އަމިއްލަ ދަނޑުގައި ބާންލޭ 1-5 ގެ ނަތީޖާއިން ބަލިކޮށް މެންޗެސްޓަރ ސިޓީން އެ ކުލަބުގެ އަސްލު ކުޅުން ރޭ ދައްކާލާފައިވާއިރު ތާވަލުގެ ފުލުގައި ޕޮއިންޓެއް ނުލިބި އޮތް ވުލްވްސް އަށް ޓޮޓެންހަމުން ޕޮއިންޓެއް ދީފިއެވެ.

ފަސޭހަކަމާއެކު މޮޅުވި މެޗުގައި ފުރަތަމަ ހާފު ނިމުނީ 1-1 ގެ ނަތީޖާއިންނެވެ. މެޗުގެ ފުރަތަމަ ގޯލަކީ ބާންލޭގެ ޑިފެންޑަރު މެކްސިމް އެކްސްޓީވް އަތުން 12 ވަނަ މިނެޓުގައި ބައިކޮޅަށް ވަތް ގޯލެކެވެ. ބާންލޭއަށް އެއްވަރުކޮށްދިން ގޯލު ޖަހައިދިނީ 38 ވަނަ މިނެޓުގައި ޖައިޑަން އެންތޮނީ އެވެ. ސިޓީއަށް އަލުން ލީޑު ލިބުނު ގޯލު 61 ވަނަ މިނެޓުގައި ޖަހައިދިނީ މެތިއަސް ނުނޭސް އެވެ. އޭގެ ހަތަރު މިނެޓު ފަހުން އެކްސްޓީވް ވަނީ އިތުރު ގޯލެއް ބައިކޮޅަށް ވައްދާލާފައެވެ. ހަތަރުވަނަ އަދި ފަސްވަނަ ގޯލު މެޗުގެ 90 މިނެޓަށްފަހު ޖަހައިދިނީ ފޯވާޑު ހާލަންޑެވެ. މިއީ ހާލަންޑު ލީގުގައި ކާމިޔާބުކުރި އަށް ވަނަ ގޯލެވެ. ލަނޑު ލިސްޓުގެ ކުރީގައި އެއްވަނައިގައި ހާލަންޑު އޮތްއިރު ދެވަނައިގައި އުޅެނީ ބާންލޭގެ ޖައިޑަން އެންތޮނީއެވެ.

މި މޮޅާއެކު ސިޓީ މިވަގުތު އޮތީ 10 ޕޮއިންޓާއެކު ތާވަލުގެ ހަ ވަނައިގައެވެ. ބާންލޭ އޮތީ ހަަތަރު ޕޮއިންޓާއެކު 17 ވަނައިގައެވެ.

ތާވަލުގެ ފުލުގައި ޕޮއިންޓެއް ނުލިބި އޮތް ވުލްވްސް އަތުން ޓޮޓެންހަމް އެއްވަރުވެފައިވަނީ 1-1 ގެ ނަތީޖާއިންނެވެ. ދެވަނަ ހާފުގެ 54 ވަނަ މިނެޓުގައި ވުލްވްސްގެ ޑިފެންޑަރު ސަންޓިއާގޯ ބުއޭނޯ ގޯލެއް ޖަހާފައިވަނިކޮށް ޓޮޓެންހަމަށް މެޗު އެއްވަރުކޮށްދިނީ ފަހު މިނެޓުގައި ޕަލިންހާއެވެ.

މިވަގުތު ތާވަލުގެ ތިން ވަނައިގައި ޓޮޓެންހަމް އޮތީ 11 ޕޮއިންޓާއެކުގައެވެ. މެޗުން ލިބުނު އެއް ޕޮއިންޓާއެކު ވުލްވްސް އަދިވެސް އޮތީ ފުލުގައެވެ.