ލުބުނާނުގެ އެކި ސަރަޙައްދުތަކަށް އިސްރާއީލުން މެދުކެނޑުމެއްނެތި ދެމުންދާ ވަރުގަދަ ހަމަލާތަކުގައި މަރުވި މީހުންގެ އަދަދު 4،300 އަށްވުރެ މައްޗަށް އަރާފައިވާ ކަމަށް އެ ޤައުމުގެ ސިއްޙަތާ ބެހޭ ވުޒާރާއިން ހާމަކޮށްފިއެވެ.

ލުބުނާނުގެ ހެލްތު މިނިސްޓްރީން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، މިއަހަރުގެ މާޗު މަހުގެ 2 ވަނަ ދުވަހުން ފެށިގެން އިސްރާއީލުން ދެމުންދާ ހަމަލާތަކުގައި މިހާތަނަށް 4،303 މީހުން ވަނީ ޝަހީދުވެފައެވެ. އަދި މި ހަމަލާތަކުގައި އެކި މިންވަރަށް ޒަޚަމްވި މީހުންގެ އަދަދު 12،202 އަށް އަރާފައިވާ ކަމަށްވެސް އެ ވުޒާރާއިން ބުނެފައިވެއެވެ.

އިސްރާއީލުން ލުބުނާނަށް ދެމުންދާ ހަމަލާތައް ވަރުގަދަކޮށްފައި މިވަނީ، އެމެރިކާ މެދުވެރިވެގެން އެކުލަވާލި ހަމަލާތައް ހުއްޓާލުމުގެ އޮނިގަނޑެއްގައި މިދިޔަ ހަފުތާގައި ސޮއިކޮށްފައި ވަނިކޮށެވެ. ނަމަވެސް، އެ އެއްބަސްވުމަށް ބޯލެނބުމެއް ނެތި އިސްރާއީލުން ދަނީ ލުބުނާނުގެ އެކި ސަރަޙައްދުތަކަށް ބޮން އަޅަމުންނެވެ.

އިސްރާއީލުގެ އަސްކަރިއްޔާއިން ބުނަމުންދަނީ އެ ޤައުމުގެ ހަމަލާތައް އަމާޒުކުރަނީ ލުބުނާނުގައި ހަރަކާތްތެރިވާ ހިޒްބުالله ޖަމާޢަތުގެ މަރުކަޒުތަކަށް ކަމަށެވެ. އެހެންނަމަވެސް، މި ހަމަލާތަކުގައި ގިނަ އަދަދެއްގެ އާންމު ރައްޔިތުން މަރުވެ، ބޮޑެތި ގެއްލުންތަކެއް ދަނީ ލިބެމުންނެވެ.

ސުލްހައިގެ އެއްބަސްވުމެއް އޮތް ނަމަވެސް، އިސްރާއީލުން އެ އެއްބަސްވުމާ ޚިލާފަށް ހިންގަމުންދާ އުދުވާނުގެ ސަބަބުން ލުބުނާނުގެ އިންސާނީ ހާލަތު އިތުރަށް ގޯސްވެ، ބައިނަލްއަޤުވާމީ މުޖުތަމަޢުގެ ކަންބޮޑުވުން ވަނީ އިންތިހާއަށް އިތުރުވެފައެވެ.