މިދިޔަ އެޕްރީލް މަހުގެ 18 ވަނަ ދުވަހު މާލޭގެ އިމާރާތެއްގެ މަތިން ވެއްޓުނު ހައްވާ ޔުމްނު ރަޝީދުގެ މައްސަލައިގައި އޭނާގެ ބަޔާން އަދިވެސް ނުނެގޭ ކަމަށް ފުލުހުން މިއަދު ހާމަކޮށްފި އެވެ.
ހ. މިޓާޒް ގޭގެ ފުރާޅު މައްޗަށް ޔުމްނު ވެއްޓިފައި އޮއްވައި ފެނުނު ޔުމްނު އަށް ލިބުނު އަނިޔާތަކަށް ފަރުވާ ހޯދުމަށް އާއިލާއިން ވަނީ އޭނާ މެލޭޝިއާއަށް ގެންގޮސްފައެވެ.
Advertisement
މި މައްސަލައިގެ ތަހުގީގަށް ޔުމުންގެ އާއިލާގެ ފަރާތުން އެއްބާރުލުން ލިބިފައިނުވާތީ، މެލޭޝިއާގެ ގާނޫނާއި ގަވާއިދާ އެއްގޮތްވާގޮތުގެ މަތިން، ތަހުގީގަށް ބޭނުންވާ މައުލޫމާތު ހޯދުމަށް މެލޭޝިއާ ފުލުހުންނާ ގުޅިގެން މަސައްކަތް ކުރަމުންގެންދާ ކަމަށް ފުލުހުން ވަނީ ކުރިން ބުނެފަ އެވެ. އަދި ޔުމްނު ފަރުވާއަށް މެލޭޝިއާއަށް ގެންދިޔަ ދުވަހުން ފެށިގެން ދެ ފުލުހުން މެލޭޝިއާގައި ތިބިކަމަށްވެސް ފުލުހުން ބުނެފައިވެ އެވެ.
ނަމަވެސް މިއަދު ފުލުހުން ބުނީ އަދިވެސް އޭނާގެ ބަޔާން ނުނެގޭ ކަމަށެވެ. ޔުމްނުގެ ބަޔާން ނުނެގިގެން އުޅެނީ ކޮން ސަބަބަކާހެދި ކަމެއް ފުލުހުން ހާމައެއް ނުކުރެ އެވެ.
މި މައްސަލަ ތަހުގީގު ކުރަން ސަރުކާރުން ހާއްސަ ކޮމިޝަނެއްވެސް އުފެއްދި އެވެ. ނަމަވެސް ކޮމިޝަނުގެ މަސައްކަތް ނިންމައި ރިޕޯޓު އާއްމުކޮށް ކޮމިޝަންވެސް މިހާރު ވަނީ އުވާލައިފަ އެވެ.
ޔުމްނު ވެއްޓުނު ރޭ އޭނާއާ އެކު އެންމެފަހުން އުޅުނީ ރައުދު އަހުމަފު ޒިލާލް އެވެ. މި މައްސަލާގައި ރައުދު ހައްޔަރުކޮށް މިހާރު ބަންދުން ދޫކޮށްލާފައިވިޔަސް، އޭނާގެ މައްޗަށް ވަނީ އެހީ ނުވުމުގެ ދައުވާކޮށްފަ އެވެ.
އެ މައްސަލާގައި ފުލުހުންގެ ތަހުގީގާ މެދު ކަންބޮޑުވުން ފާޅުކޮށް މާލޭގައި ޒުވާނުންތަކެއް ސިލްސިލާ މުޒާހަރާތަކެއް ވެސް ކުރި އެވެ. އެ މުޒާހަރާތަކާ ގުޅިގެން އޭރުގެ ޕޮލިސް ކޮމިޝަނަރު އަލީ ސުޖާއު ވަނީ އިސްތިއުފާ ދީފަ އެވެ.
