ޣައްޒާ ސިޓީގެ އާންމުން ދިރިއުޅޭ އެޕާޓްމަންޓަކަށް ޔަހޫދީ އިސްރާއީލުގެ އަސްކަރިއްޔާއިން ދިން ނުރައްކާތެރި ވައިގެ ހަމަލާއެއްގައި، ފަލަސްތީނުގެ މަދުވެގެން ފަސް މީހުން ޝަހީދުވެ، އިތުރު ބަޔަކު ޒަޚަމްވެއްޖެއެވެ.
މި ހާދިސާ ހިނގާފައިވަނީ ޣައްޒާ ސިޓީގެ މީހުން ގިނައިން ދިރިއުޅޭ އަވަށެއްގައި ހުރި އިމާރާތަކަށް އަމާޒުކޮށް އިސްރާއީލުގެ ހަނގުރާމަމަތީ މަތިންދާބޯޓުތަކުން ކުއްލި ގޮތަކަށް ދިން ބޮމުގެ ހަމަލާތަކެއްގައެވެ. މަސްދަރުތަކުން ރިޕޯޓްކުރާ ގޮތުގައި މި ހަމަލާގައި ޝަހީދުވި މީހުންގެ ތެރޭގައި ކުށެއްނެތް އާންމު ރައްޔިތުންނާއި ކުޑަކުދިން ހިމެނެއެވެ. އަދި ހަމަލާގެ ސަބަބުން އެ ސަރަހައްދުގެ އެތައް އިމާރާތަކަށް ވަނީ ބޮޑެތި ގެއްލުންތަކެއް ލިބި، ސުންނާފަތިވެފައެވެ.
މެދުކެނޑުމެއްނެތި އިސްރާއީލުން ދެމުންގެންދާ މިފަދަ އަނިޔާވެރި ހަމަލާތަކުގެ ސަބަބުން، ޣައްޒާގެ ހާލަތު އިތުރަށް ގޯސްވަމުންދާއިރު، ސުންނާފަތިވެފައިވާ އިމާރާތްތަކުގެ ދަށުން މީހުން ސަލާމަތްކުރުމުގެ މަސައްކަތް ރެސްކިއު ޓީމުތަކުން ދަނީ ކުރަމުންނެވެ. ނަމަވެސް، ޒަރޫރީ ސާމާނާއި ސިއްހީ ވަސީލަތްތައް މަދުވުމުގެ ސަބަބުން މީހުން ސަލާމަތްކުރުމަށް ބޮޑެތި ހުރަސްތަކެއް ވަނީ ކުރިމަތިވެފައެވެ.
