ސެޕްޓެމްބަރު 23 އިން 27 އަށް ނިއުޔޯކުގައި ބާއްވާ އެކުވެރި ދައުލަތްތައް (އދ)ގެ ޢާންމު މަޖިލީހުގެ ޖަލްސާގައި ބައިވެރިވެ ވަޑައިގަތުމަށް ނިއު ޔޯކަށް ވަޑައިގެންނެވުމުގެ ފުރުޞަތު ފަލަސްޠީންގެ ރައީސް މަޙްމޫދު ޢައްބާހަށް ނުދޭނެ ކަން އެމެރިކާއިން ހާމަ ކުރުމާއި ގުޅިގެން، އެމެރިކާގެ އެ ނިންމުން ބަދަލުކުރުމަށް އެތައް ޤައުމަކުން ގޮވާލައި ކަންބޮޑުވުން ފާޅުކޮށްފިއެވެ.
ފަލަސްޠީނުގެ އޮތޯރިޓީގެ ރައީސް މަހްމޫދު އައްބާސްގެ އިތުރުން ޕީއޭ އާއި ޕީއެލްއޯގެ ގާތްގަނޑަކަށް 80 އޮފިޝަލުންނަށް ވިސާ ނުދޭނެ ކަމަށް އެމެރިކާއިން އެންގުމުން، އެ ނިންމުމަށް ފާޑު ކިޔާފައިވާ ފަރާތްތަކުގެ ތެރޭގައި ޔޫރަޕިއަން ޔޫނިއަން، ފްރާންސް އަދި ސްޕެއިން އާއި އޮސްޓްރޭލިއާ ވެސް ހިމެނެއެވެ.
ފްރާންސާއި ސައުދީ އަރަބިއްޔާ ކޯ ހޯސްޓްކޮށްފައިވާއިރު، އެޖެންޑާގައި ފަލަސްޠީނަކީ ދައުލަތެއްގެ ގޮތުގައި ބަލައިގަތުމަށް ހަމަޖެހިފައި ވެއެވެ.
Advertisement
ޚަބަރުތައް ބުނާ ގޮތުގައި މި ބައްދަލުވުމުގައި ފްރާންސް، ސްޕެއިން، އޮސްޓްރޭލިއާ، ކެނެޑާ، އީޔޫ އަދި ޢަރަބި ޤައުމުތައް ހިމެނޭ ގޮތަށް ބައެއް ޤައުމުތަކުން މި ބައްދަލުވުމުގައި ރަސްމީކޮށް ފަލަސްޠީނަކީ އިސްތިޤުލާލީ ދައުލަތެއްގެ ގޮތުގައި ބަލައިގަނެ އެކަން އިޢުލާން ކުރުމަށް ހަމަޖެހިފައި ވެއެވެ.
މި ސަމިޓްގެ މަޤްޞަދަކީ ވެސް ދެ ދައުލަތުގެ ހައްލުގެ މައްޗަށް ބިނާކޮށް ބައިނަލްއަޤްވާމީ ޞުލްޙައިގެ މަރުޙަލާއެއް އަލުން ފެށުމެވެ.
މީގެ އިތުރުން، ޣައްޒާ ހަނގުރާމަ ހުއްޓުވައި ޞުލްޙަ ޤާއިމްކުރުމުގެ އޮނިގަނޑުތައް އެކުލަވާލުމާއި، ފަލަސްޠީނުގެ ދައުލަތަށް އިޤްތިޞާދީ އެހީތެރިކަން ފޯރުކޮށްދިނުމާއި ފްރާންސާއި ސައުދީ އަރަބިއްޔާއިން ހުށަހަޅާ އަލަށް ޤަބޫލުކުރެވޭ ފަލަސްޠީނުގެ ދައުލަތަކަށް ވެރިކަމާއި އިޤްތިޞާދީ ހަމަޖެހުން ދެމެހެއްޓޭނެ ގޮތަށް މާލީ އެހީގެ ޕެކޭޖަކާއި ތަރައްޤީގެ ޕްލޭނެއް ތަޢާރަފް ކުރުމުގެ އިތުރުން އދ.ގެ އެކްޝަން ޕްލޭނެއް ކަނޑައެޅުމަށް ވެސް ޕްލޭން ކޮށްފައި ވެއެވެ.
މަހްމޫދު ޢައްބާހަކީ މީގެ ކުރިން އިސްރާއީލާއި އެމެރިކާ އާއި އެކު ގުޅުން ރަނގަޅު ލީޑަރެއް ނަމަވެސް، މިހާރު ގުޅުމަށް ބުރޫއަރާފައިވަނީ ޣައްޒާގައި އިސްރާއީލުން ހިންގަނީ ޤަތުލުޢާންމެއް ކަމަށް ބުނެ ފާޑު ވިދާޅުވުމާއި ގުޅިގެންނެވެ.
އެމެރިކާގެ ސެކްރެޓަރީ އޮފް ސްޓޭޓް މާކޯ ރުބިއޯ ވިދާޅުވި ހެއްވާ ވާހަކަ އަކީ ފަލަސްޠީނުގެ އޮފިޝަލުންނަށް މި ބައްދަލުވުމަށް އެމެރިކާ އަށް އެތެރެނުވެވޭ ގޮތް ހެދީ ފަލަސްޠީނުން އިސްރާއީލަށް ޙަމަލާދީ ޓެރަރިޒަމަށް ހިއްވަރު ދޭތީއެވެ.
