތީ 16 ޕޮއިންޓާއެކު އެވެ. ތިން ވަނައިގައި އޮތް މާސޭ އަށާއި ހަތަރު ވަނައިގައި އޮތް ލިއްލޭ އަށް މިރޭގެ މެޗުން މޮޅުވެ ތާވަލުގެ އެއްވަނައަށް ޖެހިލުމުގެ ފުރުސަތު އެބަ އޮތެވެ. މި ދެ ދެޓީމަށް ވެސް ލިބިފައިވަނީ 15 ޕޮއިންޓެވެ. ނަމަވެސް ގޯލުގެ ތަފާތުން ކުރީގައި އޮތީ މާސޭ އެވެ.
