އިންސްޓަގްރާމާއި ފޭސްބުކް ފަދަ ސޯޝަލް މީޑިއާ ޕްލެޓްފޯމްތަކުގެ ސަބަބުން ކުޑަކުދިންނާއި ފުރާވަރުގެ ކުދިންގެ ނަފްސާނީ ދުޅަހެޔޮކަމަށް ނޭދެވޭ އަސަރުތަކެއް ކުރަމުންދާ ކަމަށް ބުނެ، އެ ޕްލެޓްފޯމްތަކުގެ މައި ކުންފުނި ކަމަށްވާ މެޓާއާ ދެކޮޅަށް އެމެރިކާގެ 30 ސްޓޭޓަކުން ގުޅިގެން 1 ޓްރިލިއަން ޑޮލަރުގެ ބޮޑު ދައުވާއެއް ކޯޓަށް ހުށަހަޅައިފިއެވެ.
ކެލިފޯނިއާ އަދި ނިއުޔޯކް ހިމެނޭ ގޮތަށް އެމެރިކާގެ އާބާދީގެ ތިންބައިކުޅަ ދެބައި ތަމްސީލުކުރާ މި ސްޓޭޓްތަކުން ހުށަހެޅި މި މައްސަލަ ބައްލަވާނީ ކެލިފޯނިއާގެ ޑިސްޓްރިކްޓް ފަނޑިޔާރު އިވޯން ގޮންޒާލޭޒް ރޮޖާސް އެވެ.
މި މައްސަލަ ފެންމަތިވެފައި މިވަނީ، މެޓާގެ ޕްލެޓްފޯމްތަކުގެ ސަބަބުން ފުރާވަރުގެ ކުދިންނަށް ގެއްލުންވަމުންދާ ކަމަށް ކަނޑައަޅައި، ނިއު މެކްސިކޯގެ ފަނޑިޔާރަކު އެ ކުންފުނި 942 މިލިއަން ޑޮލަރުން ޖޫރިމަނާކޮށް، އެއީ "ޕަބްލިކް ނިއުސެންސް" އެއް ކަމަށް ދާދިފަހުން ހުކުމްކޮށްފައި ވަނިކޮށެވެ. އެ ހުކުމުގައި 18 އަހަރުން ދަށުގެ ކުދިންނަށް ލައިކްގެ އަދަދު ނުފެންނާނެހެން ހެދުމަށާއި، ބަރަހަނާ ފޮޓޯ ބަދަލުކުރުން ހުއްޓުވުމަށް ވެސް އަމުރުކޮށްފައިވެއެވެ. ނަމަވެސް މެޓާއިން ވަނީ އެ މައްސަލަ އިސްތިއުނާފު ކުރާނެ ކަމަށް ބުނެފައެވެ.
Advertisement
އަލަށް ހުށަހެޅުނު ދައުވާގެ މައިގަނޑު އަސާސް ބިނާވެފައިވަނީ ސޯޝަލް މީޑިއާގެ ސަބަބުން ކުދިން މާޔޫސްވުމާއި، އެކަނިވެރިކަން އިހުސާސްވުމާއި އަދި އަމިއްލަ ސޫރައާމެދު އޮންނަ އިތުބާރު ގެއްލުން ފަދަ ނުރައްކާތައް ކުރިމަތިވާ ކަމަށް ބުނެއެވެ. މިކަން ސާބިތުކުރުމަށް ސްޓޭޓްތަކުން ހުށަހެޅި ހެކިތަކުގެ ތެރޭގައި، އިންސްޓަގްރާމްގެ ސަބަބުން ޒުވާނުންގެ ނަފްސާނީ ހާލަތު ގޯސްވާކަން ހާމަވާ މެޓާގެ އަމިއްލަ އެތެރޭގެ ދިރާސާ ރިޕޯޓްތައްވެސް ހިމެނެއެވެ.
