ބްރެޒިލްގެ ޤައުމީ ޓީމަށް އަނބުރާ އައުމަށް ބޭނުންވާކަމަށް އިޢުލާންކުރި އެ ޤައުމުގެ ފުޓުބޯޅަ ލެޖެންޑް ކަކާ އަށް އެ ފުރުޞަތު ލިބިއްޖެއެވެ. އޭނާ ބޭނުންވީ އަންނަން އޮތް ހެޑް ކޯޗު ކާލޯ އަންޗެލޮޓީގެ ދަށުން ކޯޗިންގ ސްޓާފުގެ ގޮތުގައި މަސައްކަތް ކުރުމަށެވެ.

އެންމެ ފަހުގެ ޚަބަރުތައް ބުނާ ގޮތުންނަމަ އެންޗެލޮޓީ ވަނީ އެ ފުރުސަތު ދީފައެވެ. 2007 ވަނަ އަހަރުގެ ބެލޮން ޑި އޯރު ހާސިލްކުރި ކަކާ ވަނީ ސެލެސާއޯއަށް އަނބުރާ އައުމަށް ދިން ފުރުސަތު ޤަބޫލު ކޮށްފައެވެ.

^{ކަކާ އާއި އެންޗެލޮޓީ: މި ދެމީހުން ވަނީ އެކުގައި އޭސީމިލާނުގައި ވެސް މަސައްކަތް ކޮށްފަ.}

2017 ގައި ޕްރޮފެޝަނަލް ފުޓްބޯޅައިން ވަކިވި ކަކާ ވަނީ ފާއިތުވި އަހަރުތަކުގައި މެނޭޖްމަންޓްގެ ދާއިރާއަށް ތައްޔާރުވަމުން ގޮސްފައެވެ. ބްރެޒިލް ޓީމުގައި މަސައްކަތް ކުރަން ދުރާލާ އޭނާ ދިޔައީ ތައްޔާރު ވަމުންނެވެ. އެގޮތުން، އޭނާ ވަނީ ހާވަޑް ޔުނިވަރސިޓީން ސްޕޯޓްސް ބިޒްނަސް ދިރާސާތައް ފުރިހަމަކޮށް، ބްރެޒިލް ފުޓްބޯޅަ ކޮންފެޑެރޭޝަން (ސީބީއެފް) މެދުވެރިކޮށް ކޯޗިންގ ލައިސަންސް ހޯދާފައެވެ. ގިނަ ވޯލްޑް ކަޕްތަކުގައި ބްރެޒިލްއަށް ކުޅެ، ބައިނަލްއަޤްވާމީ ފުޓްބޯޅައިގެ ގިނަ ތަޖުރިބާ ހުރި ކާކާއަކީ ވަރަށް މުހިންމު އެސެޓަކަށް ވާނެ އެވެ.

މިހާރު ރިއަލް މެޑްރިޑްގެ ހެޑް ކޯޗުގެ މަޤާމުގައި ހުރި އަންޗެލޮޓީ، މިމަހުގެ 26 ވަނަ ދުވަހު ބްރެޒިލް ޤައުމީ ޓީމުގެ ހެޑް ކޯޗުގެ މަޤާމު ރަސްމީކޮށް ހަވާލުވާނެ ކަމަށް ބެލެވެއެވެ. އަންޗެލޮޓީ އާއި ކަކާ ވަނީ އޭސީ މިލާން އަދި ރިއަލް މެޑްރިޑްގައި އެކުގައި މަސައްކަތްކޮށް ބޮޑެތި ކާމިޔާބީތައް ހޯދާފައެވެ.