ކީރިތި ގުރުއާނާ ބެހޭ ގައުމީ މަރުކަޒުގެ އާ ވެބްސައިޓެއް އިފްތިތާހުކޮށްފި އެވެ. މި ވެބްސައިޓު އިފްތިތާހުކޮށްދެއްވާފައި ވަނީ، މިކަމަށްޓަކައި އިސްލާމީ ކަންތައްތަކާ ބެހޭ ވުޒާރާގައި ބޭއްވި ހާއްސަ ރަސްމިއްޔާތެއްގައި، އިސްލާމީ ކަންތައްތަކާ ބެހޭ ވަޒީރު، ޑރ. މުހައްމަދު ޝަހީމް އަލީ ސައީދު އެވެ.

އިސްލާމީ ކަންތައްތަކާ ބެހޭ ވުޒާރާއިން ބުނީ، މިއަދު އިފްތިތާހް ކުރެވިގެންދިޔަ އާ ވެބްސައިޓަކީ މިހާތަނަށް ގުރުއާނާ ބެހޭ މަރުކަަޒަށް ހެދިގެންދިޔަ އެންމެ ފެންވަރު ރަނގަޅު، އާންމުންނަށް އެތައް ފަސޭހަތަކެއް ލިބިގެންދާ ވެބްސައިޓެއް ކަމަށެވެ. އެގޮތުން، މި ވެބްސައިޓު މެދުވެރިކޮށް ކީރިތި ގުރުއާނާ ބެހޭ ގައުމީ މަރުކަޒުން ކުރިއަށް ގެންދާ ކޯސްތަކާއި، މަރުކަޒުން ބާއްވާ ގުރުއާން މުބާރާތްތަކުގެ އެންމެ ފަހުގެ އަދާހަމަތައް ވަގުތުން ބަލާލެވެނޭކަމަށް އެ ވުޒާރާއިން ބުންޏެވެ. މީގެ އިތުރުން، މަރުކަޒުގެ ހަބަރާއި މައުލޫމާތު މި ވެބްސައިޓުގެ ޒަރީއްޔާއިން އާންމުންނަށް ތާޒާކަމާއެކު ގެނެސްދެވިގެންދާނެ ކަމަށްވެސް އެ ވުޒާރާއިން ފާހަގަކުރި އެވެ.

އެ ވުޒާރާއިން އިތުރަށް ބުނީ، ކީރިތި ގުރުއާނާ ބެހޭ ގައުމީ މަރުކަޒުގެ ހިދުމަތްތަކުގެ ފެންވަރު ރަނގަޅުކޮށް، ކީރިތި ގުރުއާނުގެ އިލްމު ފެތުރުމަށް ކުރަމުންދާ މަސައްކަތްތައް އިތުރުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ވަރަށް އިސްކަމެއް ދެއްވައިގެން ކުރައްވަމުން ގެންދަވާ މަސައްކަތެއް ކަމަށެވެ.

އެގޮތުން، ކީރިތި ގުރުއާން ކިޔެވުމުގެ ގައުމީ މުބާރާތުގެ ފެންވަރު ރަނގަޅުކުރުމާއި ހާފިޒުންގެ ދަސްވެނިވުމަށް ހާއްސަ ރަސްމިއްޔާތެއް ބާއްވަން ފެށުމަކީ މިހާތަނަށް ކުރެވިފައިވާ މުހިންމު މަސައްކަތްތަކެއްކަން އެ ވުޒާރާއިން ފާހަގަކުރި އެވެ. މިފަދަ މަސައްކަތްތަކުގެ ސަބަބުން ކީރިތި ގުރުއާނުގެ އިލްމު ދިވެހި މުޖުތަމައުގައި އިތުރަށް ފުޅާވެ، ދީނީ ރޫހު އާލާވުމަށް ބޮޑު އެހީތެރިކަމެއް ލިބިގެންދާނެ ކަމަށް ވެސް އެ ވުޒާރާއިން ބުންޏެވެ.