ޣައްޒާގައި އިސްރާއީލުން ކުރިއަށްދާ ނަސްލު ނައްތާލުމުގެ ހަނގުރާމައާއި ދެކޮޅަށް 40 އަށް ވުރެ ގިނަ ގައުމުގެ ރައްޔިތުން އެއްވެ ދުނިޔޭގެ އެކި ކަންކޮޅުތަކުގައި ބޮޑު މުޒާހަރާތަކެއް ކުރިޔަށް އެބަ ދެއެވެ. މި މުޒާހަރާތައް ކުއްލިޔަކަށް ވަރުގަދަވީ މި މަހުގެ ފުރަތަމަ ދުވަހު ޣައްޒާއަށް ގްލޯބަލް ޞުމޫދު ފްލޮޓިއްލާ އާއި ކުރިމަތިލައި އިސްރާއީލުގެ ސިފައިން އެ ގާފިލާ ހުއްޓުވުމުންނެވެ.
ގްލޯބަލް ޞުމޫދު ފްލޮޓިއްލާ އާއި އިސްރާއީލުގެ ސިފައިން ކުރިމަތިލަނީ.
އިސްރާއީލާއި ދެކޮޅަށް ދުނިޔޭގެ ހުރިހާ ބައްރެއްގައިވެސް ދަނީ މުޒާހަރާ ކުރަމުންނެވެ. އިޓަލީގައި ޔޫނިއަންތަކުން ނުކުމެ އެ ޤައުމު ޕެރެލައިޒް ކޮށްލިއެވެ. ރޯމް، މިލާން، އަދި ނޭޕާލްސް ފަދަ ސިޓީތަކުގައި ދެ މިލިއަނަށް ވުރެ ގިނަ މީހުން މަގުތަކަށް ނުކުތެވެ. އަދި އިޓަލީން އިސްރާއީލަށް ދޭ އަސްކަރީ އެއްބާރުލުން ވަގުތުންވަގުތަށް ހުއްޓާލުމަށް މުޒާހަރާގެ ބައިވެރިން ގޮވާފައި ވެއެވެ.
އެމްސްޓަޑަމްގައި ވެސް ގާތްގަނޑަކަށް 250،000 މީހުން އިސްރާއީލާއި ދެކޮޅަށް މުޒާހަރާ ކުރަމުންދާއިރު އިސްތަންބޫލްގައި ވެސް މިލިއަނެއްހާ މީހުން ވަނީ އިސްރާއީލާއި ދެކޮޅަށް އިއްޔެ އަޑު އުފުލާފައެވެ.
ތުރްކިޔޭގެ މުޒާހަރާގެތެރެއިން: އެމީހުން މުޒާހަރާކުރީ ފަތުރުވެރިންގެ މަޤްބޫލް ސަރަޙައްދުތަކުގައި / ފޮޓޯ: ސޯޝަލް މީޑިއާ.
މުހިންމު އެހެން މުޒާހަރާތަކަށް ބަލާއިރު ޕެރިސް، ލަންޑަން، ބާސެލޯނާ، ގްރީސް، އިނގިރޭސިވިލާތް، ބެލްޖިއަމް، ސްޕެއިން، ޕޯޗުގަލް، ދެކުނު ކޮރެއާ، ކެނެޑާ، އެމެރިކާ، މެކްސިކޯ، ބްރެޒިލް، އާޖެންޓީނާ، ޗިލީ، ކޮލަމްބިއާ، ޕެރޫ، އިކުއެޑޯ، ޔޫކްރޭން، ޖޯޖިއާ، ސީރިއާ، އީރާން، (މެދުއިރުމަތީގެ ހުރިހާ ހިސާބެއް)، ޕާކިސްތާން (އަޒާދު ކަޝްމީރު)، ޤަޠަރު، ދެކުނު އެފްރިކާ، އަދި ކެނެޑާ ގައި ވެސް ދަނީ މުޒާހަރާ ކުރަމުންކަން ފާހަގަކޮށްލެވެއެވެ.
