ރާއްޖެއަށް ވަންނަ ބޭރު ފައިސާއަކީ ވަކި ފަރުދެއްގެ ނުވަތަ ވަކި ބައެއްގެ އަމިއްލަ އެއްޗެއް ނޫން ކަމަށާއި، އެއީ ދައުލަތުގެ މިލްކެއް ކަމަށް ޤާނޫނުއަސާސީ އިސްލާހުކުރި ކޮމެޓީގެ މުގައްރިރުކަން ކުރެއްވި އަދި އެމްޑީޕީގެ ކުރީގެ ރައީސް އިބްރާހިމް އިސްމާއީލް (އިބްރާ) ވިދާޅުވެއްޖެއެވެ.
މަންދު ކޮލެޖްގެ ޗެއާމަންކަން ވެސް ކުރައްވަމުން އަންނަ އިބްރާ މިހެން ވިދާޅުވީ، ރިސޯޓްތަކަށް ލިބޭ ބޭރު ފައިސާގެ ތެރެއިން 40 އިންސައްތަ ދިވެހި ބޭންކުތަކަށް މާރުކުރަންޖެހޭ ގޮތަށް ސަރުކާރުން ނިންމި ނިންމުމާ ގުޅިގެން އިދިކޮޅު ފަރާތްތަކުން ފާޑުކިޔަމުންދާ ދަނޑިވަޅެއްގައެވެ.
އޭނާ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ބޭރު ފައިސާ ލިބުމުގެ ދަތިކަން ފިލުވުމަށް ސަރުކާރުން އަޅަމުންދާ ފިޔަވަޅުތަކުގެ ހަގީގަތް އޮޅުވާލަން ސިޔާސީ ބޭނުމެއްގައި އެކި ވާހަކަތައް ދައްކަމުންދާ ކަމަށެވެ.
Advertisement
އިބްރާހިމް އިސްމާއީލް ހުށަހެޅުއްވި ގޮތުގައި، ރާއްޖެއަށް އެތެރެވާ ބޭރު ފައިސާ ދޭންޖެހޭނީ ސީދާ ދައުލަތަށެވެ. އަދި އެ ފައިސާ ގެނައި ފަރާތަކަށް އޭގެ ބަދަލުގައި ވާނެ ހަމައަގު ދިވެހި ރުފިޔާއިން ދައުލަތުން ދޭންޖެހޭނެ ކަމަށް އޭނާ ވިދާޅުވިއެވެ. މީގެ އިތުރުން، ވިޔަފާރިތަކަށާއި އެކި ބޭނުންތަކަށް ބޭރު ފައިސާ ބޭނުންވާ އާންމުންނަށް، ކަނޑައެޅިގެން ޢާންމުކޮށްފައިވާ ހަރުދަނާ އުޞޫލެއްގެ ދަށުން ދައުލަތުން އެ ފައިސާ ދޫކުރަންވާނެ ކަމަށް ވެސް އޭނާ ފާހަގަކުރެއްވިއެވެ.
އޭނާ އިތުރަށް ވިދާޅުވީ، މިފަދަ ހަރުދަނާ އުޞޫލެއްގެ ދަށުން ކަންކަން ހިންގޭނަމަ، ދިވެހިރާއްޖޭގެ ބޭނުންތަކަށް ބޭނުންވާ ވަރަށް ބޭރު ފައިސާ މި ޤައުމަށް ވަންނަކަމަށެވެ.
އިބްރާ މިހެން ވިދާޅުވެފައި މި ވަނީ ޑޮލަރުގެ ކަޅު ބާޒާރެއް އުފައްދައިގެން ގާނޫނާ ޚިލާފަށް ބޮޑު އާމްދަނީއެއް ބަޔަކު ހޯދަމުންދާ ވަގުތެއްގައެވެ.
ސަރުކާރުން މިހާރު ދަނީ މިފަދަ ދެކޮޅުޖެހޭ އުސޫލުތަކެއްގެ ދަށުން، ޑޮލަރުގެ ދަތިކަން ދާއިމީ ގޮތެއްގައި ޙައްލުކޮށް، ދިވެހިންނަށް ހަމައަގުގައި ޑޮލަރު ލިބޭނެ އިންތިޒާމު ހަމަޖައްސަން ގިނަ މަސައްކަތްތަކެއް ކުރަމުންނެވެ.
