މަސްތުވާތަކެތި ބޭނުންކޮށް އެ ތަކެތީގެ ވިޔަފާރިކުރާ ކަމަށް ތުހުމަތުކުރެވޭ މައްސަލައަކާއި ގުޅިގެން މަޝްހޫރު ޕްރެޒެންޓަރު ހދ. ކުޅުދުއްފުށި / މަރިޔާޒް، އިނާޔަތު އަލީ (34އ) އާއި އިތުރު ފިރިހެނަކާއި އަދި އަންހެނަކު ހިމެނޭހެން 3 މީހުން ހައްޔަރުކޮށްފިއެވެ.

މި ތިން މީހުން ހައްޔަރުކޮށްފައިވަނީ، މި މަހުގެ 25 ވަނަ ދުވަހުގެ ރޭ ފުލުހުން ހިންގި އޮޕަރޭޝަނުގައި ކޯޓު އަމުރެއްގެދަށުން ކަމަށް، މި މައްސަލައާ ގުޅިގެން ފުލުހުން ވަނީ ބުނެފަ އެވެ.

ފުލުހުން ބުނެފައިވާ ގޮތުގައި، ކައުންޓާ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓު ގުޅިގެން ހިންގި މި އޮޕަރޭޝަނުގައި، އެ ތިން މީހުންނާއި ގުޅުންހުރި ކަމަށް ބެލެވޭ މާލޭގެ ދެ ގެއެއް ބަލައިފާސްކުރިއިރު އެ މީހުން ބިން ގެންގުޅުނު ތެޔޮ ބިޑިއަކާއި 1246 ގުރާމު މަސްތުވާތަކެތި ފެނުނު ކަމަށް ފުލުހުން ވަނީ ބުނެފައެވެ.

މި މައްސަލައާ ގުޅިގެން ހައްޔަރުކޮށްފައިވާ މީހުން:

1. މާލެ / މއ. މަޒާގެ، މުހައްމަދު އައިޝް އަހްމަދު (34އ)

2. މާލެ / މއ. މަޒާގެ، އާމިނަތު އިއްލިއްޔީން އަހްމަދު (25އ) އާއި

3. ހދ. ކުޅުދުއްފުށި / މަރިޔާޒް، އިނާޔަތު އަލީ (34އ)

މި ތިން މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ކޯޓުން ވަނީ، މުހައްމަދު އައިޝް އަހްމަދު 10 ދުވަހުގެ މުއްދަތަކަށް ބަންދުގައި ބެހެއްޓުމަށް، އަދި އާމިނަތު އިއްލިއްޔީން އަހްމަދާއި އިނާޔަތު އަލީ ހަތް ދުވަހުގެ މުއްދަތަކަށް ބަންދުގައި ބެހެއްޓުމަށް އަމުރުކޮށްފައެވެ.

އިނާޔަތަކީ ޕީއެސްއެމްގެ ސީނިއާ ޕްރެޒެންޓަރުގެ އިތުރުން ރާއްޖެ ސްޕާގެ ބްރޭންޑް އެމްބެސެޑަރު ވެސް މެއެވެ.

މަސްތުވާތަކެތީގެ މި މައްސަލައިގައި ކުށް އިނާޔަތުގެ މައްޗަށް ސާބިތުވެއްޖެނަމަ އުމުރަށް ޖަލަށް ލުމާއި އެކު 1 ލައްކަ ރުފިޔާއިން ޖޫރިމަނާ ކުރެވޭނެ ކަމަށް މަސްތުވާތަކެތީގެ ޤާނޫނުން އެނގެއެވެ.

ފުލުހުން ގެންދަނީ މި މައްސަލަ އިތުރަށް ތަހުގީގު ކުރަމުންނެވެ.