ދައުވާކުރާ ފަރާތްތަކުން ތުހުމަތުކުރާ ގޮތުގައި، އިންސްޓަގްރާމާއި ފޭސްބުކަކީ ކުޑަކުދިން އެއަށް ދެވިހިފާ ގޮތަށް ގަސްދުގައި ފަރުމާކޮށްފައިވާ އެޕްތަކެކެވެ. އެގޮތުން ޕޯސްޓްތަކަށް ލިބޭ ލައިކްތަކާއި، ނޮޓިފިކޭޝަންތަކާއި، ވަގުތުކޮޅަކަށްފަހު ގެއްލޭ ޕޯސްޓްތަކުގެ އިތުރުން އެލްގޮރިދަމިކް ރެކޮމެންޑޭޝަންތަކަކީ ކުދިން އެޕްލިކޭޝަންތަކުގައި ހޭދަކުރާ ވަގުތު އިތުރުކޮށް، އެއަށް ބަރޯސާވާ މިންވަރު މަތިކުރުމަށް ރޭވިގެން ފަރުމާކޮށްފައިވާ ކަންކަމެވެ.
މި މައްސަލައިގައި ސްޓޭޓްތަކުން ބަދަލުގެ ގޮތުގައި 1 ޓްރިލިއަން ޑޮލަރަށްވުރެ ބޮޑު އަދަދެއް ހޯދުމުގެ އިތުރުން، މެޓާގެ ޕްލެޓްފޯމްތަކަށް މުހިންމު ބަދަލުތަކެއް ގެނައުމަށް ވަނީ އެދިފައެވެ. އޭގެ ތެރޭގައި ހިމެނެނީ:
- ކުޑަކުދިންނަށް ޕޯސްޓްތަކުގެ 'ލައިކް' އަދަދު ނުފެންނަ ގޮތް ހެދުން
- މެދުކެނޑުމެއްނެތި ކޮންޓެންޓް ދައްކުވައިދޭ 'އިންފިނިޓް ސްކްރޯލް' އާއި 'އޮޓޯޕްލޭ' ފީޗާތައް ހުއްޓުވުން
- ބެލެނިވެރިން މެދުވެރިކޮށް ކުދިންގެ އުމުރު ކަށަވަރުކުރެވޭނެ ހަރުދަނާ ނިޒާމެއް ގާއިމުކުރުން
- މީހާގެ އަސްލު ސޫރަ ބަދަލުކޮށްދޭ ފިލްޓަރތައް ނައްތާލުން
- ކުދިންނަށް ދައްކާ ކޮންޓެންޓް ކޮންޓްރޯލްކުރާ އެލްގޮރިދަމްތައް ހަނިކުރުން
- ފުރާވަރުގެ ކުދިން އެކަކު އެއް އެކައުންޓަށްވުރެ ގިނަ އެކައުންޓް ހެދުން ހުއްޓުވުން
މި ތުހުމަތުތައް ދޮގުކުރަމުން މެޓާ ކުންފުނިން ބުނެފައިވަނީ، ޒުވާނުންނާއި ކުޑަކުދިންގެ ރައްކާތެރިކަމަކީ އެ ކުންފުނިން އަބަދުވެސް އެންމެ އިސްކަންދޭ އެއް ކަންތައް ކަމަށެވެ. އަދި މި މައްސަލައިގައި ކޯޓަށް ހުށަހަޅާ ހެކިތަކުން ކުންފުނީގެ ދިފާއު ސާބިތުވާނެ ކަމުގެ ފުރިހަމަ އިތުބާރު އެބައޮތް ކަމަށްވެސް މެޓާއިން ހާމަކޮށްފައިވެއެވެ.
މި ދައުވާގައި އެމެރިކާގެ ބޮޑު އާބާދީއެއް ތަމްސީލުވާތީ، މެޓާއާ ދެކޮޅަށް ކޯޓުން ހުކުމެއް ކޮށްފިނަމަ، މުޅި އެމެރިކާގައި އިންސްޓަގްރާމާއި ފޭސްބުކް ހިންގާ އުސޫލުތަކަށާއި އެޕްތަކުގެ ފަރުމާއަށް ބޮޑެތި ބަދަލުތަކެއް ގެންނަން އެ ކުންފުންޏަށް މަޖުބޫރުވެގެންދާނެއެވެ.
