އިނގިރޭސި ކުޅުންތެރިޔާ ޓްރެންޓް އެލެކްސަންޑަރ - އާނޯލްޑް ލިވަޕޫލުން ވަކިވެ ރިއަލް މެޑްރިޑަށް ބަދަލުވުމަށް ހަމަޖެހިފައިވާއިރު، އޭނާ އަވަހަށް ސޮއިކުރުވުމަށް ރިއަލް މެޑްރިޑުން މަސައްކަތް ފަށައިފިއެވެ.
26 އަހަރުގެ އެލެކްސަންޑަރ - އާނޯލްޑް ލިވަޕޫލުން ވަކިވެ ރިއަލް މެޑްރިޑަށް ބަދަލުވާން ހަމަޖެހިފައިވަނީ މި އަހަރުގެ ޖުލައި 1 ގައެވެ. ނަމަވެސް، ޖޫން 14 ގައި އެމެރިކާގައި ފެށޭ ފީފާ ކްލަބް ވޯލްޑް ކަޕްގައި އޭނާ ބައިވެރިކުރުވުމަށްޓަކައި، އަވަހަށް ސޮއިކުރުވުމަށް ރިއަލް މެޑްރިޑުން ލިވަޕޫލާ މަޝްވަރާ ފަށައިފިއެވެ.
އެލެކްސަންޑަރ-އާނޯލްޑްގެ ކޮންޓްރެކްޓް ލިވަޕޫލާއެކު ހަމަވަނީ ޖޫން 30 ގައި ކަމަށްވާތީ، އޭނާ އަވަހަށް ދޫކޮށްލުމަށް ލިވަޕޫލުން އެދެނީ 1 މިލިއަން ޔޫރޯއެވެ. ނަމަވެސް، ރިއަލް މެޑްރިޑުން ހުށަހަޅާފައިވަނީ 500,000 ޕައުންޑެވެ.
"ލިވަޕޫލްގައި 20 އަހަރު ހޭދަކުރުމަށްފަހު ވަކިވާން ޖެހުނީމާ ވަރަށް ދެރަވެސް ވޭ. އެކަމަކު ރިއަލް މެޑްރިޑަށް ބަދަލުވުމަކީ އަހަރެންގެ ކެރިއަރުގައި އިތުރު ކުރިއެރުމެއް ކަމަށް ދެކެން،" އާނޯލްޑް ބުންޏެވެ.
ލިވަޕޫލްގައި ހޭދަކުރި މުއްދަތުގައި އާނޯލްޑް ވަނީ ޕްރިމިއަރ ލީގާއި، ޗެމްޕިއަންސް ލީގާއި، އެފްއޭ ކަޕާއި، ކްލަބް ވޯލްޑް ކަޕް ހޯދާފައެވެ. އޭނާ ރިއަލް މެޑްރިޑަށް ބަދަލުވުމުން، އިނގިރޭސި އަނެއް ކުޅުންތެރިޔާ ޖޫޑް ބެލިންގަމްއާއެކު ކުޅުމުގެ ފުރުސަތު ލިބޭނެއެވެ.
ރިއަލް މެޑްރިޑުން އެލެކްސަންޑަރ-އާނޯލްޑް ސޮއިކުރުވުމަށް މަސައްކަތްކުރަނީ ކުރިއަށް އޮތް ސީޒަނަށް ޓީމު ވަރުގަދަކުރުމަށެވެ. އޭނާ ރިއަލް މެޑްރިޑުގައި ކުޅޭނީ ކުރީގެ ސްޕެއިން ކުޅުންތެރިޔާ ޑާނީ ކަރްވަހާލްއާ ވާދަކޮށްގެން ކަމަށް ބެލެވެއެވެ.
