އިނގިރޭސި ޕްރިމިއަރ ލީގުގައި ލިވަޕޫލުން މިރޭ ރެލިގޭޝަނުގައި އޮތް އިޕްސްވިޗް ކޮޅަށް ހަތަރު ގޯލު ޖަހައި ތާވަލުގެ އެއްވަނައިގައި ހަމަޖެހިލައިފި އެވެ. މި މެޗު ލިވަޕޫލް ކާމިޔާބު ކުރީ ހަތަރު ލަނޑު އެއް ލަނޑުންނެވެ.

ލިވަޕޫލް އަމިއްލަ ދަނޑުގައި ކުޅުނު މި މެޗުގެ ފުރަތަމަ ލަނޑު 11 ވަނަ މިނެޓުގައި ޖެހީ ސޮބޮސްލައި އެވެ. މެޗުގެ 35 ވަނަ މިނެޓުގައި އެ ޓީމުގެ ހުނަރުވެރި ފޯވާޑު ސަލާހު ގޯލެއް ޖަހާފައިވާއިރު އޭނާ އަކީ މިވަގުތު ޕްރިމިއަރ ލީގުގެ މި ސީޒަނުގައި އެންމެ ގިނަ ގޯލު ޖެހި ކުޅުންތެރިޔާއެވެ. ސަލާހު މިހާތަނަށް 19 ގޯލު ޖަހާފައިވާއިރު މެންވެސްޓަރ ސިޓީގެ ހާލަންޑު ލިސްޓުގެ ދެވަނައިގައި އޮތީ 17 ގޯލާއެކު އެވެ. އެސިސްޓުގައި ވެސް އެންމެ ކުރީގައި އޮތީ ސަލާހު އެވެ.

ފުރަތަމަ ހާފު ނިމުމުގެ ކުރިން 44 ވަނަ މިނެޓުގައި ގަކްޕޯ ވަނީ ގޯލެއް ޖަހައި ލިވަޕޫލްގެ ލީޑު ފުޅާކޮށްދީފައެވެ. އަދި ދެވަނަ ހާފު ފަށައިގެން 66 ވަނަ މިނެޓުގައި އޭނާ ވަނީ އިތުރު ގޯލެއް ޖަހާފައެވެ. އިޕްސްވިޗްގެ ހަމައެކަނި ގޯލު މެޗު ނިމުމުގެ ކުރިން 90 ވަނަ މިނެޓުގައި އެ ޓީމަށް ކާމިޔާބުކޮށްދިނީ ޖެކޮބް ގްރީވްސް އެވެ.

މި ބައްޔާއެކު އިޕްސްވިޗް އޮތީ ކުރިންވެސް އޮތް ހިސާބުގައި ތާވަލުގެ 18 ވަނައިގަ އެވެ. ލިވަޕޫލު އެއްވަނައިގައި އެއް މެޗު މަދުން ކުޅެ 6 ޕޮއިންޓުގެ ލީޑެއް އެބައިނެވެ.

މިރޭ ކުޅުނު އެހެން މެޗުތަކަށް ބަލާއިރު ވުލްވްސް އަދި އާސެނަލް ބައްދަލުކުރި މެޗު އާސެނަލުން ކާމިޔާބު ކޮށްފައިވަނީ 1-0 ގެ ނަތީޖާއިންނެވެ. ބޯންމައުތްއިން 5-0 އިން ނޮޓިންހަމް ފޮރެސްޓު ބަލިކުރިއިރު އެވަޓަން އިން ބްރައިޓަން ބަލިކޮށްފައިވަނީ 1-0 ގެ ނަތީޖާ އަކުންނެވެ. އަދި ނިއުކާސަލް އާއި ސަތަމްޓަން ބައްދަލުކުރި ނިމުނީ 3-1 އިން ނިއުކާސަލް މޮޅުވެގެންނެވެ.

ޕްރިމިއަރ ލީގު އެންމެ ފަހުގެ ޗެމްޕިއަން މެންޗެސްޓަރ ސިޓީ މިރޭ ޗްލްސީއާ ދެކޮޅަށް ނިކުންނާނެ އެވެ. އިއްތިހާދު ސްޓޭޑިއަމްގައި ކުޅޭ މި މެޗު ފަށާނީ ރާއްޖެ ގަޑިން 22:30 ގަ އެވެ.