ދުނިޔޭގައި މިހާތަނަށް އަޅާ އެންމެ ވަރުގަދަ ފިޔަވަޅުތައް އީރާނާ ދެކޮޅަށް އަޅައިފި ކަމަށް ޓްރަމްޕް އިޢުލާން ކޮށްފި

ދުނިޔޭގައި މިހާތަނަށް އަޅާ އެންމެ ވަރުގަދަ އިޤްތިޞާދީ ފިޔަވަޅުތައް އީރާނާ ދެކޮޅަށް އަޅައިފި ކަމަށް އެމެރިކާގެ ރައީސް ޑޮނަލްޑް ޓްރަމްޕް އިޢުލާން ކުރައްވައިފިއެވެ.

އީރާނާއި ދެކޮޅަށް މި އެޅީ ތާރީޚުގައިވެސް ގައުމަކާ ދެކޮޅަށް އަޅާ އެންމެ ވަރުގަދަ އިގްތިސާދީ ފިއްތުންތައް ކަމަށް ވިދާޅުވެ އެކަން ޓްރަމްޕް އިޢުލާން ކުރެއްވީ، ސޯޝަލް މީޑިއާ ޕްލެޓްފޯމް ކަމަށްވާ "ޓްރުތް ސޯޝަލް" ގައެވެ.

މި ފިޔަވަޅުތަކުގެ އެންމެ ނުރައްކާތެރި ބަޔަކީ، އީރާނުގެ ބޭންކުތަކަށް، ކުންފުނިތަކަށް، އެއާޕޯޓްތަކަށް ނުވަތަ ސަރުކާރުގެ އިދާރާތަކަށް އެހީތެރިކަން ފޯރުކޮށްދޭ ކޮންމެ ގައުމަކަށްވެސް އެމެރިކާގެ ފަރާތުން ބޮޑެތި އިގްތިސާދީ އަދަބުތަކާއި ހަރުކަށި ޓެރިފްތަކާ ކުރިމަތިލާން ޖެހުން ކަމަށް ޓްރަމްޕް ވިދާޅުވިއެވެ.

އީރާނަށް އެއްވެސް ކަހަލަ އެހީގެ މަގެއް ހުޅުވައިދޭ ކޮންމެ ގައުމަކަށް އިންތިހާ ބޮޑެތި އިގްތިސާދީ ގެއްލުންތަކާ ކުރިމަތިލާން ޖެހޭނެ. ސިއްރުން ތެޔޮ ވިއްކުމާއި، ފައިސާ ބަދަލުކުރުމާއި، ސިއްރު ކުންފުނިތައް މެދުވެރިކޮށް ކުރާ ހުރިހާ ވިޔަފާރިއެއް މިހާރުން މިހާރަށް ހުއްޓާލަން ޖެހޭނެ ކަމަށް ވެސް ޓްރަމްޕްގެ ބަޔާނުގައި ވިދާޅުވެފައިވެއެވެ.

ޓްރަމްޕް ހާމަކުރެއްވި ގޮތުގައި އީރާން މިހާރު ވަނީ ވަރަށް ބޮޑަށް ބަލިކަށިވެ، ދަރާފައެވެ. އެހެންކަމުން، މި ފިޔަވަޅުތަކުގެ ސަބަބުން އެގައުމުގެ އިގްތިސާދު މުޅިން ފުނޑި، އެގައުމުގެ އަސްކަރިއްޔާއަށާއި އެކި ޖަމާއަތްތަކަށް ފަންޑުކުރުން މުޅިން ހުއްޓޭނެއެވެ. އޭނާ ވަނީ އެމެރިކާގެ ހުރިހާ އެކުވެރި ގައުމުތަކުން މިކަމުގައި އެމެރިކާއާއެކު ސާބިތުވެ ތިބުމަށް ގޮވާލައްވާފައެވެ۔