ސަޢޫދީ ޢަރަބިއްޔާއިން އިސްރާއީލާއެކު ގުޅުން ޢާއްމުކުރުމަށް ފަލަސްޠީނު ދައުލަތެއް ޤާއިމުކުރުން ޝަރުޠުކޮށްފައިވާކަމަށް ބުނެ، އެމެރިކާގެ ރައީސް ޑޮނަލްޑް ޓްރަމްޕް ދެއްކި ވާހަކަ ސަޢޫދީ ޢަރަބިއްޔާއިން ދޮގުކޮށްފިއެވެ. މިކަން ސަޢޫދީ ޢަރަބިއްޔާގެ ފޮރިން މިނިސްޓްރީން ދޮގުކުރީ މިއަދު ނެރުނު ބަޔާނެއްގައެވެ.

ވައިޓް ހައުސްގައި އިސްރާއީލުގެ ބޮޑުވަޒީރު ބެންޖަމިން ނެތަންޔާހޫއާއެކު ބޭއްވި ބައްދަލުވުމެއްގައި ޓްރަމްޕް ވިދާޅުވީ ސަޢޫދީ ޢަރަބިއްޔާއިން ފަލަސްޠީނު ދައުލަތެއް ޤާއިމުކުރުމަށް ޝަރުޠު ނުކުރާ ކަމަށެވެ. ނަމަވެސް މިއީ ޙަޤީޤަތާ ޚިލާފު ވާހަކައެއްކަމަށް ސަޢޫދީ ޢަރަބިއްޔާއިން ބުނެފައިވެއެވެ.

ސަޢޫދީ ޢަރަބިއްޔާގެ ފޮރިން މިނިސްޓްރީގެ ބަޔާނުގައި ބުނެފައިވަނީ ފަލަސްނީ ފަލަސްޠީނު ދައުލަތެއް ޤާއިމުކުރުމާ ގުޅޭގޮތުން ސަޢޫދީ ޢަރަބިއްޔާގެ މައުޤިފަކީ "ދެމެހެއްޓެނިވި އަދި ބަދަލުނުވާނެ" މައުޤިފެއް ކަމަށެވެ. އަދި މިއީ "މަޝްވަރާކުރެވޭނެ ނުވަތަ އެއްބަސްވެވޭނެ" ކަމެއް ނޫން ކަމަށްވެސް ބުނެފައިވެއެވެ.

ސަޢޫދީ ޢަރަބިއްޔާގެ ބަޔާނުގައި އިތުރަށް ފާހަގަކޮށްފައިވަނީ 1967 ވަނަ އަހަރުގެ ބޯޑަރުތަކުގެ މައްޗަށް ބިނާކޮށް ފަލަސްޠީނު ދައުލަތެއް ޤާއިމުކުރުމަށާއި، އިސްރާއީލުން ފަލަސްޠީނުގެ ބިންތައް އޮކިއުޕައިކޮށްފައިވާ އޮކިއުޕޭޝަން ނިމުމަކަށް ގެނައުމަށް ސަޢޫދީ ޢަރަބިއްޔާއިން ގޮވާލާކަމަށެވެ. މިއީ ކުރީގެ އަދި މިހާރުގެ އެމެރިކާގެ އިދާރާތަކަށް ކުރިންވެސް ސާފުކޮށްދީފައިވާ ކަމެއްކަމަށްވެސް ބަޔާނުގައި ބުނެފައިވެއެވެ.

މި ބަޔާނުގައި ސަޢޫދީ ޢަރަބިއްޔާގެ ވަލީ އަހުދު އަމީރު މުޙައްމަދު ބިން ސަލްމާން ވިދާޅުވެފައިވާ ބަސްފުޅުތަކެއްވެސް ހަވާލާދީފައިވެއެވެ. އޭގެ ތެރޭގައި 2024 ވަނަ އަހަރުގެ ސެޕްޓެމްބަރު 18 ވަނަ ދުވަހު ޝޫރާ ކައުންސިލުގެ 9 ވަނަ ދައުރުގެ ފުރަތަމަ ޖަލްސާ ފެށުމުގެ ރަސްމިއްޔާތުގައި ދެއްކެވި ވާހަކަފުޅާއި، 2024 ވަނަ އަހަރުގެ ނޮވެމްބަރު 11 ވަނަ ދުވަހު ރިޔާދުގައި ބޭއްވުނު ޢަރަބި-އިސްލާމީ ސަމިޓުގައި ދެއްކެވި ވާހަކަފުޅު ހިމެނެއެވެ.