މިއީ ދުނިޔޭގެ އެންމެ މަޝްހޫރު ކުލަބުގެ މި ޖީލުގެ ސަޕޯޓަރުންނަށް މާޔޫސް ދުވަހެކެވެ. އަދި އިދިކޮޅު ބައެއް ކުލަބު ތަކުގެ ސަޕޯޓަރުން ކަލަންޑަރުގައި ފާހަގަކުރާނެ ދުވަހެކެވެ. އާދެ، އިނގިރޭސީ ޕްރިމިއަރ ލީގުގައި އެންމެ ކާމިޔާބު ކުލަބު މިވަނީ އަލަށް ހަތަރު ވަނަ ޑިވިޝަންގެ ޓީމެއްގެ އަތުން ބަލިވެ މުބާރާތުން އަލްވަދާޢު ކިޔާފައެވެ.

ކަރަބޯ ކަޕުގައި ބުދަ ދުވަހުގެ ރޭ ޔުނައިޓެޑް ކުޅެފައިވަނީ ޑިވިޝަން ހަތަރެއްގައި ކުޅޭ ގްރިމްސްބީ ޓައުން ކިޔާ ޓީމެއްގެ އަތުންނެވެ. މިވަގުތު އެ ލީގުގެ 10 ވަނައިގައި އޮތް މި ކުލަބު އަތުން ޔުނައިޓެޑް ބަލިވެފައިވަނީ 90 މިނެޓު ހަމަވެ އިތުރު ވަޤުތު ކުޅުނު ދެ ހާފު 2-2 ގެ ނަތީޖާއިން އެއްވަރުވެ ޕެނަލްޓީ ޖަހައިގެންނެވެ.

މެޗުގެ ފުރަތަމަ ހާފު 0-2 ގެ ނަތީޖާއިން ގްރިމްސްބީ ލީޑު ނަގާފައިވަނިކޮށް ޔުނައިޓެޑުން ނަތީޖާ ހަމަހަމަ ކޮށްފައިވަނީ ފަހު ހާފުގެ 75 ވަނަ މިނެޓު އަދި 89 ވަނަ މިނެޓުގައި ގޯލުތައް ޖަހައިގެންނެވެ. ގްރިމްސްބީ އަށް ގޯލުތައް ޖަހާފައިވަނީ ޗާލްސް ވާނަމް އަދި ޓީރެލް ވަރެން އެވެ. ޔުނައިޓެޑުގެ ގޯލުތައް ޖަހާފައިވަނީ އަލަށް އެ ކުލަބާ ގުޅުނު ފޯވާޑު އެމްބޫމޯ އާއި ޑިފެންޑަރު މަގުއިރޭ އެވެ.

ޕެނަލްޓީ ޝޫޓްއަޓުގައި 26 ޕެނަލްޓީ ޖަހާފައިވާއިރު ޔުނައިޓެޑް ބަލިވެފައިވަނީ 11-12 އިންނެވެ. ޔުނައިޓެޑުގެ ޕެނަލްޓީތައް ނާކާމިޔާބުކޮށްލާފައިވަނީ މި ސީޒަނަށް އެޓީމާ އަލަށް ގުޅުނު ދެ ފޯވާޑުން ކަމަށްވާ އެމްބޫމާ އާއި މެތިއުސް ކުންހާ އެވެ.

މި ސީޒަނުގައި ކުޅުނު އެއްވެސް މެޗަކުން އަދި ޔުނައިޓެޑް މޮޅުވެފައި ނުވާއިރު އެ ކުލަބުގެ ކޯޗު ރުބެން އަމޮރިމް ވަކިކުރުމުގެ އަޑު ސަޕޯޓަރުންގެ މެދުގައި މިވަނީ ގަދަވެފަ އެވެ. ޕްރިމިއަރ ލީގުގައި އެންމެ ފަހުން ކުޅުނު 29 މެޗުން އެ ކުލަބަށް ލިބިފައިވަނީ 28 ޕޮއިންޓެވެ. މިއީ ހަމަ ގައިމުވެސް މިފަދަ ކުލަބެއްގެ ސަޕޯޓަރުން ލަދުގަންނާނެ ފަދަ ނަތީޖާތަކެވެ. އަދި އަމޮރިމް އިސްތިއުފާ ދޭންޖެހޭ ވަޤުތު ވެސް މެއެވެ. އަދި ޔުނައިޓެޑުގެ ބޯޑުން، ސަޕޯޓަރުންގެ ހައްގުގައި އޭނާ ވަކިކުރަން ޖެހޭ ވަގުތު އަދި ނުޖެހެނީތޯ އެވެ.