ބަރެޒިލްގެ މަގުމައްޗަށް މިއަދު މަތިންދާބޯޓެއް ވެއްޓި ބަޔަކު މަރުވެއްޖެއެވެ.

މި ހާދިސާ ހިނގީ ބްރެޒިލްގެ ދެކުނުގައި އޮންނަ ސައޯ ޕައުލޯގެ މަގުމަތީގައެވެ.

ޚަބަރުތައް ބުނާ ގޮތުގައި ވެއްޓުނީ ކުޑަ މަތިންދާބޯޓެކވެ.. އެ ބޯޓު މަގުމައްޗަށް ވެއްޓި، ބަހަކާއި ޖެހުމުން މަދުވެގެން ދެ މީހަކު މަރުވެފައިވާ ކަމަށާއި މި ހާދިސާ ހިނގީ މިއަދު (7 ފެބްރުއަރީ 2025) ގެ ހެނދުނު 7:20 ހާއިރު ކަމަށް ޚަބަރުތައް ބުނެއެވެ.

މިލިޓަރީ ފުލުހުންނާއި ޙަވާލާދީ ސީއެންއެން ބްރެޒިލްގެ ރިޕޯޓުގައިވާ ގޮތުން މަތިންދާބޯޓުގައި ތިބި ދެ މީހުން މަރުވީ އަނދައިގެންނެވެ. އިތުރު ހަ މީހަކަށް އަނިޔާވިއިރު އެއީ މަތިންދާބޯޓު ޖެހުނު ބަހުގައި ތިބި މީހުން ކަމަށް ޚަބަރުތައް ބުނެއެވެ.

ބްރެޒިލްގެ އޮތޯރިޓީތަކާއި ޙަވާލާދީ ސީއެންއެން ބުރެޒިލުން ބުނާ ގޮތުގައި މަތިންދާބޯޓު ވެއްޓުމުގެ މަދު މިނެޓުތަކެއް ކުރިން ކޮންޓްރޯލް ޓަވަރާ މަތިންދާބޯޓާއި ދެމެދު ވަނީ ގުޅުން ކެނޑިފައެވެ.

އެސޯސިއޭޓެޑް ޕްރެސްއިން ބުނާ ގޮތުގައި މަތިންދާބޯޓު ވެއްޓުނީ އެ ބޯޓު ނައްޓާލިތަނާއި 5 ކިލޯމީޓަރު ދުރުމިނުގައެވެ.

ބްރެޒިލްގައި ވަރަށް ފަހުން ވެސް ކުޑަ މަތިންދާ ބޯޓެއް ވެއްޓި މަހުޖަނަކާއި އޭނާގެ ޢާއިލާ މަރުވިކަން ފާހަގަ ކުރެވެއެވެ.