އިސްރާއީލުން ޣައްޒާގައި ހަމަލާދީ ފަލަސްތީނުގެ ސިވިލް ޑިފެންސް މެންބަރަކު ޝަހީދުކޮށްލައިފި

އިސްރާއީލުގެ އިސްތިއުމާރީ ބާރުތަކުން ޣައްޒާއަށް ދެމުންގެންދާ ނުރައްކާތެރި ހަމަލާތަކުގައި، ފަލަސްތީނުގެ ސިވިލް ޑިފެންސްގެ މެންބަރަކު ޝަހީދުކޮށްލައިފިއެވެ.

އިސްރާއީލު ސިފައިން ދިން މި ހަމަލާ އަމާޒުވެފައިވަނީ އާންމުން ސަލާމަތްކުރުމުގެ އިންސާނީ މަސައްކަތުގައި ހަރަކާތްތެރިވަމުންދިޔަ ސިވިލް ޑިފެންސްގެ ޓީމަކަށެވެ. މި ހަމަލާގައި އެ އިދާރާގެ މުވައްޒަފަކު ޝަހީދުވުމުގެ އިތުރުން އިތުރު ބަޔަކު ޒަޚަމްވެފައިވާ ކަމަށްވެސް މައުލޫމާތު ލިބެއެވެ.

ޣައްޒާގެ ސިވިލް ޑިފެންސް އިދާރާއިން ހާމަކުރި ގޮތުގައި، އިސްރާއީލުން ދަނީ އެހީތެރިކަން ފޯރުކޮށްދޭ ފަރާތްތަކަށާއި، ކުއްލި ނުރައްކަލުގެ ހާލަތްތަކުގައި ހަރަކާތްތެރިވާ މީހުން ސަލާމަތްކުރާ ޓީމުތަކަށް ގަސްދުގައި ހަމަލާދެމުންނެވެ. މިއީ ބައިނަލްއަޤްވާމީ އިންސާނީ ޤާނޫނުތަކާ ކަނޑައެޅިގެން ޚިލާފު، ޖަރީމާއެއް ކަމަށް އެ އިދާރާއިން ވަނީ ފާހަގަކޮށްފައެވެ.

އިސްރާއީލުން ޣައްޒާއަށް ދެމުންދާ ހަމަލާތަކުގައި މިހާތަނަށް ސިއްހީ ޚިދުމަތްތެރިންނާއި، ސިވިލް ޑިފެންސްގެ ގިނަ އަދަދެއްގެ މުވައްޒަފުން ވަނީ ޝަހީދުކޮށްލާފައެވެ. މިފަދަ ހަމަލާތަކުގެ ސަބަބުން ވެއްޓިފައިވާ އިމާރާތްތަކުގެ ދަށުން މީހުން ސަލާމަތްކުރުމަށާއި، ޒަޚަމްވާ މީހުންނަށް އަވަސް ފަރުވާ ދިނުމަށް ކުރަމުންދާ މަސައްކަތްތަކަށް ވަނީ ބޮޑެތި ހުރަސްތަކެއް އެޅިފައެވެ.