ޔަމަނުގެ ޙޫޘީ ހަނގުރާމަވެރިންނަށް އެހީތެރިކަން ފޯރުކޮށްދިން ކަމުގެ ތުހުމަތުގައި އެމެރިކާގެ ޑިޕާޓްމަންޓް އޮފް އެނާޖީ (އީޑީ) ގައި މަސައްކަތްކުރާ އިސް އިންޖިނިއަރަކު އެމެރިކާގެ ކަމާބެހޭ ފަރާތްތަކުން ހައްޔަރުކޮށްފިއެވެ.
އެމެރިކާގެ ޖަސްޓިސް ޑިޕާޓްމަންޓުން ހާމަކޮށްފައިވާ ގޮތުގައި، މި މައްސަލައިގައި ހައްޔަރުކޮށްފައިވަނީ އުމުރުން 41 އަހަރުގެ އެމެރިކާގެ ރައްޔިތެއް ކަމަށްވާ ރަހީމް ޢަބްދުލް ޢަޒީޒެވެ. އޭނާ ހައްޔަރުކޮށްފައިވަނީ އެމެރިކާއިން ޓެރަރިސްޓް ޖަމާއަތެއްގެ ގޮތުގައި ކަނޑައަޅާފައިވާ ޙޫޘީ ހަރަކާތަށް އެހީތެރިކަން ދިނުމާއި، ގައުމީ ސަލާމަތާ ގުޅުންހުރި ސިއްރު މައުލޫމާތުތަކެއް ފޯރުކޮށްދޭން އުޅުނު ކަމުގެ ތުހުމަތުގައެވެ.
އޭނާ މަސައްކަތް ކުރަމުން ދިޔައީ އެމެރިކާގެ ނިއުކްލިއަރ ސެކިއުރިޓީއާ ގުޅޭ ނާޒުކު މައުލޫމާތުތައް ބަލަހައްޓާ އެނާޖީ ޑިޕާޓްމަންޓުގެ އިސް މަގާމެއްގައެވެ. ތަހުގީގީ އިދާރާތަކުން ބުނާ ގޮތުގައި، އޭނާ ވަނީ ޙޫޘީންގެ ފަރާތުން ކަމަށް ބުނެ ވާހަކަދެއްކި އެފްބީއައިގެ ސިއްރު އެޖެންޓަކަށް އެމެރިކާގެ އަސްކަރީ އަދި ސަލާމަތީ އިންފްރާސްޓްރަކްޗަރާ ގުޅޭ މުހިންމު ސިއްރު މައުލޫމާތުތަކެއް ހިއްސާކުރަން އެއްބަސްވެފައެވެ.
Advertisement
މި މައްސަލައިގައި އޭނާގެ މައްޗަށް ވަނީ ބޭރުގެ ޓެރަރިސްޓް ޖަމާއަތަކަށް އެހީތެރިވުމަށް މަސައްކަތްކުރުމުގެ ދައުވާ އުފުލާފައެވެ. ކުށް ސާބިތުވެއްޖެނަމަ އޭނާއަށް 20 އަހަރުގެ ޖަލު ހުކުމެއް އައުން އެކަށީގެންވެއެވެ.
މި ހާދިސާ ހިނގާފައި މިވަނީ، ޣައްޒާގައި އިސްރާއީލުން ހިންގަމުންދާ ގަތުލުއާންމާއި އަނިޔާވެރިކަމާ ދެކޮޅަށް ފަލަސްތީނުގެ ރައްޔިތުންނަށް ތާއީދުކޮށް، ރަތް ކަނޑުގައި ދަތުރުކުރާ އިސްރާއީލާ ގުޅުންހުރި އުޅަނދުތަކަށް ޙޫޘީން ހަމަލާތައް ދެމުންދާ ދަނޑިވަޅެއްގައެވެ. މިއާއެކު އެމެރިކާއިން ވަނީ ޙޫޘީންގެ ހަރަކާތްތަކާ ދެކޮޅަށް އަސްކަރީ އަދި ޖާސޫސީ ފިޔަވަޅުތައް ވަރުގަދަކޮށްފައެވެ.
