އަޒަރުބައިޖާނުގެ ގޭސް ބޭނުންކޮށްގެން ސީރިއާއަށް ގުދުރަތީ ގޭސް ފޯރުކޮށްދިނުމުގެ މަސައްކަތް ރަސްމީކޮށް ތުރުކިޔޭއިން މިއަދު ފަށައިފިއެވެ. ކެސްޕިއަން ކަނޑުގައި އޮންނަ އަޒަރުބައިޖާންގެ ޝާހް ޑެނިޒް ފީލްޑުން އުފައްދާ މި ގޭސް ޑެލިވަރީ ކުރާނީ ތުރުކިޔޭގެ ދެކުނު ކިލިސް-އަލަޕޯ ހޮޅި މެދުވެރިކޮށެވެ.

ތުރުކީވިލާތުގެ އެނާޖީ މިނިސްޓަރު އަލްޕާސްލާން ވިދާޅުވި ގޮތުގައި އަހަރަކު 2 ބިލިއަން ކިއުބިކް މީޓަރުގެ ގޭސް ސީރިއާ އަށް ފޮނުވާނެއެވެ.

މިއީ ބައްޝާރުލް އަސަދުގެ ވެރިކަމުގައި ހުޅަނގުން ސީރިއާ އަށް ފިއްތައިލި ފަހުން މިފަދަ ބޮޑު އެހީތެރިކަމެއް ބައިނަލްއަޤްވާމީ މާކެޓުން ސީރިއާ އަށް ލިބުނު ފުރަތަމަ ފަހަރެވެ.

ތުރުކީވިލާތުން ބުނި ގޮތުގައި މި ގޭހުގެ ސަޕްލައިގެ މަޤްޞަދަކީ ޙާލުގައި ދިރިއުޅޭ ހަލަބާއި ޚަމްސުގެ ވަށައިގެންވާ ސަރަޙައްދުތަކުގައި ތިބި އެތައް މިލިއަން ސީރިއާ މީހުންނަށް މަދުވެގެން ދުވާލަކު 10 ގަޑިއިރަށް ކަރަންޓް ފޯރުކޮށްދިނުމަށެވެ. މި ސިޓީތަކަށް މިހާރު ކަރަންޓް ލިބެނީ ދުވާލަކު އެންމެ 3-4 ގަޑިއިރަށެވެ.

މި ޑީލުގެ ސަބަބުން ނަގުދުފައިސާއެއް ސީރިއާއިން ތުރުކީވިލާތަކަށް ނުލިބޭނެއެވެ. އަނެއްހެން ބުނާނަމަ މިއީ ބާޓަރ ސްޓައިލްގެ ޑީލެއް ކަމަށް ބެލެވެއެވެ.

ތުރުކިޔޭ މެދުވެރިކޮށް ސީރިއާ އަށް ދުވާލަކު 6 މިލިއަން ކިއުބިކް މީޓަރުގެ ގޭސް ފޮނުވައިދޭ މި ޑީލާއި އެކު ސަރަޙައްދީ ހަކަތަ ކޮރިޑޯއެއްގެ ގޮތުގައި ތުރުކިޔޭ އަށް ދެމިއޮތުމުގެ ބާރާއި ނުފޫޛު ލިބޭނެއެވެ. މީގެ އިތުރުން ތުރުކިޔޭއަށް އަޒަރުބައިޖާނާއި އަދި މި ޑީލަށް އެހީތެރިވެދޭ ޤަޠަރުން ވެސް އިޤްތިޞާދީ ނުވަތަ ސިޔާސީ ލުއިތަކެއް ލިބުން އެކަށީގެންވެއެވެ. ހަމަ އެހެންމެ ސީރިއާގެ އުތުރުގެ ސަރަޙައްދުތަކުގެ ނުފޫޒު ތުރުކިޔޭ އަށް ލިބި، އިތުރު ފައިދާތަކެއް ވެސް ލިބޭނެއެވެ.