ޔޫރަޕްގެ ޤައުމެއް ކަމަށްވާ ނެދަލެންޑްސް ގައި މުސްލިމުންނަށް ފުރައްސާރަކޮށް، އެ މީހުންގެ ގަޔަށް ކުޅު ޖަހައި މިސްކިތްތަކަށް އިންޒާރުގެ ނޯޓުތައް އަޅަމުންދާ ކަމަށް ނެދަލެންޑްސްގެ މުސްލިމުންގެ ޖަމްޢިއްޔާ އަކުން ބުނެފިއެވެ.
އެ ޤައުމުގެ މިސްކިތްތަކާއިބެހޭ ޖަމްޢިއްޔާއިން ބުނީ މީގެ ދެތިންދުވަސް ކުރިން މިސްކިތްތަކަށް އިންޒާރުގެ ނޯޓުތައް ވެސް އަޅާފައިވާ ކަމަށާއި ލިޔެފައި ވަނީ ލެއިންނެވެ. އަދި އެ ކަރުދާސްތަކުގައި ރަސޫލާ (ޞޢވ)ގެ ކާޓޫނު ކުރަހައި އެ ކަލޭގެފާނުގެ އަބުރުފުޅާއި ބެހި ވަރަށް ހަޑިހުތުރު ބަހުން އެއްޗެހި ކިޔައިފައިވާ ކަމަށާއި 9 މިސްކިތަކަށް އެފަދަ ނޯޓުތައް އަޅާފައިވާ ކަމަށެވެ. އޭގެތެރޭގައި ރޮޓަރޑަމް، އައިންޑްހޯވެން، އާންހެމް، ޓިލްބާގް، އަދި ދަ ހޭގްގައި ހުރި މިސްކިތައް ހިމެނޭ ކަމަށް އެ ޖަމްޢިއްޔާއިން ބުންޏެވެ.
އެ ސިޓީތަކުގައި ނަބިއްޔާ އަށް ފުރައްސާރައިގެ ބަސްތައް ލިޔެ ކާޓޫންތައް ކުރަހާފައި ވަނީ މުސްލިމުންގެ މެދުގައި ނަފްރަތު އުފައްދަން ކަމަށާއި، އެއް ސިޓީއެއްގައި "މިއީ ޔޫރަޕްގައި އިސްލާމްދީނުގެ އެންމެ ފަހު ދުވަސްތައް" ކަމަށް ވެސް ބުނެފައިވާ ކަމަށް އެ ޖަމްޢިއްޔާ އާއި ޙަވާލާދީ ޚަބަރުތަކުގައި ވެއެވެ.
ނެދަލެންޑްސްގެ މިސްކިތްތަކާއި ބެހޭ ޖަމްޢިއްޔާއިން ބުނީ މިކަމުގެ ސަބަބުން އެ ޤައުމުގެ މުސްލިމުންގެ މެދުގައި ބިރުވެރިކަން އުފެދިފައިވާ ކަމަށެވެ. އަދި އެ މީހުންގެ ހަނދާނަށް އަންނަނީ ނިއުޒީލެންޑްގެ ކްރައިސްޓްޗާޗްގެ ދެމިސްކިތަކަށް 2019 ވަނަ އަހަރު ދިން ޓެރަރިސްޓް ހަމަލާއާއި، ދާދިފަހުން ފްރާންސްގައި ނަމާދުކުރަން ހުއްޓާ މީހަކު މަރައިލި ހާދިސާއެވެ.
ނެދަލެންޑްސް މުސްލިމުން އުނދަގޫތަކާއި ކުރިމަތިލާން ޖެހިފައިވާތާ ދުވަސްތަކެއް ވެއްޖެއެވެ. އޭގެ ތެރޭގައި ބަހުގެ ޙަމަލާތަކާއި ކުރިމަތިލުމާއި، މަލާމާތް ކުރުމާއި ހުކުރު ނަމާދުގެ ޖަމާޢަތުގައި މިސްކިތްތަކުގެ ބޭރުގައި ނަމާދަށް ތިބޭއިރު އެމީހުންގެ ގަޔަށް ކުޅުޖެހުމާއި މިސްކިތުން ނުކުމެގެން އަންނަ މީހުންގެ ގަޔަށް ކުޅު ޖެހުން ފަދަ ކަންތަކެވެ.
ނެދަލެންޑްސްގައި 1 މިލިއަން މުސްލިމުން އުޅޭއިރު އަޅުކަން ކުރުމަށް ހުންނަނީ އެންމެ 610 މިސްކިތެވެ. 2019 ވަނަ އަހަރުން ފެށިގެން އެ ޤައުމުގައި ވަނީ މުސްލިމު އަންހެނުންނަށް މޫނުބުރުގާ އެޅުން މަނާކޮށްފައެވެ. ބުރުގާ އަޅައިގެން ނުވަތަ ނިވާކަން ބޮޑު ހެދުމެއް (ޚާއްޞަކޮށް އިސްލާމީ ކަޅު ހެދުމެއް) ލައިގެން އަންހެނަކު މަގުމަތިން ހިނގާފައި ދާނަމަ އެމީހެއްގެ ގަޔަށް ކުޅު ޖެހުމަކީ ވެސް އެ ޤައުމުގައި ހިނގަމުންދާ ކަމެކެވެ.
އެ ޤައުމުގެ ދެބައިކުޅަ އެއްބައި މީހުންނަކީ ކަލަކު ވޮޑިގެންވާ ކަމަށް ޤަބޫލު ނުކުރާ މީހުންނެވެ.
