އޯނާޝިޕް މައްސަލައިގައި އެންމެ ފަހުގެ އިނގިރޭސި އެފްއޭ ކަޕްގެ ޗެމްޕިއަން ކްރިސްޓަލް ޔޫއެފާ ޕެލަސް ޔޫރޮޕާ ލީގުން ބޭރު ކުރީ ރަނގަޅަށް ކަމަށް ކޯޓުން މިއަދު ހުކުމް ކޮށްފިއެވެ.
ޔޫއެފާގެ ގަވައިދުގައިވާ ގޮތުން އެއް ފަރާތަކުން އެއް ކްލަބަށް ވުރެ ގިނަ ކްލަބްތަކުގެ ހިއްސާ ވަކި ވަރަކަށް އޮންނަ ނަމަ ޔޫއެފާގެ އެއް މުބާރާތެއްގައި ވާދަ ނުކުރެވޭނެއެވެ.
ޔޫރޮޕާ ލީގުން ޔޫއެފާ ކޮންފަރެންސް ލީގަށް ރެލިގޭޓް ކުރި މައްސަލަ ކްރިސްޓަލް ޕެލަސް އިން ކުރި އިސްތިއުނާފު ބާތިލްކޮށް، ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އިން މިއަދު ހުކުމް ކުރިއިރު، ކްރިސްޓަލް ޕެލަސް އިން ބުނީ އެމީހުންނާއި މެދު ކަންތައް ކުރީ އިންސާފުވެރިކޮށް ނޫން ކަމަށެވެ. ނަމަވެސް ކާސް އިން ވަނީ ޔޫއެފާގެ ތަހުގީގަށް ތާއީދުކޮށް، އެސެސްމަންޓް ކުރިއިރު ގަވާއިދުތަކަށް އަމަލުކޮށްފައި ވަނީ ރަނގަޅަށްކަން ކަށަވަރުކޮށްދީފަ އެވެ.
އެހެންކަމުން މި ނިންމުމުގެ މާނައަކީ މި މަހުގެ ފަހުކޮޅު ކޮންފަރެންސް ލީގުގެ ޕްލޭއޮފް ބުރަށް ޕެލަސް ނުކުންނައިރު، ފޮރެސްޓް ޔޫރޮޕާ ލީގުގެ ގްރޫޕް ސްޓޭޖާއި ގުޅޭނެ އެވެ.
ކްރިސްޓަލް ޕެލަސްގެ މެޖޯރިޓީ ހިއްސާދާރު ޖޯން ޓެކްސްޓާގެ ކުންފުނި އީގަލް ފުޓްބޯލް ހޯލްޑިންގްސް އިން ހަތަރު ފުޓްބޯޅަ ކްލަބެއްގެ ބޮޑު ހިއްސާ އެއް އޮވެއެވެ. އެއީ ކްރިސްޓަލް ޕެލަސް (އިނގިރޭސި ޕްރިމިއާ ލީގު)، އޮލިމްޕިކް ލިއޯންސް (ލީގު 1، ފްރާންސް)، އާރުޑަބްލިއުޑީ މޮލެންބީކް (ބެލްޖިއަމް ޕްރޯ ލީގު)، އަދި ބޮޓާފޯގޯ (ބްރެޒިލްގެ ލީގު ކެމްޕެއޮނާޓޯ ބްރެޒިލޭރޯ ސެރީއޭ) އެވެ.
ޓެކްސްޓާ ވަނީ ވަރަށް ފަހުން ކްރިސްޓަލް ޕެލަސްގެ 43 ޕަސެންޓް ހިއްސާ، 190 މިލިއަން ޕައުންޑަށް ނިއުޔޯކް ޖެޓްސްގެ އޯނަރު ވުޑީ ޖޯންސަން އަށް ވިއްކާލައިފައެވެ. ނަމަވެސް ޕްރިމިއާ ލީގުން މި ޑީލް އޭރު ރިވިއު ކޮށްފައި ނުވާ އިރު، ޔޫއެފާއިން ދިން މުއްދަތުގައި ޕެލަސް އަށް އެކަން ފުރިހަމައެއް ނުކުރެވުނެވެ.
މި ސީޒަނުގައި ޔޫރޮޕާ ލީގުގައި ވާދަކުރާނީ އޭނާގެ ހިއްސާ އޮންނަ އޮލިމްޕިކް ލިޔޯން އެވެ.
