ފުރަތަމަ ހާފުގައި ދެ ރަތްކާޑު ފެނިގެން ދިޔަ ފޯރިގަދަ މެޗު 1-2 ގެ ނަތީޖާއިން ކާމިޔާބުކޮށް މެންޗެސްޓަރ ޔުނައިޓެޑް ތާވަލުގެ ނުވަ ވަނައަށް ޖެހިލައިފިއެވެ.
އޯލްޑް ޓްރެފޯޑުގައި ކުޅުނު މި މެޗުގެ ގޯލުތައް ފުރަތަމަ ހާފުގައި ޖަހާފައިވަނީ 14 ވަނަ މިނެޓުގައި ބްރޫނޯ ފެނާންޑޭސް އަދި 37 ވަނަ މިނެޓުގައި ކަސެމީރޯ އެވެ. ދެވަނަ ހާފު ނިމެން 10 މިނެޓަށް ވެފައިވަނިކޮށް ޗެލްސީގެ ގޯލު ޖަހާފައިވަނީ ޗަލޯބާއެވެ.
މެޗު ފަށައިގެން ހަތަރު ވަނަ މިނެޓުގައި ޗެލްސީގެ ކީޕަރަށް ރަތް ކާޑު ދައްކާފައިވަނީ އޭރިޔާ ބޭރުން ޔުނައިޓެޑުގެ ފޯވާޑު އެމްބޫމާ އަށް ކުރި ނުރައްކާތެރި ފައުލަކާ ގުޅިގެންނެވެ. އެ ރަތްކާޑާއެކު ޗެލްސީގެ ކޯޗު އެންޒޯ މަރެސްކާ ވަނީ ޓީމުގެ ފޯމޭޝަން ބަދަލުކޮށް ބައެއް ކުޅުންތެރިންވެސް ބަދަލުކޮށްފައެވެ. ނަމަވެސް އެ ބަދަލުތަކަކުން ޗެލްސީ އަށް ފައިދާއެއް ނުކޮށް ބައިކޮޅަށް ފުރަތަމަ ހާފުގައި ވަނީ ދެ ގޯލު ވަދެފައެވެ.
ފުރަތަމަ ހާފު ނިމެން ކުޑައިރުކޮޅަކަށް ވެފައިވަނިކޮށް ޔުނައިޓެޑުގެ ކަސެމީރޯއަށް ވެސް ވަނީ ދެ ރީދޫ ކާޑާއެކު ރަތްކާޑެއް ދައްކާ ދަނޑުން ފޮނުވާލާފައެވެ. މި ރަތްކާޑާއެކު ދެވަނަ ހާފުގައި ޗެލްސީ ކުޅުން ރަނގަޅު ކުރި ނަމަވެސް ނުރައްކާތެރި ހަމަލާތަކެއް ޔުނައިޓެޑުގެ ގޯލަށް ފޮނުވާލެވިފައެއްނުވެއެވެ.
މި މޮޅާއެކު މިއީ މި ސީޒަނުގައި ކުޅުނު ހަ މެޗުން ޔުނައިޓެޑަށް ލިބުނު ދެވަނަ މޮޅެވެ. އެ ކުލަބުގެ ކޯޗު އަމޮރިމް ވަކިކުރުމަށް ގިނަ ސަޕޯޓަރުންގެ ފަރާތުން ގޮވާލަމުންދާ މި ދަނޑިވަޅުގައި އެނާއަށް މިރޭ މި ލިބުނު ކާމިޔާބީއަކީ އޭނާގެ މަގާމު ދަމަހައްޓަން ލިބުނު ފުރުސަތެކެވެ.
ލީގުގައި ޗެލްސީ ވެސް މޮޅުވެފައިވަނީ ދެ މެޗުންނެވެ. އެ ކުލަބު މިވަގުތު އޮތީ ތާވަލުގެ ހަ ވަނައިގައެވެ. މާދަން ރޭ ސިޓީ އަދި ސަންދަލެންޑު މޮޅުވެއްޖެނަމަ ޗެލްސީ އެއަށް ވުރެ ދަށަށް ވެއްޓޭނެ އެވެ.
