ޣައްޒާގައި ކުރިއަށްދާ ދިގުލާފައިވާ ހަނގުރާމައިގައި ލިބެމުންދާ ޖިސްމާނީ އަދި ނަފްސާނީ ބަލިތަކުގެ ސަބަބުން، އިސްރާއީލުގެ ހޮސްޕިޓަލްތަކަށް ނުކަތާވަރަށް ސިފައިން ބަލިވެ، މުޅި މެޑިކަލް ނިޒާމަށް ވަނީ ބޮޑު ގޮންޖެހުމަކާއި ކުރިމަތިލާންޖެހިފައި ކަމަށާއި ނުކުޅެދުންތެރިވާ ސިފައިންގެ ޖުމްލަ އަދަދު ކުރިއަށް އޮތް ދޮޅުއަހަރެއްހާ ދުވަހުގެ ތެރޭގައި (2028 އާ ހަމައަށް) 1 ލައްކައަށް (100,000 އަށް) އަރާނެ ކަމަށް އިސްރާއީލުގެ ޑިފެންސް މިނިސްޓްރީގެ ރިހެބިލިޓޭޝަން ޑިޕާޓްމަންޓުގެ ރަސްމީ އަންދާޒާތަކުން ދައްކައިފިއެވެ.

ޣައްޒާ ހަނގުރާމައިގެ ސަބަބުން މިހާތަނަށްވެސް 82,400 އަށްވުރެ ގިނަ ސިފައިން ވަނީ މި ލިސްޓުގައި ހިމެނި ފަރުވާ ހޯދަން ފަށާފައެވެ.

ހޮސްޕިޓަލްތަކުގެ ޖާގަ ފުރި، ކޮންމެ މަހަކު އެވްރެޖްކޮށް 1,000 އަށްވުރެ ގިނަ އާ ސިފައިން ދަނީ ނުކުޅެދޭ ސިފައިންގެ ދަފްތަރުގައި އަލަށް ރަޖިސްޓްރީވަމުންނެވެ.

ޖިސްމާނީ އަނިޔާތަކުގެ އިތުރުން، ހޮސްޕިޓަލްތަކުގެ ސައިކޭޓްރިކް ވޯޑްތަކަށް ނުކަތާވަރަށް ނަފްސާނީ ބަލިތަކުގެ ސިފައިން ވަނީ އިތުރުވެފައެވެ. އަންދާޒާކުރެވޭ 1 ލައްކަ ސިފައިންގެ ތެރެއިން ގާތްގަނޑަކަށް 50,000 ސިފައިންނަކީ ސީދާ ޕޯސްޓް-ޓްރައުމެޓިކް ސްޓްރެސް ޑިސްއޯޑަރ (ޕީއެސްޓީޑީ) އާއި ޑިޕްރެޝަން ފަދަ ނަފްސާނީ ބަލިތަކަށް ދާއިމީކޮށް ފަރުވާކުރަންޖެހޭނެ މީހުން ކަމަށް އިސްރާއީލުން ބުނެއެވެ.

މީގެ އިތުރުން ހަނގުރާމައިގެ މައިދާނުން ލިބުނު ބިރުވެރި ސިހުންތަކުގެ ސަބަބުން އަލަށް ރިހެބިލިޓޭޝަނަށް ވައްދާ ސިފައިންގެ 65 އިންސައްތަ އަކީ ނަފްސާނީ އެހީތެރިކަމަށް ބޭނުންވެފައިވާ މީހުން ކަމަށްވާއިރު، އެކަށީގެންވާ ވަގުތަށް ފަރުވާ ނުލިބުމުގެ ސަބަބުން ސިފައިން އަމިއްލައަށް މަރުވުމުގެ ހާދިސާތައް ވެސް އިތުރުވަމުން އަންނަ ކަމަށް އިސްރާއީލުން ބުނެއެވެ.