ދެމެހެއްޓެނިވި ތަރައްގީ ރާއްޖެއަށް ހާސިލްކުރެވޭނީ ޗައިނާ އާއި އަވަށްޓެރި އެހެން ގައުމުތަކުގެ ބައިވެރިވުމާ އެކުގައި ކަމަށް ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމް މިއަދު ވިދާޅުވެއްޖެ އެވެ.
ނާޒިމް އެގޮތަށް ވިދާޅުވީ ހަވަނަ ޗައިނާ-ސައުތު އޭޝިއާ ކޯޕަރޭޝަން ފޯރަމްގައި ރާއްޖެ ތަމްސީލުކުރައްވައި ދެއްވި ތަގުރީރުގަ އެވެ.
ރައްޔިތުންގެ މަޖިލީހުން ބުނީ "ޖޮއިން ހޭންޑްސް ފޯ އޯޕަން އެންޑް އިންކްލޫސިވް ޑިވެލޮޕްމަންޓް"ގެ ތީމްގެ ދަށުން ބާއްވާ އެ ފޯރަމްގައި ނާޒިމް ވަނީ ސަރަހައްދީ ތަރައްގީއަށް މުހިންމު ފަސްނުކުތާއެއް ފާހަގަކުރައްވައިފައި ކަމަށެވެ.
އޭގެ ތެރޭގައި، ދަތުރުފަތުރާއި މުވާސަލާތުގެ ގުޅުމާއި ފެހި އިގުތިސާދީ ތަރައްގީ އާއި ބަދަހި އިގުތިސާދީ ގުޅުމާއި އިންސާނީ ތަރައްގީ އަދި ރައްޔިތުންގެ ފެންވަރުގައި ގުޅުން ބަދަހިކުރުން ހިމެނޭ ކަމަށް މަޖިލީހުން ބުންޏެވެ.
ނާޒިމް ވިދާޅުވީ ރާއްޖެއަކީ ކުޑަ ޖަޒީރާ ގައުމެއްގެ ހައިސިއްޔަތުން، ދެމެހެއްޓެނިވި ތަރައްގީ އާއި އިގުތިސާދީ ގޮންޖެހުންތަކާ ކުރިމަތިލުމަށް އެ މާރެސްއަށް މަސައްކަތްކުރާ ގައުމެއް ކަމަށެވެ. އަދި ރާއްޖެއިން ދެކެނީ، ހުޅުވާލެވިފައިވާ ހުރިހާ ފަރާތްތައް ޝާމިލުވާ، ދެމެހެއްޓެނިވި ތަރައްގީއެއް ކަށަވަރުކުރުމަށް ޗައިނާ އާއި އެހެނިހެން އަވަށްޓެރި ގައުމުތަކާ އެކު މަސައްކަތްކުރަން ޖެހޭ ކަމަށް ކަމަށް އޭނާ ވިދާޅުވި އެވެ.
ޗައިނާގެ ތަރައްގީގެ ކާމިޔާބީތައް ފާހަގަކުރައްވަމުން ނާޒިމް ވިދާޅުވީ ޗައިނާއިން ގެނެސްފައިވާ އިގުތިސާދީ އިސްލާހުތަކާއި އުމްރާނީ ތަރައްގީ އާއި އީޖާދީ ދާއިރާގެ އިންވެސްޓްމެންޓްތަކަކީ ކޮންމެ ގައުމަކަށް ވެސް އެ ގައުމެއްގެ ހާއްސަ ހަލަތަށް ބައްޓަންކުރެވިދާނެ ނަމޫނާއެއް ކަމަށެވެ.
"ތަރައްގީއަކީ ސްޓްރެޓެޖީއެއް ނޫން. އެއީ ގައުމަށްޓަކާ ވެވޭ ވައުދެއް. އަދި އެ ވައުދާއެކު ކުރިއަށްދާ ކޮންމެ ފިޔަވަޅެއްގައި ވެސް އެއްވެސް ފުރުސަތަކުން އެއްވެސް ފަރާތެއް އެކަހެރި ނުކުރެވޭނެ ޝާމިލް މަސައްކަތެއްކަން ޔަގީންކުރަން ޖެހޭ ވައުދެއް،" ނާޒިމް ވިދާޅުވި އެވެ.
