ދުނިޔޭގައި މިހާތަނަށް އުފެދުނު އެންމެ މޮޅު ދެ ކުޅުންތެރިން ކަމަށްވާ ޕޯޗުގަލްގެ ކްރިސްޓިއާނޯ ރޮނާލްޑޯ އާއި ލިއޮނެލް މެސީގެ ފަހަތުގައި އަދިވެސް އެންމެ ގިނައިން ހެޓް-ޓްރިކް ހެދި ކުޅުންތެރިއެއްގެ ގޮތުގައި އޮތީ ދިވެހިރާއްޖޭގެ އެންމެ ގިނަ ބަޔެއްގެ ލޯބި ހޯދާފައިވާ އަދި މި ފަސްގަނޑުގައި އެފަދަ ދެވަނަ ފުޓްބޯޅަ ކުޅުންތެރިއެއް ނުވާ އަލީ އަޝްފާގް (ދަނގަޑޭ) އެވެ.

ދުނިޔޭގެ އެންމެ މޮޅު ދެ ކުޅުންތެރިން ފަހަތުން މިފަދަ ރެކޯޑެއް ދިވެހި ގައުމަށް ލިބުމަކީ އާދައިގެ ކަމެއް ނޫނެވެ. މި ގަރުނުގެ އެންމެ ގިނަ ހެޓް-ޓްރިކް ހެދި ތިން ވަނަ ކުޅުންތެރިއެއްގެ ގޮތުގައި ދަނގަޑޭގެ ނަން ވިދާލާފައި މިވަނީ ޖުމްލަ 35 ހެޓް-ޓްރިކް ހަދައިގެންނެވެ. ލިސްޓުގެ އެއްވަނައިގައި ރޮނާލްޑޯ 57 ހެޓް-ޓްރިކާ އެކު އޮތްއިރު ދެވަނައިގައި މެސީ އޮތީ 54 ހެޓް-ޓްރިކް ހަދައިގެންނެވެ. ދަނގަޑޭގެ ފަހަތުގައި ހަތަރު ވަނައިގައި އޮތީ ލެވަންޑޮސްކީ އެވެ. އެއީ 33 ހެޓް-ޓްރިކް ހަދައިގެންނެވެ.

މި ލިސްޓުގައި ގިނައިން ތިބީ މުޅިންވެސް ޔޫރަޕުގައި ކުޅެފައި ތިބި ކުޅުންތެރިންނެވެ. އަވަސް މުސްތަގުބަލެއްގައި ދަނގަޑޭގެ ތިން ވަނަ އަތުލެވޭނެ ކަމަކަށް ނުބެލެވެ އެވެ. ސަބަބަކީ ހަތަރު ވަނައިގައި އޮތް ލެވަންޑޮސްކީ ވަރަށް އަވަހަށް ކުލަބު ފުޓްބޯޅައިން ރިޓަޔަރ ކުރާނެ ކަމަށް ބެލެވެ އެވެ. އުމުރުން 37 އަހަރުގެ ފޯވާޑު މިހާރު ވަނީ ގައުމީ ޓީމުން ރިޓަޔަރ ކޮށްފަ އެވެ. އަދި ފަސް ވަނައިގައި އޮތް ސުއަރޭޒް އަންނަ އަހަރުގެ ވޯލްޑް ކަޕަށް ފަހު ރިޓަޔަރ ކުރާނެކަން އޭނާ ވަނީ އިއުލާން ކޮށްފަ އެވެ. ސުއަރޭޒް ހަދާފައިވަނީ 30 ހެޓް-ޓްރިކެވެ.

ސައުތް އީސްޓް އޭޝިއާގައި އުފެދުނު އެންމެ މޮޅު އެއް ކުޅުންތެރިޔާ، ދަނގަޑޭ އަކީ ވަކި ފަރުދަކަށް ދިވެހީންގެ އެންމެ ބޮޑު ލޯތްބެއް ހޯދާފައިވާ ފަރާތެވެ. އޭނާ ވަނީ 2014 ވަނަ އަހަރު މި ރީޖަންގެ އެންމެ މޮޅު ކުޅުންތެރިޔާގެ މަގާމު ވެސް ހޯދާފަ އެވެ. އޭނާގެ ހުނަރާއި މޮޅު ކުޅުމުގެ ވާހަކަ އަދިވެސް ދިވެހިންގެ ދޫތަކުން ދައްކަ އެވެ. ދަނގަޑޭ ވަނީ ގައުމީ ޓީމަށް މުޅި ޖުމްލަ 98 މެޗު ކުޅެ 54 ގޯލު ޖަހާފަ އެވެ. އަދި ކުލަބު ކެރިއަރުގައި އޭނާ ވަނީ 461 މެޗަށް ވުރެ ގިނަ މެޗު ކުޅެ 417 ގޯލު ޖަހާފަ އެވެ.

2000 ގެ ކުރީކޮޅުގައި ދަނގަޑޭ އަށް ވަނީ ޔޫރަޕުގައި ޕޯޗުގަލްގެ ބެނެފީކާ އަށް ކުޅުމުގެ ފުރުސަތު ލިބިފަ އެވެ. ނަމަވެސް އަމިއްލަ ސަބަބުތަކާ ހުރެ ދަނގަޑޭ ވަނީ އެ ފުރުސަތު ނަގާލާފަ އެވެ. ނަމަވެސް 2007 ވަނަ އަހަރުގައި ދަނގަޑޭ ވަނީ ބުރުނާއީގެ ޑީޕީއެމްއެމް އަށް ކުޅެފަ އެވެ. އަދި 2014 ވަނަ އަހަރު އޭނާ ވަނީ މެލޭޝިއާގެ ޕީޑީއާރުއެމް އަށް ކުޅެފައެވެ. ދަނގަޑޭގެ ކެރިއަރުގައި އޭނާ ވަނީ މުޅި ޖުމްލަ 10 ކުލަބަކަށް ކުޅެފަ އެވެ. އެއީ ރާއްޖޭގެ އަށް ކުލަބެއްގެ އިތުރުން ބޭރުގެ ދެ ކުލަބަކަށެވެ. މިވަގުުތު ދަނގަޑޭ ކުޅެމުން އަންނަނީ ނިއުރޭޑިއަންޓަށެވެ.