މިޞްރުގެ ޝަރްމް އަލް ޝެއިޚް ގައި މާދަމާ ބާއްވާ ޣައްޒާ ޤަތުލުޢާންމާއި ބެހޭ ބައިނަލްއަޤްވާމީ ސަމިޓަށް ވަޑައިގަންނަވަނިކޮށް، ކާރު އެކްސިޑެންޓެއްގައި ޤަތަރުގެ ތިން ޑިޕްލޮމެޓުން އަވަހާރަވެއްޖެ ކަމަށް ޞިއްޙީ އޮފިޝަލުންނާއި ޙަވާލާދީ އޭއެފްޕީން ބުނެފިއެވެ.
ފަސްބޭކަލުންނާއި އެކު ދަތުރުކުރަމުންދިޔަ ޤަޠަރުގެ ބޭފުޅުން ތިއްބެވި ވެހިކަލް އެކްސިޑެންޓްވީ ޝަރްމް އެލް ޝެއިޚާއި ގާތްގަނޑަކަށް 50 ކިލޯމީޓަރު (31 މޭލު) ދުރުން ގުދު މަގަކުން އަނބުރައިލި ވަގުތު ފުރޮޅާލައިގެން ކަމަށާއި ޙާދިސާ ހިނގި ތަނުގައި ތިން ބޭފުޅުން އަވަހާރަވިއިރު ސަލާމަތްވި ދެބޭފުޅުން ވަނީ ވަރަށް ބޮޑަށް ޒަޚަމް ވެފައި ކަމަށް ޚަބަރުތައް ބުނެއެވެ.
ޣައްޒާ ހަނގުރާމަ ހުއްޓުވުމަށް މިޞްރާއި އެކު މެދުވެރިއެއްގެ ގޮތުގައި ޤަޠަރުން މަސައްކަތް ކުރިއިރު، މިފަހުން އިސްރާއީލުން ވަނީ ޤަޠަރުގައި ތިބި ޙަމާސްގެ ލީޑަރުން ޝަހީދުކޮށްލުމަށް ޤަޠަރަށް ވެސް ބޮން އަޅާފައިކަން ފާހަގަ ކުރެވެއެވެ.
Advertisement
އަނެއްކޮޅުން މިފަހަރު ކާރު އެކްސިޑެންޓުގައި އަވަހާރަވި ބޭފުޅުންނަކީ ޙަމާސްގެ ބޭފުޅުންނާއި ސީދާސީދާ ބައްދަލުވެފައިވާ ބޭފުޅުން ކަމަށް ވެސް ބައެއް ނުރަސްމީ ޚަބަރުތައް ބުނެއެވެ. ނަމަވެސް، މި ޙާދިސާ އާއި ގުޅޭ ގޮތުން ޤަޠަރުން އަދި ވަކި އެއްޗެއް ނުބުނެއެވެ.
މާދަމާ ފެށުމަށް ހަމަޖެހިފައިވާ މި ސަމިޓުގައި މިޞްރުގެ ރައީސް ޢަބްދުލް ފައްތާޙް އަލް ސީސީ އާއި އެމެރިކާގެ ރައީސް ޑޮނަލްޑް ޓްރަމްޕް ކޯ ޗެއާމަންކަން ކުރައްވާއިރު، ޢަރަބިންނާއި ހުޅަނގުގެ ވިއްސަކަށް ޤައުމުން ބައިވެރިވާނެ ކަމަށް މިޞްރުގެ ރިޔާސަތުން ބުނެއެވެ.
