އީރާނުގެ އެންމެ މަތީ ދީނީ އަދި ސިޔާސީ ލީޑަރުގެ މަގާމު ފުރުއްވި އާޔަތުﷲ އަލީ ޚާމަނާއީގެ ހަށިކޮޅު، އޭނާ އުފަންވެވަޑައިގެންނެވި މަޝްހަދު ސިޓީގައި ހުންނަ ޝީޢީންގެ އެންމެ މުގައްދަސް ބިނާ ކަމަށްވާ "އިމާމް ރިޒާ" ގެ މަރުކަޒުގައި ފަސްދާނުލައިފިއެވެ.

މިއަހަރުގެ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިސްރާއީލުން އީރާނުގެ ވެރިރަށް ތެހެރާނަށް ދިން ކުއްލި ވައިގެ ހަމަލާތަކެއްގައި ޚާމަނާއީ އަވަހާރަވި ނަމަވެސް، ގައުމުގައި ހިނގަމުންދިޔަ ހަނގުރާމައިގެ ސަބަބުން އޭނާގެ ޖަނާޒާ ބޭއްވުން 100 އަށް ވުރެ ގިނަ ދުވަހަށް ލަސްވެގެންދިޔައީއެވެ.

ޚާމަނާއީއާ އެކު އެ ހަމަލާގައި އަވަހާރަވި އޭނާގެ އާއިލާގެ ހަތަރު ބޭފުޅެއްގެ ހަށިކޮޅު ވެސް ވަނީ އޭނާއާ އެކު އެއްތަނެއްގައި ފަސްދާނުލާފައެވެ.

ޚާމަނާއީގެ ޖަނާޒާގެ ރަސްމިއްޔާތުތައް ހަ ދުވަހުގެ މުއްދަތަށް ކުރިއަށްދިޔައިރު، މިއީ ފަހުގެ ތާރީޚެއްގައި ދުނިޔޭގައި ބޭއްވުނު އެންމެ ބޮޑު އެއް ޖަނާޒާ އެވެ. އޭނާގެ ސަންދޯއް ވަނީ އީރާނުގެ ވެރިރަށް ތެހެރާނާއި، ދީނީ މަރުކަޒެއް ކަމަށްވާ ގޮމްގެ އިތުރުން، އަވަށްޓެހި އިރާގުގެ މުގައްދަސް ރަށްތައް ކަމަށްވާ ނަޖަފް އަދި ކަރުބަލާގެ މަގުތަކުގައި އުފުލާފަ އެވެ. މި ހުރިހާ ސިޓީތަކެއްގެ މަގުތަކަށް އެތައް މިލިއަން ބަޔަކު ކަޅު ހެދުމުގައި ޖަމާވެ، ހިތާމަ ފާޅުކުރަމުން ދިޔައިރު، މަޝްހަދުގައި ބޭއްވި އެންމެ ފަހުގެ ރަސްމިއްޔާތަށް އެކަނިވެސް 15 މިލިއަނާ ގާތްކުރާ އަދަދަކަށް މީހުން އެއްވި ކަމަށް ރިޕޯޓުތައް ބުނެ އެވެ. މި ބިޔަ ޖަނާޒާގެ ތެރެއިން އެންމެ ބޮޑަށް ފާހަގަވެގެންދިޔައީ އީރާނުގެ ރައްޔިތުން އެމެރިކާ އާއި އިސްރާއީލާ ދެކޮޅަށް ކުރަމުންދިޔަ ހަރުކަށި މުޒާހަރާތަކާއި ބަދަލުހިފުމުގެ ޝިއާރުތަކެވެ. ޖަނާޒާގެ ބައިވެރިން ދިޔައީ ރަތް ކުލައިގެ ދިދަތަކާއި ޚާމަނާއީގެ ފޮޓޯތައް ހިފައިގެން "އެމެރިކާ ހަލާކުވެދާށި" އަދި "އިސްރާއީލް ނެތިދާށި" ގޮވަމުންނެވެ. އަދި ހަމަލާ ދިނުމަށް އަމުރުކުރެއްވި އެމެރިކާގެ ރައީސް ޑޮނަލްޑް ޓްރަމްޕްގެ ފުރާނަ ދުއްވާލާނެ ކަމަށް ބުނެ "ޓްރަމްޕް، ތިމަންމެން ކަލޭ ގަތުލުކުރާނަން" ލިޔެފައިވާ ބޮޑެތި ބެނާތައް މީހުންގެ ތެރޭގައި ހުޅުވާލާފައި ހުއްޓެވެ. އީރާނުގެ ދައުލަތުން މި ރަސްމިއްޔާތު ބޭނުންކުރީ އެގައުމުގެ ދީނީ އަދި އައިޑިއޮލޮޖިކަލް ބާރު ދުނިޔެއަށް ދައްކާލުމުގެ ވަސީލަތެއްގެ ގޮތުގަ އެވެ.